سێ كوچكەی حیزبایەتی

فوئاد شێربەیگی

چۆنیەتی هەڵسووڕانی حیزبی لەهەرسەردەمێكدا، گرێدراوە بە بارودۆخی تایبەتی ئەو سەردەمە و چۆنیەتی دەورگێڕانی حیزبەكان لە كەشوهەوای سیاسی كۆمەڵگاكەی خۆیان، بەڵام سێ خاڵی گرینگ لە حیزبایەتیدا دەورێكی تایبەتییان هەیە كەدەبێ بۆ كاروباری حیزب هەمیشە لەبەرچاو بگیرێن چونكە لەهەموو باروودۆخێك و كۆمەڵگایەكدا كاریگەرییان لەسەر حیزبایەتی دەبێ.
ئەم سێ خاڵە بریتین لە:

یەكەم، داڕشتنی سیاسەتێكی گونجاو و ستراتێژییەكی ڕوون
دووهەم ،پەروەردەكردنی كادر و ڕێبەرایەتی شیاو
سێهەم، دەزگایەكی ڕاگەیاندنی گشتی بۆ پەیوەندی و پەرەپێدان

لێرەدا باسێكی كورتتان لەو سێ خاڵە پێشكەش دەكەم و لە خاڵی یەكەمەوە دەست پێدەكەم كە بریتییە لە دارشتنی سیاسەت و ئیستراتژی گونجاو و ڕوون بۆ حیزب كە دەبێتە پێناسەی سەرەكیش بۆ هەر حیزبێك و گرینگییەكی تایبەتی هەیە.
خوێندنەوەیەكی سەردەمییانە بۆ كۆمەڵگا و ناسینی داخوازییە سەرەكییەكانی خەڵك و دۆزینەوەی كەلینە كۆمەڵایەتییەكانی هەر كۆمەڵگایەك یەكەم هەنگاو لە دەستپێكی هەڵسوورانی سیاسیدایە و هەر كەسێك ئەو خوێندنەوەیەی نەبێت نازانێت داوای چی دەكا و یا بەهەڵە داخوازییەكانی خۆی یا كەمینەیەك لەباتی داخوازی سەرەكی زۆرینەی كۆمەڵگا پێناسە دەكات.
كاتیك بەڕوونی لە داخوازییەكانی كۆمەڵگای خۆمان تێگەیشتین و ئەو كەلێنە كۆمەڵایەتییانەمان دۆزییەوە كە دەبنە هەوێنی ئیعترازی سیاسی و دەكرێ لە دەوریان خەڵكی بۆ كۆكەینەوە، كاتی ئەوە دێت بە پێی ڕوانگەی سیاسی و بیری زاڵ بەسەر فكرییەتی حیزبەكەمان ئیستراتژی ڕوون و پشت ئەستوور بە زانست و لۆژیكی سەردەمی بۆ دیاری كەین و بە پێی هەلوومەرج و باروودۆخی كۆمەڵگا و دەرفەتەكانی بەردەستمان تاكتیكی گونجاو و كاریگەر دابنێین.
خاڵی دووهەم كە بریتییە لە پەروەردە كردنی كادر و ڕیبەری شیاو بۆ حیزبەكە، گرینگییەكی كاریگەری دەبێت لە ئاستی كاریگەری حیزب و چۆنیەتی بەرەوپێشبردنی سیاسەتەكانی حیزب و توانای لە كۆكردنەوەی خەڵك لەدەوری بانگەوازی حیزبی.
بەو پێیە پێویستە كادر و ڕێبەرایەتی حیزبی بە هاودەنگی و هاوفكری لەسەر هێڵی گشتی فكرییەتی حیزبی و ڕێككەوتن لە سەر لێكدانەوەیان لە شرۆڤەی داخوازییەكانی كۆمەڵگا بە ئیستراتژییەكی هاوبەش بگەن و لەوپەڕی لەخۆبردوییەوە بۆ پەرەپێدانی تێبكۆشن و بە هەڵبژاردنی ڕێبەری كارامە و لێپرسینەوە لێیان هاوكات لەگەل لە ئەستۆ گرتنی ئەركە حیزبییەكان لە لایەن هەمووانەوە بۆ سەركەوتنی ئیستراتژی حیزبی تێبكۆشن و بە خۆ پەروەردەكردن و خۆ تەیاركردنی ڕۆژ لە دوای ڕۆژ زیاتری خۆیان لە كەڵك وەرگرتن لە هوموو دەرفەتەكانی بەردەست و بەڕێوەبردنی هەموو تاكتیكە هەڵبژێردراوەكانی حیزب درێغی نەكەن و لەسەر گرینگی تایبەتی ڕێبەرایەتی ئەوەشیان لەبیر بێت چاودێری و لێپرسینەوە لە ڕێبەرایەتی و هەڵسەنگاندنی بڕیارەكانیانە كە گارانتی دروستی و بەڕێكوپێكی ئەداكردنی ئەركی ڕێبەری حیزبییە.
خاڵی سێهەم، كە دەزگایەكی ڕاگەیاندنی گشتییە لە دوو بواردا گرینگی هەیە و دەبێ لەبەرچاو بگیرێت. یەكەم ئامێرێكی پەیوەندی حیزب و جەماوەرە كە دەبێتە كاناڵی دەربڕینی ڕوانگە حیزبییەكان و پڕوپاگەندەی حیزبی و دەنگی حیزب بە هەموو كۆمەڵگا دەگەیەنێت و بە تایبەت لەو سەردەمەدا كە تێكنۆلۆژی لە ئاستێكی بەرچاودا توانیوێتی پەرەبستێنێت و هەموو كەس بەجۆرێك لە ڕاگەیەندنە كۆمەڵایەتییەكان دەستیی ڕادەگات و دەوڵەتە مڵهوڕەكان ناتوانن هەموو لایەنێكی كۆنترۆل بكەن و پێشی پێ بگرن. گرینگییەكی تری دەزگای ڕاگەیاندنی حیزبی لەوەدایە دەبێتە شوێنێك بۆ گواستنەوەی ئەزموونی هەموو هەڵسووڕانی حیزبی لە شوێنە جیاوازەكان و بە لێكدانەوە و شڕۆڤەی هەركام شێوازێكی هەڵسووڕان لە شوێنێك دەكرێت دەرسە بەكەلكهاتووەكانی لێ هەڵێنجێندرێت و بۆ دەوڵەمەندكردنی بوارە جیاوازەكانی حیزبی كەڵكی لێ وەربگیرێت و بۆ هەڵسووڕاونی حیزبی لە شوێنەكانی تر وەكوو وانەیەكی بەكەڵك بگوازرێتەوە.
ئەو سێ خاڵە لەهەرسەردەمێكدا و لە هەر شوێنێك گرینگییەكی تایبەتیان دەبێت و بە پێی ئەوانە كە شێوازەكانی جۆراوجۆری هەڵسووڕانی حیزبی دیاری دەكرێت و هیوایەك بەسەركەوتن لەناو دڵدا دروست دەبێت و بە بێ لەبەرچاوگرتنی ئەوانە هەمیشە كاری حیزبایەتی بەشێك لاواز دەبێت و ناتوانێت دەورێكی كاریگەری لە بزوتنەوەیەكدا هەبێت.


PM:05:18:03/01/2017




ئه‌م بابه‌ته 345 جار خوێنراوه‌ته‌وه‌‌