خوارووی کوردستان و نەورووز

نویساین: فازڵ وەلیان


نەورووز هێماسە. نەورووز سومبولە. نەورووز ناسنامەسە. نەورووز سیاسەتە. نەورووز دروشم و پێناسەس ئڕا نەتەوەییگ ک خوەی وە خاوەن ئەو فەرهەنگ و کولتوورە بزانێد.


نەورووز ئیرەنگە وە پانتاییگ و وەروڵاوییگ فەرتر لە ڕێژەی نزیک وە ٣٠٠ ملوین کەس ڕێز و ڕەسم ئڕای گیریەید. بەڵام ئەو جیاوازییە ک کورد و نەورووز لە نەورووز و نەتەوەیل تر جیاوە کەید ئیەسە ک کورد وە دریژای میژوو ئڕا ڕاگردن و پاراستن نەورووز خوین پیشکەش کردییە.

نەورووز لە لای کورد مینێدە شەرەف، مینێدە نامووس، مینێدە وێژدان و میژوو. نەورووز تەنیا و تەنیا یەی ڕەسم سەر ساڵ و هەڵپەڕکە و ڕێوڕەسمیگ پەتی نییە. نەورووز کات سەرهەڵداین و کریاین و وابین گوڵ و شکووفەی ئازادی و سەربەرزی کوردە؛ ک ئییە لە لای ئەو نەتەوەگان ئی جوورە ماناییگ نەیرێد.


بەشەیل خوارین کوردستان ک بریتیین لە ئوستانەیل کرماشان و ئیلام و لوڕستان و بەشیگ لە هەمەدان و بەشیگ لە خووزستان، ک شارەیلیگ گەوراییش جوور شائاوا، کەنگەوەر، خوڕماوا، ئیلام، دەڕەشار، ئەسەدئاوا، قەسر، کرماشان و شوونەیل فەرەی تر؛ پانتاییگ فەرە لە کوردستان وە خوەی هەڵ واسییە و بوودن و تویەنێد ک ڕووڵ گەوراییگ لە بانان کوردستان داشتوودن؛ هەر ئەو جوورە ک لە مێژووییش ئی ناوچەیەیلە کارگەری و شوون پی خوەیان داشتنە و بینەسە خاوەن لاپەڕەیل فەرەییگ و تووماری کردنەسە ناو خوەیان. ناوچەیل خوارین لە ناو مێژوو هەمیشە یەکیگ لە شوونە گەوراگان و پایتەخت دەسەڵاتداری فرەییگ لە هکوومەتەگان بیە هەر چەن ئەو ناوچەیەیلە چەندین جار لە گەرد خاک یەکسان بینە و خراو بینە و دوارە لە نوو بینەسە شار، وەڵێم هەر ئیسەیش بەش گەورای کوردییە لە خوەرهەڵات کوردستان، هەر چەن فرە کەس وە سەر ئەی بڕواسە ک بەشەیل خوارین کوردستان و مەردمەگەی لە ناو پڕوسەی کوردایەتی لە 100 ساڵ پێشەوە تا ئیسە بەشداری نەکردنە و لە هیور کوردایەتی دویروە کەفتنە و بڕیگ جاریش کرماشان وە کەرکووک بانان خوەرهەڵات کوردستان وە لی ناو بەن بێ ئەوەی کێ بویشن مەمەڕ و ڕیشەی ئەی کێشە ها لە کوورە و جوانەیل ئیسەی ناوچەیل لەکستان و لوڕستان و فەیلی و کەڵهوڕ و بیلەوار و سنجاوی چە توان، وە پیم خاس بی لە ئەی نویسریایە چاویگ بخەیمنە ڕیشەی ئەی دویرەوکەفتەن خەڵک ناوچەگە لە کوردایەتی و هویر و بڕوای ئیسەی خەڵک هەمیشە کورد خوارووی کوردستان

.

کاتیگ ک توایمن لە سەر مێژوو قسە بکەیمن؛ ناوچەیل خوارین کوردستان ، هەر لە کامێرانەو بگرە هەتا ئەو شوونەیلە ک کوردن و خوەیان وە کورد ناسنن؛ هەمیشە جوور یەی ناوچەی پان و بەرین و گەورای کوردەواری ناس کریاس و کریەید هەر لە سەردەم ئێمپراتووری ماد ک کورد بینە لە زیاتر لە ٢٧٠٠ ساڵ لەیەو وەر دامەزریاس تا ئیسە ئی ناوچەیلە و خەڵکەگەی لە تەمام مێژوو خوەیان کورد بینە و گەورا شار کوردی وە هساو هاتنە، لە سەردەم هێرش ئەرەب ئەڕا بەرژەوەندی ئیدئولوژی ئسلامی زوورم شەڕەگان لە ناوچەیەیلیگ ڕوی داس ک سەر وە زاراوە و فەرهەنگ خوارین کوردستان بیە، جوور شەڕ نەهاوەن، شەڕ نەهرەوان و شەڕ جەلەولا. شارەگانی جوور فریەیگ لە شاریەیل تر و بگرە فەرەتریش لە گەرد خاک یەکسان بی و مەردەمەگەی دانە شاخ و کویە و بڕیگیانیش چینە وەرەو شوونەیل تر. دویاتر دەسەڵاتداری ئال هەسەنەویە کردن، خەڵکیگ ک لە ناو کەش و کوی بین خووراگیری و موقاومەت فریەگ لە بەرابەر ئسلام کردن و هەر ئایین و هویر خوەیان نەگووڕین وەڵێم دویاتر ئەرا ئەوەی کێ باج ساڵانە نییەن؛ خوەیان و موسەلمان ناسانن و لە قەرن سێیەم لە گەرد سەرهەڵداین شاخوەشین لە لوڕسان ئایین یاری فریەگ وە خەڵک ئەو ناوچە وەتایوەت کرماشان چین وەرەو ئایین یاری وە هوو ئەوەی کێ کلتوور و فەرهەنگ خۆیان لە ناو ئایین یاری دوینیان، هەر لە ئەی هویرئایینەو جیاوازیە بیە هوو دوودەسەیی لە بەین خەڵک کورد و ئەی جیاوازییە ماوییگ فرە زەق بی ک دەسەڵاتداری سەفەویە ئایین رەسمی وڵات و شیعە زانست و چیە شەڕیگ گەورا وە گەرد ئوسمانی ک ئایین سوننە داشتن و فرەیگ لە خەڵک کوردستان وە ئایین سوننە بڕوا داشتن و هەر ئەی هویر بیە هووی ئەوێگ کورد ئەو سەردەمە پشتیوانی ئوسمانی بکیەد، دویای چەن ساڵ شەڕکوردستان بیە دوو لەتەو هەرچەن قسەی فرەیگ هەس ک گەورایەیل کورد لە ئەو سەردەمە یەکەم جار هاتنە گەرد شا ئسمائیل سەفەوی قسە کردنە نەتواسنە هاوپشتی ئەو بکەن وەلیم کەسایەتیەیل شا ئسمائیل وە هوو جیاوازی ئایین ئەوان قەبوول نەکردنەو گشتیان زیندانی کردنە و ئەیە بیسە هوو هاوپشتی کردن کوردیەیل لە دویای ئەوێک کوردستان لە قەرارداد زەهاو لە بین ئێران و ئوسمانی بیە دوو پارچە خوەرهەڵات ک لە ناو نەخشەی جوغرافیای ئێران بین خوەی وە هوو هویر ئایینی و زاراوە جیاواز دوو بەش بی هەر چەن ئەی جیاوازیە فرە زەق نەیو، لە سەردەم فەتەلی خان قاجاریش موهەممەد میرزای کوری کردە دەسەڵاتدار کرماشان تا ئەو شارە فرەتر وەرو ناوەند و مەرکەز نزیکو بکید ، لە ماوەی دەسەڵاتداری رەزا خانیش لە گەرد جیاکردنەوەی ئوستانی و جیاکردن کوردستان لە کرماشان ئی جیاوازیە و دویرەوە کەفتنە فرەوتر بی و یەکیگ لە مەمەڕیل دەوڵەت بین خوەرهەڵات کوردستان ک فرە کەم لە سەر قسە کریید و فرەیش گرینگە دەس وڵاتەیل ئستئمارگەر ئنگلیس و رووسیەش لە ماوەی هاتن ئەوان وە خاک ئێران ئەی وڵاتە کردیونە دوو بەشەو بەش باشوور یا جنوب وە ژێر دەسەڵات ئنگلیس بی و بەش باکوور یا شمالیش لە ژێر دەسەڵات رووسیە بی و هەر ئەی دەسەڵاتداری و کارگەری لە خوەرهەڵات کوردستانیش رو دادینى بەش باشوور خوەرهەڵات کوردستان جوور کرماشان ئیلام و لورسان لە ژێر کارگەری ئنگلیس بی و لە سنە تا ورمیش لە ژێر کارگەری رووسیە و ئیە خوی بیە هووی جیایی فکری خەڵکی کورد لە خوەرهەڵات کوردستان بەش باشوور فرەتر لە گەرد مەرکەز بین ەو ئیە بیە هوو ئەوێک باوەر بکەن وەلیم لە باکوور و ناوەند کوردستان مەردم هویریگ نەتەویی یا مللی داشتن و خۆیان وەکوو نەتەوە کورد ناس کریان و چالاکی سیاسیان لە بەرژوەندی نەتەوەی کوردی بی نە نەتەوەی ئێرانی ، هەر ئەی هویر قەلەت خەڵک کرماشان و ناوچە باشوور خوەرهەڵات بیە هوو ئەوەگ لە راپەرین و ئینقلاب ساڵ57 هەتاوی گەلان ئێران لە گەرد چالاکی فرە و چالاکیەیل فرە گەورا لە خزمەت نەتەوەی کورد نەود و هاوریی نەتەوەی ئێرانی بکیەد و کەمتر کوردیگ لە باشوور خوەرهەڵات لە گەرد هیزبە کوردییەگان هاوری بین و چالاکی کردن وەلیم خەڵک کرماشان هویچ کات کورد بوین خۆیان لە هویر نەوەردنە و هەمیشە خۆیان و شارەگەیان و کورد ناس کردنە و ئیسەیش خۆیان و کورد زانن و شوناس و هویەت خوەیان لە ناو کورد بوین خوەیان زانن و ئەی هویر و بڕوای خوەیانە لە نەورووز 2715ی کوردی لە رووژ چوارشەممە سوری وە گەرد شوئارداین وە زوان کوردی کە زوان داڵگی خوەیانە خوازیار ئازادی نەتەوەگەیان بینە و هەر ئەیە بیەسە هوو ئەوەیگ ک دەیان کەس وە خەڵک کرماشان و ئیلام و شارەیل دەورو وەریان لە لایەن دەسەڵات توتالیتر ئسلامی باڵبەس بکریەن .


لە دویای ئەی نویسراوە جی دیرید پیروزبایی نەورۆز ٢٧١٥ی کوردی وە گشت خەڵکەیل جەهان و وەتایوەتی نەتەوەی کورد بکریەی و پیرووزباییگ تایوەتی وە خەڵک باشوور خوەرهەڵات کوردستان یان بەش خوارین کوردستان ئەڕا سەرکەفتنەگەیان لە نەورووز ٢٧١٥ی کوردی بکەم.


AM:08:17:01/04/2015




ئه‌م بابه‌ته 1186 جار خوێنراوه‌ته‌وه‌‌


زۆرترین خوێنراو‌