بەبۆنەی چەكداربوونی یەكەم پەلی پێشمەرگەی ژنانی كۆمەڵەوە

رەخنە لەم باسە لە سەردەمی ئێستادا

مەبەست ئەوە نییە كە لەم نوسینەدا شان و شكۆی ئەو دیاردە گرینگە، واتە ژنی پێشمەرگە و بەشداریی ژن لە خەباتی شۆڕگێڕانەی كوردستاندا رووبەڕووی كەم لوتفی كرێتەوە، بەڵكوو مەبەست ئەوەیە كە وەستانێكی كورتی رەخنەگرانە بكرێت بەسەر ئەو بابەتەدا كە كۆمەڵگای پیاوانەی ئێمە لە سەرەتادا و لە ئێستادا چۆن هێشتا ناتوانایە لە دەركی ئەم دیاردەیە.
جێگای قسە نییە كە لە سەرەتای دەركەوتنی ژنی شۆڕشگێڕی مودێرندا چۆنا و چۆن عەقڵییەتی پیاوانە و كۆنزێرڤاتیوی ئێمە ئەم دیاردەیەی دایە بەر نامێهرەبانی و جێگای خۆیەتی ئەگەر یەكەم جیلی ژنانی شۆڕشگێڕ ئەو گلەییە لە پەروەردەی لۆكاڵی نیشتمانەكەی خۆیان بكەن كە چۆنا و چۆن دەیدانە بەر خراپترین جۆرەكانی توانج و ناتۆرە و نەیدەهێشت لەشی تۆزاوی و ماندوویان لە دژوارییەكانی پێشمەرگایەتی لە مزگەوتی گوندەكاندا بحەسێتەوە.
كارنامەی بەرخورد بەم دیاردەیە لە كوردستاندا، واتە بە باوبوونی ژنی شۆڕشگێڕ لە ئەژماری زۆر و سازماندراو و بەریندا، لەسەرەتاكاندا جیا لە نێو كۆڕی شۆڕشگێرانی پڕۆفیشناڵدا، كارنامەیەكی جێگای رەخنەیە، بە گشتی هەرچەندە دەوام و درێژەدار بوونی ئەو دیاردەیەش هەتا ئەمرۆ هەر شانازییەكەی بۆ جیلی یەكەمی ئەو ژنە شۆڕشگێڕانە دەگەڕێتەوە كە بە درێژایی ئەم ساڵانە كۆڵی قورسی رووانگە نەشیاوەكانی كۆمەڵگای خۆیان وێڕای قورسایی خەبات و ژیانی پێشمەرگایەتی دانەنا و ئەو رەوتەیان بە زیندوویی هەتا ئەمڕو هێنا.
بەڵام پرسیار ئەوەیە لە خولی تێپەڕینی ئەم ساڵانەدا چەندە  مینتاڵیتەی لۆكاڵیانەی ئێمە گۆڕاوە و ئێستا كە ئەم دیاردەیە گشتگیر بووە و لایەنگری زۆری هەیە، جێی خۆی نییە كە هەڵسەنگاندنێكی رەخنەگرانەی بەرخوردی زەینی كوردی بەو مەسەلەیە بكەین؟
یەكەم رۆحی كوردی، رۆحێكی برینداری خۆ بەكەم زانە لە ئاست گەشەی رۆشنبیری جیهانیدا. بۆیە بە دەگمەن شانازی وا شك دەبا كە لە بەرامبەر شانازییەكانی خەڵكی دنیادا بینوێنێ. گرنیگترین خۆبەكەم زانینی كورد پاش ئەوە دێت كە وەك نەتەوە نەیتوانیوە لە شانۆی جیهانیدا خۆی بنوێنێ. بۆیە هەوڵێكی زۆر دەدا كە بە فاكتۆرەكانی دیكە ئەم كەماییە قەرەبوو بكاتەوە. لە دەركەوتن و خۆ پیشاندانی سەر گۆڕەپانی شانازییەكانی نەتەوەكاندا، رۆحی كوردی بە ئاستێكی رەزامەندی دەگا كاتێك كە ئەو پیشانگای ژنانی شۆڕشگێڕ روو بە جیهان دەكاتەوە. ئەو كوردەی هەتا دوێنێ لە جەغزی سونەتگەرایی خۆیدا هێرشی دەكردە سەر دەركەوتنی دیاردەی ژنانی رەهای بەشدار لە بزووتنەوەی خۆیدا و وچانێكی كورتی مزگەوتەكانی بە ناحەق دەزانی بەرامبەر بەو ژنانەی كە بەبێ ئیزنی بنەماڵە و بەدەر لە ئیختیاری باوكانە بە شار و دێهاتدا دەگەڕێن، ئەمڕۆكە بۆ پاساوی نەبوونی شانازیەكان وەك سیمبولی شانازی میللی پەیتا پەیتا وێنەیان بڵاو دەكاتەوە.
بە بڕوای من ئەمە دووڕووییەكی عەقڵییەتی ئێمەی كوردی پیاو تەبێعەتە كە دەرحەق بە ژنی خەباتكار و شۆڕشگێر ئیختیاری دەكەین و نیشانەی ئەوەیە كە ئێمە بە پێی قازانجەكانی سەردەم و بە بێ باوەڕمەندی بە ئەسڵی دیاردەكە رەچاوی دەكەین.
دووهەم بابەتی كە جێی رەخنەیە لە عەقڵییەتی لۆكاڵی خۆمان ئەوەیە كە ئێمەی لۆكاڵیست و سونەتگەرای كورد، ژنی شۆڕشگێرمان تا ئەو كاتە قبوڵ كردووە كە دیانماڵیبێ لە سروشتی خۆی. ژنی كورد تا ئەو كاتە جێگای شانازی ئێمەیە كە پیاواندبێتیان، واتە تا ئەو كاتە و لەوكاتەدا خۆشمان دەوێ كە بەرگ و جلی جەنگی لە بەردایە و بە كەرەستەكانی شەڕ و شۆڕشەوە دەردەكەوێ.
سەرتاسەری میدیا كوردییاكان و فەزای مەجازی خەمڵاوە بە وێنەی ئەو ژنانەی كە جلی پیاوان و چەك و ئەسڵەحە رازاندونییەتەوە.
لەم كاتەدا، واتە لە كاتێكدا كە ژنانی كورد بە شكڵی كۆمەڵێك مرۆڤی جەنگەندە و بێ بەری لە هەموو جۆرە هەستێكی ژنانە دەردەكەون جێگای پێداهەڵكوتنی ئێمەن و بە زمانێكی بێ بەیان ئەوەیان پێ دەڵێین كە ئافەرین وا گۆڕاوی و ئەمجار لە خۆمانی! واتە بە هیوام ئەوە بڵێم كە ئەم عەقڵییەتەی ئێمە زۆر خۆشحاڵە لەوەی كە ژنی پیاواندووە و ئەم پیاواندنە بەكۆتایی پرسی ژن دەزانێ و پێی وایە دەربارەی بابەتی ژن بە تەكامول گەیشتووە.
ئەگەر عەقڵییەتی ٤ دەیە پێش ئێستای هاتنە مەیدانی ژنان بۆ خەبات ئەم عەقڵییەتە هالیودییە بێ ئەوا بێگومان بەشی بیری پیاوانەی كوردی لە بابەت ژنانەوە لەوكاتەشدا جێگای رەخنەیە.
خاڵێكی دیكە كە بە تەمام لێرەدا روونی بكەمەوە و نامەوێ بە هەڵە لێی تێ بگەن ئەوەیە كە هەموومان ئاگادارین كە چۆن پێوەندییە كاپیتالیستییەكان ژن بە ئاقاری بە كاڵابووندا هان دەدا بەڵام گەلۆ هاندانی پرسی ژن بە ئاقاری پیاواندن و بە قارەمانی پیاوكردندا و داماڵینی لە سرووشتی خۆی، ئەویش بە سیاسەتی پیاوانە، چی كەمترە لە بە كاڵاكردنی ژن.
ئەگەر بە چاوێكی ورد بڕوانینە شێوازە تەبلیغییەكانی فەزای مەجازی زۆر ئەم بابەتە بەرچاو دەكەوێ كە ژنانی شۆڕشگێڕ بۆ شكاندنەوەی هەر ژنێك بە كار دەهەندرێن كە لە یەكێك لە بوارەكانی دیكەی ژیاندا جیا لە خەباتكاری و چەكداری، سەرقاڵە. ژنانی شۆڕشگێڕ بۆ بە كەم زانینی ئەو ژنانە بە كار دەهێندرێن كە لە خەباتی چەکدارانەدا بەشدار نین و جلی پیاوانەیان لە بەردا نییە و ئەسڵەحەیان لە دەستدا نییە.
ئایا بیرمان كردووتەوە كە ئەمە دەتوانێ بە كار هێنانی ئەو ژنانە بێ كە بەشداری كاری پیاوانە نین " بە عەقڵییەتی لۆكاڵی خۆمان " لە بەرامبەر ئەو ژنانەدا كە لانی كەم هێشتا دەربازی كاری شۆڕش نەبوون و تەنیا هۆی بە رەوا زانینی شكاندنەوەیان ئەوەیە كە شانسی بە پیاو بوونیان نەبووە؟
هاتنی ژنان بۆ ریزی خەبات و بەشداری ئەوان لەو ئەمرە پڕدژوارەدا سەد جار مایەی شانازی ئێمەی كوردە ئەگەر توانیبێتمان كەشی زەینی و فیكری شیاوی ئەو بابەتە لە قوڵاییەكانی عەقڵییەتی خۆماندا بە نیسبەت ئەو بابەتەوە وەك واقعی باوەڕمان پێك بێنین و تەمرینی بكەین و هەزمی كەین، بەڵام تا ئەو كاتەی بابەتەكە لە پێناو خۆ هەڵكێشانی  بێناوەڕۆك و تەبلیغیدا بە كار بێنین، نابێ پێمان وابێ دەتوانین عەقڵی خۆمان و دنیا فریو بدەین.
ژنی شۆڕشگێڕ تەنیا سوتەمەنی تەبلیغاتی سەردەمی شۆڕش نییە و مەسەلەیەكی بنەڕەتییە بۆ هەر كەسێك كە وەفادارە بە باوەڕە سەردەمی و ئازادیخوازانەكان. لەعەینی حاڵدا كە ژنی شۆڕشگێڕ و فیلم و عەكسەكانی بووەتە باوی هەموو لایەك و هەموو لایەنێك هاتوونەتە سەر ئەو باوەڕەی كە حیماسەتی خەڵك زۆر بە باشی بەم عەكس و فیلمانە دەبزوێ، دەبێ هوشیاری ئەو بابەتەش بین كە ئیستفادەی سینەمایی نەكرێ لە هەیكەلی ژنی خەباتكار لە سیاسەتدا؛ ئەو ژنانەی كە مەجالی بەشداری كردنی خەباتیان بۆ نەڕەخسا یان سەلیقەی ئەم كارەیان نەبوو خائین و بێكەڵك و داوەشاو نەبیندرێن وەك ئەو جۆرەی كە عەقڵییەتی سونەتی دەیاننوێنێ.
ئەو عەقڵییەتەی كە بۆ خۆڕادانی ئەمڕۆ، ژنانی چەك بەدەست لە بەرچاوی دنیا دەخاتە پێش خۆیەوە، بەداخەوە لە رابردوودا هەر ئەم لە ماڵ دەركەوتنەی بەمایەی سوكایەتی دەزانی بۆ ئەوان بەڵام ئەمرۆ ئەو قسانەی خۆی لە بیر نییە كە لە بەر درگای مزگەوتەكان بۆ خەڵكی دەكرد.
كۆتایی كەلام ئەوەیە كە هاتنە مەیدانی ژنی پێشمەرگە و شۆڕشگێڕ لە نزیك بە چوار دەیە بەر لە ئێستادا، بە پێی سەرجەم ئاسەوارەكان هاتنە مەیدانێكی وەها بووە كە ریشەی لە باوەڕمەندییەكی سڵامەتتر و راستەقینەدا بووە و هیوا دەكرێ كە هەمان باوەڕمەندی لە ئیستاشدا پەرە بستێنێتەوە نەوەك بە پیاوكردن و كەڵكوەرگرتنی سینەمایی و حیماسەتی لە بابەتی ژنی موسەللەح.

AM:01:57:03/11/2016




ئه‌م بابه‌ته 896 جار خوێنراوه‌ته‌وه‌‌