(ك. ن. ك) كۆرپەیەك كە بەر لە دایك بوون، مرداندیان!

بیژەن قوبادی 

پرسی كورد و بابەتی پێوەندیدار بە دۆزی كورد و بزووتنەوی رزگاریخوازی كوردستان، بابەتێكی چەند چەمكە بە بەستێنێكی بەرین و لە هەركامە لە پارچەدابڕێندراوەكانی كوردستاندا هەڵگر و خاوەنی كۆمەڵێكی بەرفراوان فاكتەر و تایبەتمەندیە كە بە بێ لە بەرچاو گرتنی ئەو راستیانە، ناتوانرێ و ناكرێ خوێندنەوەیەكی واقێع بینانەی بۆ بكرێت.
كوردستان بە گشتی هەڵكەوتە و ناوچەیەكی جوغرافیایی و كۆمەڵێك رەهەندی تایبەتە كە بە درێژایی مێژوو جێگەی تەماع و ململانێی وڵاتانی دوور و نزیك بووە. لە راستیدا كورد بە بێ ئەوەی كە خۆی رۆڵی گێڕابێت، خۆی و مڵك و ماڵ و سامان و وڵاتی هەمیشە قوربانی بووە. بە پێی گشت دەق و سەرچاوە و بەڵگە مێژووییەكان وڵاتی كوردان گۆڕەپانی رمبازێنی رۆم و ئێران، یوونان و ئێران، مەقدوونیەكان و ئێران، مەسیحیەت و ئیسلام، عەرەب و ئێران، مەغوولەكان و ئێران، عوسمانیەكان و سەفەویەكان(ئێران)، ئێراق و ئێران، رادیكالیزمی توند ئاژۆی ئیسلامی و .... بووە. جا سەیر لەوەدایە كە هەمیشە جیرانەكان هاتوون و شەڕیان لە ناوچەیەك كردووە كە هیچ قازانج و بەرژەوەندیەكی دانیشتووان و خەڵكی خۆجێی ئەو ناوچەیەی تێدا نەبووە و لە بەر قازانج و بەرژەوەندیی ئەوان نەبووە و رۆڵیان تێیدا نەگێراوە و تەنیا و تەنیا قوربانی بوون و وڵات و بنەماڵەیەن دابەش و هەنجن هەنجن كراوە.
دوژمنان و داگیركەرانی كوردستان هەمیشە حەولیان داوە ئێمە پشتگوێ بخەن و بمانكەنە پاشكۆ و بە كیفی خۆیان كەڵكمان لێ وەرگرن و بەداخەوە زۆرجار لەو پلان و پیلانانەشدا سەركەوتوو بوون. بە هەموو ئامراز و شێوازێك لە سەر نەهێشتنەوەی "متمانە بەخۆ" و " باوڕ بەخۆ" بوونی تاكی كورد بە درێژایی مێژووی داگیركارانەی خۆیان جووڵاونەتەوە. تا رادەیەك كە بڕیك لە خۆمان زۆر جار دۆخەكەیان لێ گۆڕاوەو خۆیان لە ژێر رووبەندی رزگاریدەر لە هەمان ئامرازی داگیركەر كەڵكیان وەرگرتووە و تەنانەت جێگای خۆشیان لە گەڵ داگیركەر تێكچووە و پڕوپاگەندی ئەوەیان كردووە كە : كورد نابی بە هیچ، كورد دەستی زۆری بەسەرەوە نەبێ، خواناناسێ و لەم شێوازە لێدوانە. زۆر جار خۆیان بە تاكە رزگاریدەر ئەزانن و پێیان وایە دەرمانی حەوت دەردانیان لایە و تەنیا رێگای دەربازبوون لەو نەهامەتی و چەرمەسەرێیە هەر ئەو نوشتەیەیە كە لە زار و نووكی خامەی ئەوانەوە دەچۆڕێتە خوارەوە.
ئەو نوسخە و نوسخە نووسینانە ساڵەهایە دێن و دەچن و رەنگ و تام و بۆنیان پێوە نەماوە. هەركامە لە بەشەكانی كوردستان تایبەتمەندیی خۆیان هەیە و پێویستە بە پێی تایبەتمەندیەكانیان و بە پشت بەستن بە ئێرادەی جەماوەر و دەرفەتە خۆجێی میكانیزمە شیاوەكانی خۆیان بەرەوە پێش بچن. ئەو نوسخە پێچراوانە دووپات كردنەوەی "امە السلامیە"و" امە العربیە" ی سەدام و بن لادەن و زەرقاوی و بەغدادی و موفتی و ئێخوانە لە هەزار تۆی دەمامك و رووبەندی فریودان و هەڵخڵەتاندن.
ئەزموونی ئەو بابەتە زۆرن و تازەترینیان لە بار بردن و خەساردانی دەسكەوتەكانی خەباتی كوردە لە باكووری كوردستان و دانی مەجال بە دوژمن بۆ دەستێوەردانی هەمە چەشنەوە و هەمە لایەنە  تەنانەت پارلەمانتارانی كورد. بە قەولی ئەو پەندە كە ئەڵی كەچەڵ گەر تیماركەر بوایات، سەری خۆی تیمار ئەكرد. هەروەها هاوپەیمانی لە گەڵ دوژمنی مێژینەی كورد كە دەسەڵاتدارنی دەمێشقن و رادەست كردنەوەی ناوچە ئازادەكان و بیرە نەوتەكان بە دەسەڵاتی ئەسەد یەك لا ببنەوە، جا با لایەنی پێوەندیدار لە سكەكەی باكووری كوردستان بێتەوە ئینجا نوسخە بۆ رۆژهەڵات یان بەشەكانی تری كوردستان بنووسێت.
كوێر بێ ئەو چاوەی بە تەبایی و و لێك نزیك بوونەوە و كۆدەنگیی كورد هەڵنیایی. با كوردیش كۆمەڵەیەكی وەكە "كۆمكاری عەرەبیی بێت، با یەكێتیەكی وەكە یەكێتی ئۆروپای بێت، كێ كێشەی لە گەڵ ئەوە هەیە؟ پێم وانیە تاكە كوردێك بێت كە كێشەی لە گەڵ ئاوها بابەتێك بێت. بەڵام  بە كامە پێوەر و بە پێی كامە دۆخ؟ لایەنێك خۆی كوێخا فەرز بكات و بە نیاز بێت هێژموونیی خۆی بسەپێنێت؟ لایەنێك كە هەرچەشنە دەرەتان و مەجالێك لە لایەنی بەرانبەری زەوت بكات و لە دەسەڵاتدارنی داگیركەر بەرانبەر بە لایەنە سیاسیە كوردیەكان دڕتر و دوژمانكارانەتر هەڵس و كەوت بكات؟ لایەنێك كە خۆی تا ئەمڕۆش نەیزانیوە چیی ئەوێت و چیی ناوێت؟ لایەنێك كە رۆژێك بڕوای بە یەكپارچەیی خاكی كوردستانە و رۆژی دواتر لە قەبارەی بچووك بچووك دا كوردستان سەرلەنوێ دابەش ئەكاتەوە؟ لایەنێك كە خۆی دیلی كەلتوری دەگیركەرانەوە و سەرەرای ئەو گشتە دەوڵەمەندیەی شێواەزاری كوردی، تەنیا یەك شێوەزاری پێ فەرمەیە و ئەوانیتری پێ" ناوڵات پارێزیە"؟ لایەنێك كە بە شێوازی ستالین و یەكێتی سۆڤێت دایمە خەریكی " احزاب برادر" لێدانە؟
وەها كۆڕ و كۆمەڵێك ماوەی چەند ساڵە دامەزراوە بێزەحمەت یەك دوو لە دەسكەوتەكانی باس بكەی با ئێمەش ئاگاداری بین جیا لەوەی كە لە خزمەت لایەنێكی تایبەتی سیاسی دا بووە پەرەی بە ئێنشقاق و پەرەوازیی داوە، كامە رۆڵی پۆزەتیڤی گێڕاو؟
هەر وەك پێشتر ئاماژەم پێیدا، كوێر بێ ئەو چاوەی كە بە تەبایی و و لێك نزیك بوونەوە و كۆدەنگیی كورد هەڵنیایی. بەڵام تا ئەو كۆڕە خۆی لە ژێر هەیمەنە و هێژموونی لایەنێكی دایریكراودا رزگار نەكات و وەكو كۆڕێكی بەدەربەست و خەمخۆری راستەقینەی نەتەوەیی پێكهاتوو لە هەموو لایەنە سیاسیەكانی كوردستان خۆی نەسەلمێنێت، تەنیا دەسكەوتی كوتانی ئاسنی سارد و ئاو لە هاوەنە. بژی كۆدەنگی و هاوئاهەنگیی راستەقینەی كورد لە پێناو دەستەبەر كردنی مافە زەوت كراوەكانی و بەرژەوەندیی گشتیی كوردستان.


PM:06:34:16/07/2017




ئه‌م بابه‌ته 278 جار خوێنراوه‌ته‌وه‌‌