كتێبەكانی ڕۆژهەڵات

ڕێبوار سیوەیلی

1ـ ڕۆژهەلات لە هەوڵدانێكی بێ پسانەوەی سەلماندنی خۆیدایە. وەك جوتیارێكی ماندوونەناس ساڵانە زەوییەكەی دەكێڵێت بۆ ئەوەی بەرهەمێكی دیكەی لێبەرهەم بێت. جەور و ستەمی دەوڵەتەكە بە سەدان گەنجی، لە كیژ و كوڕان لەژوورنا و زۆر پێش ئەم دابڕگەیەی ماوەیەك لەمەوبەر ڤایرۆسی كۆرۆنا هێنای، ئەوان خۆیان دابڕ و كەرەنتینە كرد. بەرهەمی ئەو خۆدابڕكردنەمان لە موزیك و خەباتی مەدەنی و ژینگەپارێزییدا، لە مەریوانەوە تا سنە و جوانڕۆ، تا كرماشان و لەوێشەوە بۆ بانە و سەقز، بۆ بۆكان و مەهاباد و سەردەشت بینی و هەتا ئێستاش بەردەوامە. لە ئێستادا خۆرهەڵات بە جۆرێكی دیكە و بە ڕازانەوەیەكی دیكەوە دەیەوێ كوردبوون و نیشتیماندۆستی بەرجەستە بكات: لە ڕێگەی نووسین و بەرهەمی هزرییەوە. ڕۆژهەڵات دەیەوێت بیر بكاتەوە، بیر لە كوردبوون و شوناس و سەرهەڵدان و خۆسەلماندن.. خەباتێكی نوێ و خۆرێكی دیكە بە ڕێگاوەیە كە پایتەختێكی دیكەی ڕۆشنبیری مژدە دەدا.. ئەمەش تەنیا هەر پەیوەندیی بەو توانایانەوە نییە، كە لە جوگرافیای خۆرهەڵاتدا دەژین، بەڵكو لەناو خۆمانیشدا و لەشارانی وەك سلێمانی و هەولێر چەندین ئەستێرەی دیكەی ئاسمانی ئەم نیشتیمانە هەڵهاتوون و چاوەڕیی بینیمان دەكەن.. بەڵام ئایە ئێمە دەبینین؟!

2ـ ئەمەش پێشینەی خۆی هەیە: هێمن لە شیعر و هەژار لە پەخشان و قزڵجی لە گێڕانەوە ئەمیری حەسەنپوور لە تیۆری و جەعفەی شێخولئیسلامی لە زماندا و هاشمی ئەحمەدزادە لە ڕۆمانناسی و بەختیار سەجادی لە مێژووی وێژەدا و حەسەنزادەی مەزن و سەلاحەدینی ئاشتی و مەنسوور تەیفووری و ڕەسووڵ سوڵتانی و شۆڕش غەفووری و كاوەقوڕەیشی لە وەرگێڕان و هیدایەتی لە فۆڕمناسی و ئەحمەد چاك و ڕەهبەری مەحوودزادە لە فۆلكلۆر و ئەدەبیاتناسی و یوونس ڕەزایی لە شیعر.. عەباس وەلی و جەلال شەفیعی لە تیۆری سیاسەت و شەهلا دەباغی لە ڕەخنەی ئەدەبی و سەلاحی پایانیانی لە فەرهەنگنووسی و گۆڤاری زرێبار، تیشك و كەشكۆڵ و چەندانیتر، كە هەموویان دەناسم و بەرهەمیانم هەیە و نامەوێ تەنیا ناویان ڕێز بكەم.. لە دانسقە نموونەكانی ئەو ئەستێرانەن كە لە خۆرهەڵاتەوە هەڵدێن.. بێئاگایی و خۆ گێلكردن و ڕەتكرنەوەی ئەوەی لە خۆرهەڵات بەرهەم دێت، خۆشاردنەوەیەكی هەمیشەییە لەداهاتوویەكی پرشنگدار كە مژدەبەخشە.. خۆرهەڵات مژدەیەكی دیكەی خستۆتە گرۆی كوردبوونەوە، كە جگە لە نیشتیمانسازی هیچی دیكەی لە نیاز و ئاسۆی مەبەستدا نییە. ئەمە ئەو دیاردەیەیە كە لەمەودوا لەسەری دەوەستم، لێی ورد دەبمەوە و بەهادارتری دەكەم بۆ ئەوەی خۆرهەڵات بەگەورەیی و بەرینیی خۆیەوە ببینین و بیكەینە پێشنموونەی خۆمان..

2. ئەوانەش كە ناوم نەهێناون، نابێت لێم زویر ببن، چونكە ئەوە نیشانەی لەبیركردنیان نییە.. عەزیزان لە یادوەرییدا هەن، نەك لەسەر زمان..



PM:10:30:04/06/2020




ئه‌م بابه‌ته 606 جار خوێنراوه‌ته‌وه‌‌


زۆرترین خوێنراو‌