ئاسۆی رۆژ

عەلی خامنەای، ڕۆژی یەکشەممە ڕێکەوتی ١٩ی بەفرانباری ساڵی ١٤٠٠ی هەتاوی، لە پەیوەندییەکی ڕاستەوخۆ لەگەڵ کۆمەڵێک خەڵک لە شاری (قم) وتی: ((نابێ بهێڵین سەرکەوتنەکانی کۆماری ئیسلامی لە بیر بچێتەوە، دەیان سەرکەوتن لە نیزام بووە و ئێمە دەبێت ئەم سەرکەوتنانە بە خەڵک ڕابگەینین و بیری ئەو کەسانەی بهێنینەوە کە لە بیریان کردووە)).

خامنەای باسی لە کێشەکانی خەڵک و بژێوی ژیانیان کرد و وتی هەندێک کەس جۆرێک باس لەم کێشانە دەکەن کە گوایا هیچ سەرکەوتنێک لە نیزام دا نەبووە.

ئەم وتانەی خامنەای لە حاڵێکدایە کە لە سەرەتای هاتنە سەرکاری ڕژیمی کۆماری ئیسلامی و هەروەها لە چەند ساڵی ڕابردوو گوشار و ئاڵۆزی زۆر لەسەر خەڵکی ئێران بووە و تا ئێستاش هەر بەردەوامە.

ڕێبەری کۆماری ئیسلامی دەرەنجامی توێژینەوە جۆراوجۆرەکان لە بارەی باروودۆخی ئێرانی ڕەتکردەوە و وتی کە ئەم توێژینەوانە ڕاستی نەتەوەی ئێران نییە و کۆمەڵێک خەڵک لە ڕووی غەرەزەوە ئەم توێژینەوانە دەکەن.

شایانی باسە لە حاڵێکدا کە سەرکووتی سیاسی و لەبەند کردنی خەڵک و بێدەرەتانی زیندانیانی سیاسی بەردەوامە، خامنەای لە ڕوبەڕو بوونەوەی کۆماری ئیسلامی لەگەڵ نەیاران و ڕەخنەگەران دیفاعی کرد و وتی:((کۆمەڵێک هەن کە بە شێوەی ڕاستەوخۆ دژ بە کۆماری ئیسلامی دەوەستن و نیزام هیچ چارەیەکی نییە جگە لەوەی کە بە تووندی وڵامیان بداتەوە))، خامنەای زیادی کرد: کۆمەڵێک خەڵک لە سەر تۆڕە کۆمەڵایەتییەکان و سۆشیال میدیا خەریکی بە لا ڕێگە بردنی گەنجەکانن و نابێت ئەم دەرفەتەیان پێ بدرێت.

ئه‌م بابه‌ته 261 جار خوێنراوه‌ته‌وه‌‌