ئەمریکا خوازیاری کۆدەنگی وڵاتانی ناوچەکە بوو دژ بە هەڵگرتنی گەمارۆی چەک و چۆڵ دژ بە کۆماری ئیسلامی

"برایان هۆک" نوێنەری تایبەتی ئەمریکا بۆ کاروباری کۆماری ئیسلامی لە وەزارەتی دەرەوەی ئەو وڵاتە، باسی لە مەترسییەکانی کۆتایی هاتنی مۆڵەتی گەمارۆی چەک و چۆڵی کۆماری ئیسلامی کرد و داوای لە وڵاتانی عەرەب و ئیسرایل  کرد بۆ پێشگیری لە کۆتایی هاتنی گەمارۆکان یەک دەنگ بن.

بە وتەی ڕاپۆڕتی گاردییەن، "برایان هوک" سەردانی وڵاتانی ڕۆژهەڵاتی ناوەڕاست و ئوروپای کردووە تا سەرنجی ئەو وڵاتانە بۆ پشتیوانی کردن لە پلانی ئەمریکا بۆ درێژ کردنەوەی گەمارۆکان ڕابکێشێت.

هۆک لە درێژەی سەردانەکەی لە لەندەن وتی: "کەس باوەڕی بەوە نییە کە ئێران دەبێ، توانایی کڕین و فرۆشی چەک و چۆڵی وەک؛ فڕۆکە هێرشبەرەکان، تانکەکان، سیستمی تۆپخانە، کەشتییە ‌هێرشبەرەکان و هەرچەشنە موشەکێکی بێت."

ئەو دیپلۆماتە باڵایەی ئەمریکا ئاماژەی بەوە کرد، بە زووترین کات ئەمریکا ڕەشنووسی پلانی خۆی بۆ درێژکردنەوەی گەمارۆکان پێشکەشی ئەنجومەنی ئاسایەشی نەتەوە یەکگرتووەکان دەکات و دووپاتی کردەوە، پرسیاری کۆمەڵگای نێونەتەوەیی هەبوون یا نەبوونی گەمارۆکان نییە، بەڵکوو کات و چۆنێتی گەمارۆکانە.

برایان هۆک لە کۆتایی دا وتی؛ "ئەگەر گەمارۆکان هەڵبگیرێت کۆماری ئیسلامی ئەو کارانە دەست پێدەکات کە ئێستا لە ڕۆشنایی ڕۆژ بە شاراوەیی دەیکات."

PM:05:32:30/07/2020




ئه‌م بابه‌ته 157 جار خوێنراوه‌ته‌وه‌‌


زۆرترین خوێنراو‌