پرۆمتەكانی رۆژهەلات لە ورمێ ماشە لە چی دەگرن؟



راسان سوڵتانی

"تۆ ئە زانیت كه من قه د خۆم ناده م به ده سته وه
وه ك شمشێری سیسیلیان هه ڵواسراو به تاڵه موویه ك،
به سه ر تاج و ته ختیدا دێم و ده چم "
پرومته ی له به ند ترازاو، شیللی


لە مێژوو دا ئەو كاتانەی نائومێدی و ترس و بێدەنگی هەمبەر ژیان و مەرگ ، لای دەسەڵاتدارانەوە سەپێندراوە بە سەر خەڵكیداو و هەر رۆژه بۆ راگرتن و درێژەدانی دەسەڵاتی شوومی خۆیان هەر كەرەستەیەكی نامرۆییانە بە كار دێنن و بە پاوان خوازیی و سەركووت و گرتن و ئەشكەنجەو لە سێدارەدان بۆچاوترساندنی كۆمەڵگا و لە بۆ ورەدابەزاندنی ژنان و پیاوان هەدایان نەداوە، هەن ئەو كەڵە لاوانەی كە بەو چارە نووسەی كە دەسەڵات بۆ كۆمەڵگای حوكم دەكات رازی نابن و دەكەونە ئیعتیراز و هەستان، دژ بە داب و نەریتی یاسایی و سیاسی دەسەڵات رادەوەستن و دەبنە مەكۆی ئومێدی داهاتووی بێبەشان و زووڵم لێكراوەكان .

دەسەڵاتی كۆماری ئیسلامیش یەك لەو دەسەڵاتە دژه مرۆیی و درەندانەیە لە چەشنی دەسەڵاتی سەدەكانی ناوەڕاست و دیكتاتۆریەتەكانی سەدەی بیستەم كە تەواوی مێژووی سەركووتگەریی ودڕندەیی و نامرۆیی دەسەڵاتە نگریسەكانی مێژووی مرۆڤی خوێندوەتەوە و زلهێزتر لە جاران خەریكی بڕین و كوشتن و سەركووتكردنی هەرچەشنە ئیعتراز و راسانێك دەبێتەوە. لە لایەكی ترەوە بێگوومان مێژووی خەبات ئەوەی سەلماندوە كە لە هەر شوێنێك دەسەڵاتی هار و دیكتاتۆر بێت خۆڕاگریش بوونی هەیە. لە كرێكاران و زەحمەتكێشانەوە بگرە تا وەكوو زۆربەی چالاكانی بوارە جیاجیاكانی نێو كۆمەڵگاو ئازادیخوازانی سەردەم هەمیشە و بەردەوام كە بەرانبەر وەحشیگەری و بێمافی و هەوڵ بۆ دوونیایەكی بەرابەر و شیاوی مرۆڤ لە تێكۆشاندان و بگرە بەهێزتر لە جاران لە سەر گرتنی مافی رەوای كۆمەڵگا پێداگرییان كردوە و بەم هۆیەشەوە تووشی گرتن و زیندان و ئەشكەنجە و سووكایەتی و لەسێدارەدان بوونەتەوە.


ئەگەر چی هەر لە سەرەتاكانی دەسەڵاتداری كۆماری رەشی ئیسلامیەوە هێور هێور كوردستان بە تایبەتی و ئێرانیش بە گشتی كرایە بەندیخانەیەكی گەورە، و ئازیزترین ئازادیخوازان و بیرمەندترین خەباتكاران لە شێدارە ترسێنەر و مەرگهێنەرەكانی زینداندا لە ژێر سەختترین ئەشكەنجەدا گیانیان بەختكردوە، بەم حاڵەشەوە بە درێژایی دەسەڵاتی نگریس و رەشیان هێشتاكە زیندانەكان ئاخندراون لە چالاكترین لاوانی كۆمەڵگا كە لە سەر داخوازی رەوای گەلەكەمان سوورتر لە جاران كۆڵیان نەداوە و درێژه پێدەری كاروانی خەباتی گەلی كوردن.

زیندانیانی سیاسی لەو چەشنە بەئەمەكترین و چالاكترینەكانی ئەم كۆمەڵگایەن كە لە سەنگەری زیندانەوە راستەوخۆ رووبەڕووی دەسەڵاتی ترس و مەرگ دەبنەوە. بەندكراوان بەشێكی لێكنەترازاوی ورە و خۆڕاگری كۆمەڵگان كە یەكجێ و كۆنكرێت دەسەڵات دەیهەوێت بیتوێنێتەوە و گڕی بدات و بیكات بە دووكەڵ و ئاسەواریشی لە پانتایی دەسەڵاتدا نەهێڵێتەوە. ئەوان هەردەم دەدرێنە بەر پەلاماری سووكایەتی و مەرگ و سڕینەوەی دەنگ و رەنگ و ئەوان ئازاری رۆحیی دەدرێن تاكوو سەریان نەبێتە هێلانەی هەڵۆی بیر تیژی ئاسمانی ئازادی، ئەوان ئەشكەنجەی جەستەیی دەدرێن تاكوو هەنگاویان شل ببێت و شاڕێی خەبات كوێر ببێتەوە.

بەندكراوانی سیاسی زیندووكەرەوە و ورەبەخش و راگری تێكۆشانی خۆڕاگری خەڵكانی سەر شەقام و مەیدان و كۆڵانەكانن بەرانبەر بە بارودۆخی هەنووكەیی نالەباری سیاسی، ئابووری و كۆمەڵایەتی. بەندكراوان جارێكی تر ریسوایی ودڕندەیی و دژ بەگەل بوونی ئەم دەسەڵاتەمان وەبیر دێننەوە و وەبەرچاومان دەخەن، كە لەم دیوی دیوارەكانی زیندان بە هۆی سەرقاڵ بوون بە دەست و پێوەندیە تاكەكەسیه كان هەمبەر دامودەزگاكانی دەسەڵات و پتر دووركەوتنەوەی رۆژانەمان لە سیاسەت و چارەنووسی ئێستا و داهاتوومان رەچاو ناكەن و بە سانایی لەبیرمان براوەتەوە.

مانگرتنی ئەوان لە خواردن بە لەشێكی لەرزۆك بەڵام بە بیر قایم، ریزبوونی ئەوان بە تەنێ بەرانبەر دووژمنی هار و پشت ئەستوور بەچەكمان دەخەنەوە بەر چاو كە نوێنەرایەتی خەباتی رەوای دژ بە كۆماری رەش دەكەن و بەم كردەوەیان ، بیر لەرزۆكانی ئەژنۆتەزیوی نێو كۆمەڵگا وەخەبەر دەهێننەوە و وانەی ئیمكانی خۆڕاگری و بەگژداچوونەوە دووپات دەكەنەوە، لایەنە شاراوەكانی دامودەزگا حوكمیەكانی رژیم ئاشكرا دەكەن ، تاوەكو ورەی هەستان جارێكی دی لە زیندانەوە بۆ شار و لادێ ئاودێر بكەن و كردەوەی راستەقینەی راسان دژ بە بارودۆخی هەنووكەیی بهێننە دی.

پەسیڤ بوون لە هەمبەر كارەساتێكی وادا دداننان و مۆركی ئەرێنیە بە كردەوە دژه مرۆییەكەی دەسەڵاتی رەش و نگریسی كۆماری ئیسلامیدا. بە واتایەكی دیكە ئەوانەی وا لەدەرەوەی زینداندان دەبێ بزانن كە قەبووڵ كردنی سیستەمێكی بێدادگەر بەشداریكردنە لە دڕندەیی ئەو سیستمەدا. تەنها كاتێك ئەو چەشنە مانگرتنانە سەردەكەوێت كە پێش بە بەرێوەبردنی ئەو كەرەستە و بیرۆكانەی دەسەڵات بگیردرێت كە مرۆڤ لە بەرچاوی مرۆڤدا دەرووخێنێت و بۆ چاوتۆقاندنی خەڵكی دەسەڵات خۆی درێژەی پێ دەدات. ئەركی ئەوانەی وا لە دەرەوەی زینداندان ، هاوكات و هاوشان لەگەڵ بەندكراوان، پاڵپشتی كردن و بە گوێی جیهاندانی دەنگی رەوا و بوێرانەی بەندكراوانە. پالپشتی كردن و تەنها نەهێشتنەوەی لاوانی بەندكراوی سیاسی لە لایەن چالاكانی نوێنەری راستەقینەی ژینە سیاسی داهاتووی گەله كه مان، سووربوونە لە سەر خەبات و یەكریزیە لە بۆ پێشخستنی سەركەوتن.

بەندكراوان هەروەك پرۆمتەكانی مێژوو ئاگاداری دوێنێ و ئێستا و داهاتوون و لە نزیكەوە بەگەرووی دووژمندا رۆشتوونەتەوە و لە ئەنجامیشی ئاگادارن و لە سەركەوتنیان دڵنیان. ئەوان بۆ شكاندنی بێدەنگی سەردەم هەستاون، بۆ شێواندنی ئاراستەی هەنووكەیی سیاسی لە خوێنی خۆیان دەبەخشن و چاك دەزانن بە رووخاندنی دەسەڵات، ترس و بێدەنگیەكان ، هاوكات لەگەڵ بێبەشیەكان دەرووخێت، ئەوان رۆڵەی بە ئەمەكی ئەم زەمەنەن، رووناكی هەڵ دەكەن و تاریكی لە گۆر دەنێن، ئەشكەنجە دەكرێن بەڵام ئەوان پرۆمتە ئاسا دەبنە هێما و ئۆستوورەی خۆراگری و خەباتی نەپچراوی سەركەوتوانەی گەلەكەمان و لە هەمبەر بارودۆخ و زەمەنی چلكن و پر لە ئازاری رۆژانەمان وەخەبەرمان دەهێننەوە.

ئەمرۆكە چەندە دەسەڵات زلهێزترە، خەڵكیش ئەوەندە و زۆرتریش بە هۆی میدیا گشتیەكانەوە و روشتنە سەرەوەی ئاستی خوێندەواری لە هەموو قووژبنێكدا زۆرتر لە جاران لە دیاردەی بەندكراوی سیاسی ئاگادارن و وەرزێكی نوێتر لە خەباتی كۆمەڵانی خەڵك هاتوەتە ئاراوە، خەڵكی هەموو ئاگادارن كە دەسەڵاتی كۆماری ئیسلامی لە پەلەقاژه و دوا ئاویلكەی خۆیدایە و پرۆمتەكان لە شاخ و شارەوە و لە كارگەو زانكۆ و شەقام و كۆڵانەكانەوە، پەتی دەست و پێیان ترازاوە و مەشخەڵی ئازادی لە دەستیانەو وەك مۆتەكەیەكی تۆڵەسێن رۆژ و شەو بەسەر تاج و تەختی كۆماری زئۆسەكاندا دێن و دەچن.



PM:03:23:30/12/2014




ئه‌م بابه‌ته 1090 جار خوێنراوه‌ته‌وه‌‌


زۆرترین خوێنراو‌