راگەیاندنی دەفتەری سیاسی كۆمەڵە سه باره ت به سازشی ئەتۆمی

كۆمەڵەی شۆڕشگێڕی زەحمەتكێشانی كوردستانی ئێران بە بڵاوكردنەوەی راگەیاندنێك لێكتێگەیشتنە ناوكییەكی كۆماری ئیسلامی لەگەڵ وڵاتانی 5+1 بە پاشەكشەو شكستی كۆماری ئیسلامی دەزانێ‌و پێی وایە رژیمی ئێران لە كاتی سازشە دەرەكییەكان هەوڵەكانی بۆ سەركوتی نێوخۆیی زیاتر ئەكات و لەو رێگاوە هەوڵ ئەدا فەزا بۆ بزووتنەوە كۆمەڵایەتییەكان و داخوازییەكانی خەڵك كە بە بێ ڕاڕایی پەرە دەستێنن بەرتەسكتر كاتەوە و دۆخی ئەمنییەتی كە لە ئێستادا زاڵە هەروا بمێنێتەوە

دەقی راگەیاندنەكە لێرەدا بخوێننەوە:

لە ئاكامداو پاش یەكساڵ دانوستانی چڕوپڕ، كۆماری ئیسلامی تەسلیمی خواستی وڵاتانی رۆژئاوایی بوو و قەبوڵی كرد كە لانیكەم نەوەد لە سەدی چالاكییە پێوەندیدارەكان بە بەرهەمهێنانی مەوادی رادیو ئەكتیڤی خۆی دابخات و باقییەكەشی بە مەرجگەلێكی زۆر سەختگیرانەو لە ژێر چاودێری نێونەتەوەییدا درێژە بدا. بە بێ چوونە نێو وردەكارییەكانی رێككەوتننامەی سەرەتایی كە ناوی لێكتێگەیشتن نامەی لێنراوە، دەكرێت بە روونی تەسلیم بوونی لایەنی ئێرانی لە پرۆژەیەك كە ئەو هەمووە بۆی لە سەروەت و سامانی نەتەوەیی، هێزی ئینسانی و ئیعتیبار و حەیسیەتی خەڵك هەزینەی كردبوو ببینرێت. پرۆژەیەكی بێ دەستكەوت كە ماوەی دو دەیە كۆماری ئیسلامی پێداگری لەسەر دەكرد لە بواری بەرژەوەندی گشتی خەڵكی ئێران ناپێویست و زیانبارو بە نرخی سەرفكردنی سەدان میلیارد دۆلار سەرمایەی ئێران و فەوتانی كۆمەڵگا و ماڵوێرانی سەدان بنەماڵە، كەوتنە پەراوێزی نێونەتەوەیی، داسەپاندنی دواكەوتویی ئابووری سەرەتا بە شێوەی شاراوە و پاشان بە لەقاودانی نهێنییەكان بە شێوەیەكی ئاشكرا هیچ دەسكەوتێكی لێ بەرهەم نەهات. ئەمجارەش هەر وەكوو قەبوڵ كردنی ئاگربڕ و كۆتایی هێنانی شەڕی ئێران و عێراق، كۆماری ئیسلامی تەنیا ئەو كاتە سازش و تەسلیم بوونی قەبوڵ كردووە كە گوشارە ماڵی و ئابوورییەكان بە كردەوە درێژەدان بە پرۆژەكانی نامومكین كردووە و رێگای داڕمانی گشتیی نیزامی سیاسی خستووەتە بەر چاو.

بە پێی وتەكانی لایەنی بەرانبەر كە لە دانووستانەكانی لۆزان، بەرەبەرە دەردەكەوێت لە رۆژانی كۆتایی كەڵكەڵەی سەرەكی هەیئەتی دانووستانكاری ئێرانی ئەوە بووە كە لە لایەكەوە لە سەر شاراوە مانەوەی بەشێك لە خاڵەكانی رێككەوتننامەكە پێداگری كردووە و لە لایەكی دیكەوە لە جیاتی باسكردن لە سەر بەندەكانی رێككەوتننامەكە لەسەر فۆرموڵ بەندیگەلێك جەختی كردۆتەوە كە شكست و پاشەكشەی خۆی لەو پرسەدا لە چاوی رەخنەگرانی نێوخۆیی و هەروەها خەڵكی ئێران بشارێتەوە.

حەسەن روحانی ئاماژە دەكات بە درێژەدان بە سازش لە بوارەكانی تردا لەگەڵ رۆژئاوا و هاوكاری كردن لەگەڵیان. تەنانەت ئەگەر ئەو قسانە وەك قسەی دیپلۆماسیانە یان خۆڵكردنە چاوی خەڵكیش خوێندنەوەی بۆ نەكەین‌و بگرە وەك رێبازێكی جیددی چاوی لێبكەین، دەكرێ بگەینە ئەم ئاكامە كە كۆماری ئیسلامی بە كەمكردنەوەی قەیران لەگەڵ رۆژئاوا مەبەستییەتی بەرزە فڕییە ناوچەییەكانی درێژە پێبدا. یونسی یەكێك لە جێگرانی سەرۆك كۆماری ماوەیەك لەمەوبەر بەشێك لە خەونەكانی كۆماری ئیسلامی لەم بابەتەوە ئاشكرا كرد كە هەڵبەت بەهۆی لەقاودانی ئەم قسانە كەوتە بەر لۆمەو سەركۆنەكرا. بەم پێیە روونە كە نیزامی سیاسی وەلایی دەست لە قەیران خولقاندن هەڵناگرێ، مێژووی ئەم رژیمە گرێدراوە لەگەڵ درووستكردنی قەیرانی نێونەتەوەیی و ناوچەیی، هێرش كردنە سەر باڵوێزخانەی ئەمریكا و بارمتە گرتنی كارمەندەكانی، درێژەدان بە شەڕی ئێران و عێراق، هەوڵدان بۆ دەستپێڕاگەیشتن بە چەكی ناوكی و هەروەها ناسەقامگیر كردنی ناوچەكە لە ژێر ناو و بە بیانوویی شەڕ لەگەڵ داعش قەیرانێكە كە هەنووكە رۆژهەڵاتی ناوەڕاستی كردووەتە بەرمیلێكی بارووت.
دەستێوەردان لە كاروباری ناوخۆی عێراق و پێكهێنانی بەسیجی عیراقی و گەشەدان بە شەڕی مەزهەبی لەو وڵاتە، هەوڵ بۆ هێشتنەوەی رژیمی ئەسەد لە سوریە و دابین كردنی بوودجەی نیزامە سیاسیەكەی لە رێگای سەرچاوە ماڵییەكانی ئێرانەوە، درێژەدان بە پشتیوانی ماڵی و لۆجێستیكی لە حیزبوڵڵای لوبنان و هەوڵدان بۆ نانەوەی شەڕی نێوخۆیی لە بەحرین و هەروەها لە دوایین دەستدرێژییەكانی لە ناوچەكەو پشتیوانی نیزامی و ماڵی و تەداروكاتی لە حوسییەكانی یەمەن تێچووییەكی سەرسوڕهێنەری هەیە كە رژیم هیوادارە لە دۆخی دابەزینی تووندی نرخی نەوت لە بازاڕە نێونەتەوەییەكان، ئەو هەزینەیە لە رێگای كەم كردنەوەی بەشێك لە گەمارۆ نێونەتەوەییەكان لە ئاكامی سازشی ناوكیدا دابین بكات.

لە هەمانكاتدا رژیمی ئێران لە كاتی سازشە دەرەكییەكان هەوڵەكانی بۆ سەركوتی نێوخۆیی زیاتر ئەكات و لەو رێگاوە هەوڵ ئەدا فەزا بۆ بزووتنەوە كۆمەڵایەتییەكان و داخوازییەكانی خەڵك كە بە بێ ڕاڕایی پەرە دەستێنن بەرتەسكتر كاتەوە و دۆخی ئەمنییەتی كە لە ئێستادا زاڵە هەروا بمێنێتەوە. لە پاڵ ئەم هەڕەشەیەش دا دەزگا تەبلیغاتییەكانی رژیم هەوڵ ئەدەن دەست بدەن بە لاڕێدا بردنی ناوەرۆكی رووداوە هەنووكەییەكان و شكستی كۆماری ئیسلامی و بەرێوبەرایەتی ناكارامەی كە بووەتە هۆی لێدانی خەسارگەلێكی قەرەبوو نەكراو لە خەڵكی ئێران لە ژێر ناوی دەستپێكردنی دەورەیەكی نوێ كە گوایە بە توانایی تیمی دانووستانكاری ئێران و شەخسی سەرۆك كۆماری هاتووەتە دی، بێننە ئەژمار.
بە هەموو ئەمانەوە دوور خستنەوە كۆماری ئیسلامی لە دەستپێڕاگەیشتنی بە چەكی ناوكی و پاشەكشەكردنەكانیان لەو بوارەدا بۆ خەڵكی ئێران و ئازادیخوازان و خەباتكارانی دێمۆكراسی خوازی لە ئێران بە دڵنیایەوە سەركەوتنێكە. نیزامی سیاسی ئێران لە گشتییەتی خۆییدا و بە تایبەت دەسەڵاتدارانی ئەو نیزامە كە بەرپرسایەتی سەرەكیان لە ئەستۆیە لە چاو خەڵكی ئێران و هێزە دێمۆكراسی خوازەكان بێ ئیعتیبارتر و لاوازتر بوون. پلەبەرزترین كاربەدەستانی كۆماری ئیسلامی دەبێ لە بەرانبەر خەڵكی ئێران بە هۆی بە فیڕودانی سەروەت و سامانی نەتەوەیی و ئەو ژیانە سەخت‌و ئەستەمەی بۆ كۆمەڵانی خەڵكیان پێكهێناوە وڵامدەر بن. تەنانەت ئەگەر لێكتێگەیشتنی هەنووكەیی لە ماوەی مانگەكانی داهاتوودا ببێتە رێكەكەوتنێكی فەرمی، بە ڕای خەڵكی ئێران پەروەندەی ناوكی تەواو نەبووەو و نابێ بسپێردرێتە مێژوو. سیاسەتی رووخێنەری هەوڵ دان بۆ دەستپێڕاگەیشتن بە چەكی ناوكی لاپەڕەیەكی دیكەیە لە جینایەتەكانی ئەو رژیمە. لە بیری نەكەین كە بە بیانووی دروشمی "وزەی ناوكی مافی بێ ئەملاوئەولای ئێمەیە" مافیای سپای پاسداران بە بێ هیچ بەربەستێك باڵی خۆی كێشاوە بەسەر سەرچاوە سرووشتی و ماڵییەكانی ئێران و لەو رێگاوە دەستی داوەتە تاڵان كردنی داهاتی گشتی كۆمەڵگا. لە ئاكامی ئەم سیاسەتە زۆرێك گەیشتوونەتە سەروەت و سامانێكی ئەفسانەیی و لە تاڵان كردنی ئەمواڵی خەڵك دا بەشداریان بووە و راستەوخۆ بەرپرسی شێواندنی ژیانی بە میلیونان بنەماڵەن لە ئێراندا.
بە دڵنیایەوە ئەم توێژە بەرتیل خۆرە كە بە دەوڵەمەند بوون لە رێگای درووستكردنی وەها قەیرانگەلێك ڕاهاتووە، ئەم جارەش لە رێگەی قەیرانی دیكەی ناوچەیی، سەرچاوە ماڵی و ئابوورییەكانی ئێرانیان گرتووەتە دەست و لە خزمەت پەروارتر كردنی هەر چی زۆرتری خۆیان دەخەنە كار.

ئەوەی ماوە باسی بكەین ئەوەیە كە هەروەها كە چەندین بار جەختمان كردووەتەوە كۆمەڵەی شۆڕشگێڕی زەحمەتكێشانی كوردستانی ئێران ئەمجارەش لە سەر پێویستی یەكگرتوویی هەرچی زۆرتری هێزە راستەقینە دێمۆكراسیخوازەكان پێداگری دەكات و سەرەڕای جەخت كردنەوە لە سەر گۆڕینی رژیمی سیاسی ئێران وەكوو پێش مەرجی هەر جۆرە ئاڵوگۆڕێكی قووڵ و پایەدار لە پێناو دێمۆكراسی و ئاسایشی ئابووری و دادپەروەری كۆمەڵایەتی لە ئێران، لە هەموو هێزە ئازادیخوازەكان داواكارە دەنگی خۆیان بەشێوەیەكی روون‌و ئاشكراو بێننە گۆڕێ‌و داخوازییەكانی خەڵك لەوانە كۆتایی هێنان بە ئیعدامەكان، كۆتایی هێنان بە دۆخی ئەمنییەتی لە هەموو ناوچەكانی ئێران و بە تایبەت لە كوردستان، ئازادی بڵاوكراوەكان و پێكهێنانی ئەحزاب و یەكیەتییە كرێكارییەكان و دامەزراوە مەدەنییەكان، كۆتایی هێنان بە هەڵاواردنی جینسیەتی، مەزهەبی و نەتەوەیی و هەروەها لابردنی نیزارەتی ئیستیسوابی و بەربەستەكانی دیكەی سەر رێگەی هەڵبژاردنی ئازاد لە ئێراندا كە لە درووشمە یەكگرتوووەكانی هەموو ئوپۆزیسیۆنی ئێرانە، بەرزتر و بەرزتر كەنەوە. كۆمەڵەی شۆڕشگێڕی زەحمەتكێشانی كوردستانی ئێران لە هەمانكاتدا جەخت دەكاتەوە لە سەر پێویستی یەكگرتوویی بەرینی هێز و حیزبە سیاسیەكانی كوردستان بە ئەركێكی گرنگی سەردەمی هەنووكەیی دەزانێت.

دەفتەری سیاسی كۆمەڵەی شۆڕشگێڕی زەحمەتكێشانی كوردستانی ئێران
17ی خاكەلێوەی 1394 بەرانبەر بە 6ی ئاپریلی 2015



AM:10:28:08/04/2015




ئه‌م بابه‌ته 1124 جار خوێنراوه‌ته‌وه‌‌


زۆرترین خوێنراو‌