پەیامی كۆمیتەی ناوەندی كۆمەڵە بە بۆنەی 26ی رێبەندان رۆژی كۆمەڵە




جەماوەری خۆڕاگری كوردستان!
كرێكاران و زەحمەتكێشان!
هاوڕێیانی كۆمەڵە!


ساڵێكی دیكەش بە سەر تەمەنی پڕ لە شانازی كۆمەڵە تێپەڕی، بە مانایەكی دیكە ساڵێكی دیكە بە ئەزموونی شۆڕشگێڕانەی حیزبێكی سیاسی زیاد بوو كە ئەركێكی گرینگ و مێژوویی لە سەر شانە ئەویش رزگاری نەتەوەیی و هاوكات دادپەروەری واتە پارێزگاری لە مافی چەوساوەكان و بەشخوراوانی كۆمەڵگای كوردستانە. بەردەوامی چالاكی و خەباتی كۆمەڵە خۆی لە خۆیدا ئاماژەیەكە بە بەردەوامی بزووتنەوەی رزگاریخوازانەی كوردستان. بەردەوامی‌و زیندوویی ئاواتی خەڵكێكی بەشخوراوە كە بۆ رزگاری نەتەوەیی و بە دەستهێنانی مافی دیاری كردنی چارەنووسی خۆی تێدەكۆشی‌و كۆل نادا‌و شكڵەكانی خەباتی نیزامی و سیاسی و مەدەنی، هەرجارە‌و بە جۆرێك كە لە گەڵ بار‌ودۆخەكە گونجاوتر بێت، دەگۆڕێ‌ و شۆڕشەكەی خۆی پێ دەستەبەر و درێژە دەدا.

خەڵكی خەباتكاری كوردستان!
هاوڕێیان!

با ئەمساڵیش بە رەسمی ساڵانی رابردوو لە سەرەتای ئەم پەیامە رێز بگرین لە گیانی پاكی هاوڕێیانی شەهیدمان كە بە خوێنی خۆیان و پێشكەشكردنی گیانی ئازیزیان درێژەی رێگا پڕ لە شانازییەكەی كۆمەڵەیان مسۆگەر كرد. سڵاو دەنێرین بۆ بنەماڵەكانیان و رێز لە قوربانیدان و فیداكاریەكانیان دەگرین. با لێرەوە و لە رێگای ئەم پەیامەوە سڵاو و رێزی خۆمان ئاراستەی هاوڕێیانی بەندكراو بكەین كە لە ژێر زەبرو گوشاری دیكتاتۆری ئایینی كۆماری ئیسلامی بە خۆڕاگرییەكی بێوێنە، مەشغەڵی بزووتنەوەكەیان زیندوو بەرز راگرتووە. سڵاو‌ورێزی خۆمان پێشكەش بە تێكۆشەرانی رواڵەت داپۆشراوی خەباتی نهێنی شارو دێهاتەكانی كوردستان دەكەین كە ئەركی حیزبی خۆیان لە ژێر چەكمەی یەكێك لە دڕندەترین دیكتاتۆرییەكانی ئەم سەردەمە، بەوپەڕی دڵسۆزییەوە بەرێوە دەبن.

سڵاو بۆ پێشمەرگەكانی كۆمەڵە كە لە ئامادەكاری بەردەوامن تا هەر كات پێویست بوو وەك باڵی چەكداری بزووتنەوەكە بە ئەركی پشتیوانی لە خەباتی سیاسی خەڵك و بەرگری لە خاكی كوردستان هەستن‌و ئەگەریش پێویست بێ‌ گیانی خۆیان لە پێناو ئەم ئەركە پیرۆزە فیدا كەن. لێرەوەش و بەو بۆنەوە سەری نەوازش و ئیحترام دانەوێنین بۆ شەهیدی نەمر یەكەمین پێشمەرگەی كۆمەڵە سەعیدی موعینی ناسراو بە خانە.

لێرەدا بە تایبەت جێگای خۆیەتی یادی هاوڕێی رابەر و دامەزرێنەر شەهید حەمە حوسێنی كەریمی بكەین كە بە فیداكردنی گیانی خۆی لە پێشەوەی خەڵكی راپەڕی و لە دژی رژیمی پاشایەتی، زەنگی دەستپێكی چالاكی ئاشكرای كۆمەڵەی بۆ یەكەمین جار پڕ بە خاكی كوردستان لێدا. بێگومان یاد و بیروەری كاك حەمەحسێن ئەو رێبەرە خۆشەویستەی كۆمەڵەو كۆمەڵانی خەڵكی كوردستان بۆ هەمیشە لە دڵماندا زیندووە.

جێی خۆیەتی ئاماژە بەوە بكەین ئەمساڵ لە كات‌وساتێكدا بە پێشوازی رۆژی كۆمەڵە دەچین كە گەلی كورد لە كوردستانی باشوور لە بەرەیەكی جەنگ بە درێژایی یەك هەزار كیلۆمەتر بەرەنگاری یەكێك لە توندڕەوترین گروپە تێرۆریستەكانی ئیسلامی بۆتەوە. لە كاتێكدا هەموو رۆژهەڵاتی ناوەڕاست لە ناو ئاگری تووندڕەوی سیاسی و ئایینی و فیرقەیەی دەسووتێ‌ و پانتاییەكی گەورە لەو ناوچەیە هەر لە سوورییە و عێراقەوە تا لیبی بۆتە مەیدانی رمبازێن گروپی بونیادگەرای خەلافەتی ئیسلامی. لە كاتێكدا شەڕی ئاینی و لە پێش هەموویان شەڕی شیعە و سوننی بۆتە هۆی ماڵوێرانی میلیۆنان كەس، لە كاتێكدا رەشەكوژی بێ‌ بە زەییانە لە منداڵا‌و پەككەوتەو خەڵكی بێ‌تاوان لە كۆڵان‌و شەقام بۆتە شكڵی بنەڕەتی بەربەرەكانێی ئائیینەكان لە گەڵا یەكتر، بە كورتی لە كاتی زیندوو كردنەوەی كوشتارەكانی سەدەكانی ناوەڕاستدا، كورد لە بەربەرەكانێ‌ لە گەڵا ئەم دیاردە ترسناكە لە بری هەموو كومەڵگای نێونەتەوەیی بە ئاڵای عیلمانییەت و بەیەكەوە ژیان دەجەنگن.

چۆنییەتی هەڵسوكەوتی كورد لە گەڵا كێشە ئائینییەكان و خۆڕاگریەك كە لە بەرامبەر هێرشی داعش دەیكات خۆشەویستی و هۆگرێیەكی تایبەتی بۆ كورد لە ناو ڕای گشتی جیهانی دروست كردوە كە بێگومان فاكتەریكی زۆر پۆزێتیڤە و پشتیوانییەكی مەعنەوی باش بۆ كەیسی كورد دروست دەكا. بەڵام هێرشی داعش بۆ سەر خاكی كوردستان لە هەمان كات مەترسی و هەڕەشەیەكی گەورەشی بۆ كیانی كورد و تەنانەت مەوجودییەتی كورد دروست كرد كە هێشتا هەر بەردەوامە و پێویستی بە یەكگرتوویەكی گەورەی نەتەوەیی كوردە بۆ بەرپەرچدانەوەی ئەم نیگەرانیە. بە راشكاویەوە دەتوانین بڵێین ئەگەر كورد لە بری هەموو شارستانییەت شەڕی داعش دەكا، داعشیش لە بری هەموو دوژمنانی كورد و مافەكانی شەڕی كورد دەكا. بۆیە هەر لێرەوە سڵاو و رێزی هەموو ریزەكانی كۆمەڵە ئاراستەی هێزی پێشمەرگەی كوردستان دەكەین كە بە فیداكارییەكی بێوێنە لە بەرامبەر دوژمنێكی پڕچەك و بێڕەحم‌و وەحشی راوەستاون و پارێزگاری لە دەسكەوتەكانی گەلی كورد دەكەن. سەری رێزیش بۆ شەهیدانی رووبەڕووبونەوەی داعش دادەنوێنین و سەرەخۆشی لە بنەماڵەكانیان دەكەین.

یەكگرتوویی هێزە سیاسیەكانی كوردستانی باشوور لەم هەلومەرجەدا گرینگییەكی یەكجار زۆری هەیە. كۆمەڵە هەر لە رۆژانی هەوەڵی هێرشی داعش بۆ سەر خاكی كوردستان لە سەر ئەو باوەڕە بووە‌و هەیە كە ئەم شەڕە تەنیا كێشەی كوردستانی باشوور نیە و بەرپرسیارەتییەكی زۆر گەورە دەكەوێتە سەر شانی هەموو گەلی كورد لە هەموو پارچەكانی كوردستان بۆیەش كۆمەڵە هەر زۆر زوو ئامادەیی خۆی بۆ بەشداری لە شەڕ دژی داعش و بەرگری لە كوردستان راگەیاند.

مەترسییەكی دیكەی هێرشی داعش بۆ سەر خاكی كوردستان دروست كردنی بیانوویە بۆ حزووری زۆرتری كۆماری ئیسلامی لە خاكی كوردستان. كۆماری ئیسلامی نەك هەر خۆی وەك نەیارێكی سوێند خواردوی كیانی سیاسی كورد، بەڵكوو وەك هێزیك كە لە پشت رێكخستنی میلیشیای شیعەیە دەبێتە بەربەستێكی گەورەی سەر رێگای خەباتی كورد بۆ دەستەبەر كردنی مافەكانی لە كوردستانی باشوور. كۆمەڵە پێی وایە مەسڵەحەتە تاكتیكییەكانی شەڕی داعش نابێ‌ ببێتە هۆی چاونوقاندن لە مەترسییەكانی دواڕۆژی كۆماری ئیسلامی لە لایەن هێزە سیاسیەكانی كوردستانی باشوور.
كۆمەڵە هەروەها بە تەواوی مانا پشتیوانی دەكا لە مافی كوردستانی باشوور بۆ سەر بەخۆیی و پێكهێنانی دەوڵەتێكی نەتەوەیی لەو بەشە لە كوردستان. دیارە ئێمە لە سەر ئەو باوەڕەین كە ئەوە ئەركی خەڵكی كوردستانە بە گشتی و سەركردایەتی و دام و دەزگا یاسای و شەرعییەكانی ئەم هەرێمەیە كات و هەل‌ومەرجی گونجاو بۆ بە كردەوە دەرهێنانی ئەم مافە هەڵبژێرن.

خەڵكی خەباتكاری كوردستان!

بە لەبەر چاوگرتنی ئەم هەل‌ومەرجە تایبەتیە بە بەراوردی دۆخی كورد بە گشتی و دۆخی سیاسی ئێران و كوردستانی رۆژهەڵات بە تایبەت لەم دواییانەدا و لە یەك ساڵی رابردوو، چاوەڕوانی و تەوەقوعاتێكی تایبەتی لە لایەن جەماوەری خەڵكی كوردستان لەم پارچەیە لە هێزە سیاسییەكان و گشت چالاكانی سیاسی و مەدەنی هێناوەتە گۆڕێ‌ كە ئەركی مێژوویی هەموومانە دەبێ وڵامی شیاوی خۆی پێبدرێتەوە. جێگای خۆیەتی ئەگەر لە پێشەكی ئەم باسەی ئێستا ئاماژە بەوە بكەین كە كوردستانی رۆژهەڵات دەورێكی مێژوویی و گرینگی لە تەڤگەری كورد بە گشتی و لە هەموو پارچەكان هەبووە، لە سەر بنەمای پێشینیەكی ئاوادایە كە ئەو چاوەڕوانیە لە ئێمە دروست دەبێ‌.

لە بیرمان نەچێتەوە كوردستانی بوون بە تەنیا پێناسەی ئێمە نیە، لە دەرەوەی ئیرادەی ئێمە و بە حوكمی روداوەكانی مێژوو و دابەشكرانی كوردستان لە چوار پارچەدا و لە چوار بار‌ودۆخی سیاسی جیاوازدا پێناسەیەكی دولایەنەی نەك هەر بۆ حیزبێكی سیاسی بگرە تەنانەت بۆ هەر تاكێكی چالاكی كوردیش دیاریكردوە كە ناچاری دەكا بیر لە ستراتێژییەكی تایبەت بكاتەوە كە تەنیا هەڵقوڵاوی پێناسەی كوردستانی بوونی بە گشتی نییە و بەڵكو پێناسەی پارچەكەشی كاری ئەساسی لە داڕشتنی دەكا. كوردستانی رۆژهەڵات دەبێ‌ ستراتێژی خۆی هەبێ‌. مەبەست لێرەدا تەنیا ستراتێژی حیزبی نیە، مەبەست ستراتێژییەكی نەتەوەییە.

فەلسەفەی سەرەكی پێشنیاری گرتنی كۆنگرەی رۆژهەڵاتیش كە كۆمەڵەی شۆڕشگێڕ پێشنیاری دەكا بریتیە لە وەڕێ‌ خستنی دیالۆگێك بۆ داڕشتنی ئیستراتێژی نەتەوەیی كە هەڵقوڵاوی بارودۆخی سیاسی ئێرانە لە هەمان كاتدا كە لە بەستێنی دۆخی كورد بە گشتی داڕێژراوە. چالاكانی سیاسی و مەدەنی و حیزبە سیاسیەكان لە خەباتی كورد بۆ مافە رەواكانی لە هەر كوێی كوردستان بێ‌ دەوری گەورەیان گێڕاوە و دەیگێڕن و نابێ‌ لێی پاشگەز بنەوە. هەر لە باشورەوە تا باكوور و تا رۆژئاوا، لە شەڕ لە گەڵا تێرۆریستانی داعش تا خەبات بۆ ئازادی لە پارچەكانی دیكەی كوردستان جێپێی‌و شوێن دەستی ئەوان دەبینین. كاتی ئەوە هاتووە كە تەكانێكی گەورەش بدەین بە رەوڕووی بزووتنەوەی كوردستانی رۆژهەڵات. بە بێ‌ گومان ئەم ئەركە لە هەمان كاتدا خزمەتێكی گەورەیە بە بزاڤی كورد لە هەموو پارچەكان و هیچ ناتەباییەكی لەگەڵا ئەركی كوردستانی بوونی نە تاك و نە هیچ حیزبێكی سیاسی نیە.

كۆماری ئیسلامی لە ناو كێشەی گەورەی سیاسی و ئابووری و كۆمەڵایەتی نوقم بووە. هەرچەند ئەم رژیمە هەوڵ دەدا بارودۆخی ناوچەكە و بە تایبەت شەڕی داعش و مەترسییەكی كە سەلەفییەتی تووندڕەوی سوننە بۆ سەر گەلانی ناوچەكە و كۆمەڵگای نێونەتەوەیی بە گشتی دروستی كردوە، بە قازانجی خۆی بقۆزێتەوە، بەڵام كەلێنە گەورەكانی وەزعی ناوخۆی پێ‌ ناشاردرێتەوە. تێپەڕینی زۆرتر لە ساڵێك بە سەر ماوەی سەركۆماری رووحانی ئەو گەشبینیە بێ‌ بنەمایەی بۆ ئاڵ‌وگۆڕی بەرچاو لە دۆخی سیاسی و كۆمەڵایەتی ئێران لە ناو بەشێك لە جەماوەر دروست ببوو بەسەر چووە و هیوا بە ئاڵ‌و گۆڕ و چاكسازی كزتر و كزتر بووە.

وەزعی ئابووری، رێژەی بێكاری و هەڵاوسان و پەرەسەندنی هەژاری گەیشتوەتە رادەیەك كە تەنانەت ئەگەر گەورەترین ئیمتیازاتیش لە دانوستانەكانی پێوەندیدار بە چەكی ناوك بەدەست بێت ناتوانێ‌ چارەسەری وەزعەكە بێت. ئەم دۆخە ئابوورییە تەنیا ئاكامی تەحریمەكانی نێونەتەویی نیە و بەرهەمی زۆرتر لە 35 ساڵا بەرێوەبەرییەكی ناكارامە و تاڵان و بڕَوی چینێكی دەسەڵاتداری ئاینییە كە جگە لە بەرژەوەندی خۆی و مانەوە لە سەر كورسی دەسەڵات هیچ شتێكی دیكەی بۆ گرینگ نیە. ئاكامەكانی ئەم دەسەڵاتداریە هەر بە زیانەكانی ناو كۆمەڵگا راناوەستێَت‌و كۆماری ئیسلامی بە حەقیقەت بە دوژمنی گەورەی ئازادییە سەرەتاییەكانی مرۆڤایەتی، كرێكاران، ژنان، گەلانی بندەستی ئێران ناسراوە، بەڵام ئێستا دەركەوتووە كە كۆماری ئیسلامی گەورەترین دوژمنی ژینگەی ئێرانیشە.

ورد بوونەوە لە سیاسەتەكانی كشت‌وكاڵا لە ئێران و كەڵك وەرگرتنی بێسنوور و نازانستیانە لە سەرچاوەكانی ئاوی ئەم وڵاتە، بە كورتی پەیڕەو كردنی سیاسەتی تاڵان، ئێرانی تووشی مەترسییەكی گەورە و ترسناكی ژینگەیی كردوە. ناڕەزایەتییەكانی خەڵكی ئێران بە كوردیشەوە قووڵا و پەنگخواردوە. ئەوەیە ئەو بەستێنەی رێگامان پێدەدا تا قۆڵی لێ‌ هەڵماڵین و تواناكانمان بخەینە سەریەك .

كۆمەڵە بە ئەركی مێژوویی خۆی دەزانێ‌ تا لەو رێگایە هەموو توانا‌و وزەی خۆی بخاتە كار بۆ هاوكاری و ئاڵ و گۆڕی بنەڕەتی لەو كۆمەڵگایە. بێگومان سەركەوتن هەر بۆ جەماوەری خەڵك و گەلانی ماف زەوتكراوی ئێرانە.

پیرۆزبێ 36 هەمین ساڵڕۆژی خەباتی ئاشكرای كۆمەڵە
بەرزوبەڕێزبێ یادی كاك حەمەحسێن كەریمی و هەموو گیانبەختكردووانی كۆمەڵە
كۆمیتەی ناوەندیی
كۆمەڵەی شۆڕشگێڕی زەحمەتكێشانی كوردستانی ئێران
25/ رێبەندانی/ 1393 هەتاوی



AM:07:46:19/02/2015




ئه‌م بابه‌ته 1111 جار خوێنراوه‌ته‌وه‌‌


زۆرترین خوێنراو‌