دەوری كرێكاران لە داهاتووی سیاسی ئێران

فۆئاد شێربەیگی

وڵاتی ئێران بە هۆی تایەبەتمەندیگەلێكەوە بە هێمنی توانی شێوازی بەرهەمهێنانی فێئۆداڵی بۆ سیستمی بەرهەمهێنانی سەرمایەداری بگۆڕێت و كۆمەڵگای ئێران كەمترین تێچووی لە بواری ئەمنییەوە بۆ ئەو گۆڕانكارییە بنەڕەتییە لەسەردەمی خۆیدا داوە، باوەكوو سەرەوەی كۆمەڵگا بە خێرایی كەمترەوە كاردانەوەكانی ئەو گۆڕانكارییە لە بوارە جیاجیاكانەوە بەخۆیەوە بینی بەڵام بە هۆی گۆڕدرانی پەیوەندییەكانی بەرهەمهێنان، چینی كرێكار و مام ناوەندی هەڵقوڵاوی ئەو گۆڕانكاریانە دەورێكی زیاتریان لە سیاسەتی وڵاتدا گێڕاوە و كاریگەریان زۆرتر بووە.
سەرەڕای ئەوە باوەكوو هێزی چینی كرێكار دەورێكی بەرچاوی لە بەدەستەوە گرتنی دەسەڵات لە لایەن مەلاكانەوە هەبوو، بەڵام ئەو گۆڕانكارییە مێژووییە كەمترین داهاتی بۆ ئەوان نەبوو و بگرە ئاستی ژیانیشیان بە ڕێژەی مامناوەندی باقی چینی دەسەڵاتدا زیاتر دابەزاند و كەلی چینایەتی لە ئێران زیاتر بووە و لەبەرچاوترە و لە هەموو بەشەكانی ژیان هەست بەو كەلێنە و هەڵاواردنەكانی سەرچاوە گرتوو لێی دەكرێت و دەبیندرێت.
هەر وەك جەبری مێژوو ئەوەمان پێدەڵێت درێژەی سیستمی سەرمایەداری دژایەتی بەرژەوەندی چینە دژبەرەكان زیاتر دەردەخات، ئەوڕۆش دەبیندرێت رۆژ لە دوای ڕۆژ دژایەتی ئەو بەرژەوەندیانە دەبێتە قووڵتربوونەوەی كەڵێنی چینایەتی و بەهۆی تایبەتمەندی چینی دەسەڵاتداری سەرمایەداری درێژەی رەوتی قازانجی ئەوچینە و هەڵسوڕانی سەرلەنوێ سەرمایە بە چەوساندنەوەی چینی كرێكارەوە گرێدراوە و هەڵاواردن بەشێكی جیانەكراوە و تایبەتمەندی نەگۆڕی سیستمی سەرمایەدارییە و درەنگ یا زوو ئەو دژایەتییەی بەرژەوەندییە خۆی لە بزووتنەوە كرێكارییەكاندا دەردەخات و رەنگدانەوەی دەبێت، چۆن ئەمڕۆ دەبیندرێت ئیعترازە كرێكارییەكان لە شوێنە جیاجیاكانی ئێران سەرهەلدەدەن و سەرەڕای ئەوەی تەنیا داواكاری پیشەیی و بژێوی ژیانیان ئامانجە، زۆر بە تووندی دەكەونە بەر هێرشی پارێزەرانی سەرمایە و سەركووت دەكرێن.
هەموو بزوتنەوەیەكی كرێكاری بە پێی جەبری تاریخ لە دژایەتی بەرژەوەندی مێژوویی چینایەتییەوە سەرهەلدەدا و بە داواكرییە پیشەییەكانەوە خۆی دەردەخات، بەڵام لە لایەن دەسەڵاتدارانی سیاسییەوە بە نوێنەرایەتی چینی چەوسێنەر سەركووت دەكرێت، بەڵام نە تەواو دەبێت و نە دادەمركێت و نە چارەسەرێكی بنەڕەتی بۆ دەبیندرێتەوە و ئەركی چالاكانی سیاسی لە ئێرەوە زۆرتر دەبێت كە ئێمەش وەكوو حیزبێكی داكۆكیكاری مافی كرێكاران و چەوساوەكان دەبێ ئەوەمان لەبەرچاو بێت.
یەكەم ئیعترازی خۆڕسكی كرێكاران بەس كاردانەوەی ئیحساسی چینێكی بەشخوراوە و لە وشیاری چینایەتییەوە سەرچاوە ناگرێت و بەتەنیاییش ناتوانێت ئەو وشیارییە بەدەست بێنێت و تا ئەوكاتەی باووتنەوەكەش بە وشیاری چینایەتی نەگات، زۆر بەسادەیی و بە بێ دەسكەوتێك سەركووت دەكرێت و هەر چەشنە هەڵسوڕانێكی چڕوپڕیش بۆ ڕێكخستنەوەی سەرلەنوێ تەنیا بەمەبەستی داواكارییە پیشەییەكان خۆ غافڵاندن و بەفیڕۆدانی هێز و وزەیە و ناتوانێت سەركەوێت.
سەرەڕای ئەوەی ئەركی هەموو چالاكانی سیاسی و كرێكارییە هاوكات لەگەڵ ئەوەی بۆ پەرەپێدانی هەموو ئیعترازێكی پیشەیی هەوڵ بدەن و ڕێكخەری بن و دەوری سەرەكییان تێیدا هەبێت، وشیاری چینایەتی و سیاسیش لەدەرەوەی چینی كرێكارەوە بڕژێننە ناو كرێكارانەوە و ڕێبەرانی مەیدانیان بۆ ڕێبەری سیاسیش پەروەردەكەن و بۆخۆشیان بە تێكەڵبوون لەگەڵ ئەوچینە بتوانن لە فۆڕمۆلە كردنی دروستی تاكتیك و ستراتیژەكان دەورێكی بەرچاوتر و كاریگەرتر بگێڕن.
ئەو كارانەی باسمان كرد لە ئێران وردە وردە خەریكە زیاتر دەردەكەوێت و دەبیندرێت و پێویستە بە ڕێكخستنی زیاتری كرێكاران لە چوارچێوەی ڕێكخراوە جەماوەرییەكان و پەیوەندی نزیك و ئۆرگانیك هەموو ئەو ڕێكخراوانە بەیەكەوە، ئەو ئیعترازە تاك و بڵاوانە لە هەنگاوی یەكەمدا تایبەتمەندی بزوتنەوەیەكی كۆمەڵایەتی ڕێكخراو مسۆگەركەن و بە پشتیوانی لە یەكتر بتوانن تایبەتمەندییە چینایەتییەكانی ناوخۆیان زەقتركەونەوە و بە تێكەڵ كردنی داواكارییە پیئشەییەكان لە گەڵ داواكاری سیاسی بەرەو سەرهەڵدانێكی سیاسی بڕۆن.
كاتێك ئەو هەنگاوانە بەڕێكوپێكی و لێبڕاوانە بڕواتە پێشێت، بە لەبەرچاوگرتنی زیاتر لە چڵ ملیۆن كەسی ئەندامی بنەماڵە كرێكارییەكان و هاوپشتی بەشێكی زۆری چینی مامناوەندێك كە هەموویان لە ژێر هێڵی هەژاریدا دەژین سەركەوتنی بزوتنەوەی كرێكاری و هاوكات لەگەڵ ئەو، كاریگەری ڕاستەوخۆ لەسەركەوتنی سیاسی و ڕووخانی كۆماری ئیسلامی و بەدەستهێنانی بەشێكی زۆر لە داواكارییە سیاسی و كۆمەڵایەتی و ئابورییەكانی زۆرینەی خەڵك و چینی كرێكاریش زۆر زوو بەدیدێت و تایبەتمەندی ئێرانیش ئەو ڕاستییەمان بۆ دەردەخات كۆماری ئیسلامی بە هۆی تایبەتمەندییە نەگۆڕەكانییەوە ناتوانێت هیچ لانی كەمێك لە داواكارییەكانی چینی كرێكار دابین بكات و باسكردنیشیان تەنیا بۆ خۆڵ لە چاوی خەڵك كردنە و وڵامدانەوە بەهەركام لەو داواكاریانە بە مانای نەرگی كۆماری ئیسلامییە و ڕوون و ئاشكرایە تەنیا نەمانی كۆماری ئیسلامییە دەستپێك و سەرەتای هەر چەشنە گۆڕانێكی بنەڕەتی لە ژیانی خەڵك بە گشتی و چینی كرێكار بە تایبەتییە. 
چینی كرێكاری ئێران بە گشتی و كوردستان بە تایبەتی دەبێ ئەو ڕاستییە بزانن دوژمنی سەرەكی و چەوسێنەری سەرەكی و پارێزەری ئەو هەڵاواردنە و هۆكاری چارەڕەشی و ژیانی تاریكی ئەوان و هەموو خەڵكی ئێران فریوخواردنی ساڵ لەدوای ساڵی خەڵكی ئێرانە و هیوا بە وەهمێكی قەت وەدنەهاتوو و تەنیا ئەوەش چینی كرێكارە دەتوانێت گۆمی مەندی دەسەڵاتی نگریسی كۆماری ئیسلامی بهەژێنێت و ببێتە هێزی ڕوخێنەر و رزگار كەری وڵات


AM:09:43:02/05/2017




ئه‌م بابه‌ته 549 جار خوێنراوه‌ته‌وه‌‌