راگەیاندنی كومیتەی ناوەندیی كۆمەڵە بە بۆنەی 8 مارس رۆژی جیهانی ژن

ده قی راگه یاندنی كۆمەڵە بە بۆنەی 8 مارس رۆژی جیهانی ژن لێرە دا بخوێینەوە



8ی مارس كە بە رۆژی جیهانی ژنان ناسراوە، وە بیرهێنەرەوەی خەبات و تێكۆشان و قوربانی ژنانی ئازاو بوێرە، كە بۆ بە دەست هێنانی یەكسانی و مافی بەرابەر و دانی دەرفەتی كار، رەخساندنی ژینگەیەكی سالم و ئازادانە، هاتنە مەیدان و داوای كۆتاهێنانیان بە هەمو جۆرە هەڵاوا ردنێكیان كردە ئامانجی كارو خەباتی خۆیان. 8ی مارس رۆژی رێز گرتن لە مێژووییەكی پرشنگدارو پەیمان تازەكردنەوەی ملیۆنان ژن و پیاوی بەرابەریخوازە لە گەڵ یەكتر بۆ وەدیهاتنی ئامانج و مافە زەوتكراوەكانی ژنان.

لە كۆمەڵگای ئەمڕۆی بەشەریدا سەرەڕای هەموو ئەو پێشكەوتنانەی كە كۆمەڵگای ئینسانی بە دەستی هێناوە و رۆژ لە دوای رۆژ لە گەشەو پەرەسەندندایە، بەڵام دەبینین هەتا ئیستاش نابەرابەری و هەڵاواردن ماوەو ژنان بە بیانووی جۆراوجۆر هەم مافەكانیان پێشێل دەكرێ‌ هەم بەربەستەكانی بەردەمیان لە بوارە جۆراوجۆرەكاندا رۆژ لە دوای رۆژ زیاتر دەكات، لە بەرابەردا بزوتنەوەو رەوتی خەباتی ژنانیش لە گەڵ ئەم هەموو داخران و بێ مافیە رۆژ لە دوای رۆژ لە پەرەسەندندایە، وشیاری سیاسیی و كۆمەڵایەتی ژنان بۆ چەسپاندن و لە قوڕگ دەرهێنانی مافەكانیان لە كۆمەڵگەی پیاوسالاریدا روو لە گەشەترو هیوابەخشترە.

لە سەروبەندی 8ی مارسدا ئەگەر چاوێك بە بارودۆخی ژنانی كورد بخشێنین، دەبینین ژنانی كورد چۆن رووسورانە بەرامبەر ئەو هەموو لەمپەرو دواكەوتووییانە وەستاونەتەوەو نەك تەنیا لە پێناو مافی خۆیان وەك ژن، بەڵكو لە بەرگری كردن لە پاراستنی خاك و نیشتماندا بە كردەوە لە مەیداندان و قوربانی كەمیان نەداوە.

لە گەڵ هاتنی هێزێكی دڕندەو وەحشی وەك داعش كە رووی لە باشوورو رۆژئاوای كوردستان كرد، بینیمان بە هەموو دڕندەیی خەلافەتی ئیسلامی نەك ژنانی خەباتكاری نەترساند بەڵكوو ژنان هاوشانی پیاوان لە رووبەڕووبوونەوەی داعشدا دەورێكی كاراو بەرچاویان گێڕا، هێزو ئیرادەو توانای ژنان لەم مەیدانەشدا جارێكیتر نیشان درا كە لە پیاوان كەمتر نین. لە بەرامبەر كردەوەكانی ئەواندا بینیمان ژنان و كچانی كورد چۆن رووبەڕوویان بوونەوەو قارەمانی و خۆڕاگری ئەوان بووە مایەی روسووری كوردو بزوتنەوە ئازادیخوازیەكەی، ژنانی كورد بە بەرەنگاربوونەوەی ئەم هێزە كۆنەپەرەست و وەحشیگەریە بووە جێگای سەرسوڕمانی جیهان و لە لاپەرەی یەكەمی میدیاكاندا دەنگی دایەوە، هەر چەند بە داخەوە كەم نەبوون ئەو ژنانەش بە تایبەت لە ناوچەی شنگاڵ و شوێنەكانی دیكەش لە لایەن داعشەوە گیران و وەك كۆیلە مامەلەیان لە گەڵ كردن، بەشێكیان بێڕحمانە كوژران یا بە پێی بیری ژەنگاوی داعش فرۆشران و باقییەكەشیان ئێستاش لە ژێر دەستی دەسەڵاتە دژە ژن و دژە مرۆڤانەی داعشدان و بە شێوەی جۆراوجۆر رۆژانە ئازار دەدرێن و دەچەوسێنەوەو چارەنوسێكی نادیاریان هەیە.

لە ئێران و كوردستانی رۆژهەڵاتی ژێر دەسەڵاتی كۆماری ئیسلامی ئێران، ئەگەرچی ساڵەهایە ئەم رژیمە دژە ژنە لە هەموو هەوڵێكی درێغی نەكردووە بۆ پەراوێز خستن و سوكایەتی بە ژنان و كچان، بە بیانوی دەیان یاسای دواكەوتووانە، دژە ئینسانی و دژە ژن كۆمەڵگای بەرەو داخران و دواكەوتوویی بردووە، بەڵام لە بەرامبەریشدا ساڵی رابردوو ئێمە شاهیدی هەڵسوڕان و گەشەی بزوتنەوەی ژنان بووین لە كوردستانی رۆژهەڵات. بەشداری بەرینی ژنان لە خۆپیشاندانە جەماوەرییەكانی خەڵك بۆ پشتوانی لە كۆبانێ‌ و شنگال دژ بە رێكخراوی داعش، بەرێوەبردنی دەیان كەمپیەن و هەڵمەتی كۆكردنەوەی یارمەتی بە بەشداری راستەقینەی ژنان لەو پێناوەدا، زیندوو راگرتن و بەشداری كارا لە ئەنجومەنە ئەدەبی و مەدەنیەكان، بەشداری لە چالاكیە ژینگەیی و هونەریەكان و چەندین بواری دیكە ئەوە نیشان دەدات كە ژنان سەرەڕای هەموو بەربەست و فشارەكان كۆڵ نادەن و بۆ بە دەست هێنانی مافە زەوت كراوەكانیان و سەلماندنیان بۆ ئەوەی كە ئەوانیش بەشێكی راستەقینەی رزگاری و بنیاتنانی كۆمەڵگایەكی پێشكەوتوون، لە خەباتی بەردەوامدان.

ئێمە لە 8ی مارس رۆژی جیهانی ژناندا ، جارێكیتر پێداگری لە سەر سیاسەتەكانی كۆمەڵەی شۆڕشگێڕی زەحمەتكێشانی كوردستانی ئێران سەبارەت بە بەرگری و مافی ژنان، بەشداری چالاكانەو بەرینی ئەوان لە مەیدانی سیاسی ، كۆمەڵایەتی ، ئابووری و مەدەنی و بە دەست هێنانی رۆڵ و پێگەی رەوا و شیاوی ئەواندا دەكەینەوە.

كۆمەڵە كە پێشرەو، رچەشكێن و ئاڵاهەڵگری رزگاری ژنان لە كوردستان بووە، توانی نەسڵێك لە ژنانی خۆڕاگر ، شۆڕشگێر و كۆڵنەدەر لە نێو ریزەكانی خۆیدا كۆبكاتەوە. نەسڵێك كە بە قارەمانێتی و گیانفیدایی و خۆڕاگری لە گەلێك خۆپیشاندانی گەورەو بچووكدا، لە بەشداری و دروست كردنی شانەی ژنانی چەكدار و بەشداری لەخەباتی چەكدارانە، لە ئەشكەنجەی ناو زیندان و لە بەرامبەر سێدارەدا سەربەرزو رووسوور مانەوەو بۆ هەتا هەتایەش مێژووی كۆمەڵەو بزوتنەوەی كوردستان شانازیان پێوە دەكات.

ژنانی كوردو بزوتنەوەكەیان پشت ئەستوور بوون بە ئەم ئەرزش و مێژووە رووسوورانە، لە گەڵ ئەو ئاڵ و گۆڕە گەورە كۆمەڵایەتی و ئەو بزوتنەوە سیاسیە كە دژی كۆماری ئیسلامی لە بەردەوامبووندایە دەتوانن كاری گەورەو بنیاتنەر بۆ وە دەست هێنانی مافە سیاسی، ئابووری و كۆمەڵایەتی خۆیان بكەن.

كۆمیتەی ناوەندی كۆمەڵە لەم رۆژەدا وێڕای سڵاو ناردن بۆ هەموو ژنان و كچانی خەباتكارو شۆڕشگێڕ، سڵاو دەنێرین بۆ ئەو دایكانەی كە باشترین و ئازاترین كچەكانی خۆیان پێشكەش بە كاروانی شەهیدانی كوردستان كرد، سڵاو دەنێرین بۆ ئەو ژنانەی كە ئێستا لە زیندانەكانی كۆماری ئیسلامیدا لە ژێر زۆرترین ئەشكەنجەو هەڕەشەدا، لەسەر داخوازییەكانی خۆیان سوورن.

ریَِز دەگرین لە خەبات و ئازایەتی ئەو ژنانەی كە شێلگێرانە لە رێكخستنە نهێنیەكان لە كارو چالاكی بەردەوامن. لە لایەكی دیكەشەوە كۆمەڵە وێرای دوپاتكردنەوەی پشتیوانی خۆی لە خەباتی ژنانی ئێران و كوردستان، دەستخۆشی و پشتیوانی تایبەتی خۆی بۆ كۆمەڵەی ژنانی رۆژهەڵات دەردەبڕێ‌ كە لە چەند ساڵی رابردوودا وێرای بەشداری راستەقینە لە مەیدانی سیاسی و پێشمەرگانە، لە هیچ هەوڵێك و دەرفەتێك بۆ پشتیوانی لە كارو خەباتی ژنان درێغیان نەكردووەو خۆیان بەشێك بوون لەو خەباتكارانەی رێ رزگاری و بەرابەری ژن و پیاو.

سەركەوێ‌ خەباتی ژنان وپیاوانی بەرابەریخواز بۆ كۆمەڵگایەكی یەكسان
بروخێ‌ رژیمی دژە ژنی كۆماری ئیسلامی
كۆمیتەی ناوەندی كۆمەڵە شۆڕشگێڕی زەحمەتكێشانی كوردستانی ئێران
8/ مارسی 2015
17/ رەشەممەی 1393



AM:07:15:08/03/2015




ئه‌م بابه‌ته 1265 جار خوێنراوه‌ته‌وه‌‌


زۆرترین خوێنراو‌