هەراییگ تازە لە ناوچە کوردنشینەگان





کیارەش شەهسەواری



یارسان ناو دونیادوینین و شارستانیەتێگە ک سەرچاوە ئایینیەگەی لە میترایی و دویاتر زروانی وەر گردیە و ئی شارستانیەتە ک ئیسەیش بەش فرەییگ لە مەردم باشوور خوەرهەڵات کوردستان بڕوا وە پێ دیرن، ماوەی هزاران ساڵە تویەنستیە هەڵگر کلتوور و فەرهەنگ کورد بوودن.
مەردم یارسان ک شایەد پیشتر وە ناو زروانی یا چشتیگ تر ناسریایون هەر لە ژێر گوشار دەسەڵاتدارەیل ئایینی و دیکتاتورەیل لە هەر قوناخیگ لە مێژوو بینە وەڵیم ئی گوشارەیلە لە دویای هاتن ئسلام وە زوور شمشیر وە ناوچەیل کوردنشین فرەترەو بی.
لە دویای هاتن ئسلام وە ناوچەگە ئی دونیادوینینە لە سەدەی دویوم و لەگەرد سەرهەڵداین "بالویل" و دویاتر "باباسەرهنگ" و "شاخوەشین" و تا سەدەی هەیشت کووچ مانگی وەگەرد هاتن "سوڵتان سەهاک" دەس دادە خەبات ئەڕا زنیەوکردن ئەو شارستانیەتە و فرەییگ لە جمشەیل کوردی لە ئەو ماوە ڕێبەری کرد.
ئی دونیادوینینە وە هوو خەبات بەردوام مەردم کورد وە راهبەری گەورایەیل زانا لە هەر سەردەمیگ تویەنستیە تا ئیسە خوەی ڕابگرید وەڵیم لە دەهەیل وەرین و لەگەرد وە دەسەڵات ڕەسین ئسلام شیئیزم لە ساڵ 1357 هەتاوی فرەتر لە جاران کەفتنە ژێر گوشار هاکمیەت توتالیتر و ئیدئولوژیک مەرکەزگەرا و جوور شاروەند دەرەجە سێ چەو لە لێیان کریەید، وە هوو ئەوە ک کوردن و شاروەند پلە دویون و لە لایگیشەو بڕوا وە ئایین ئسلام نەیرن، بوونە شاروەند دەرەجە سێ.
لە سەرەتای وەدەسەڵات ڕەسین ئسلام شیئە لە ئێران و درس کردن شوورای ئنقلاب فەرهەنگی، وە هوو ئەوە ک دەسەڵاتدارەیل ئیدئولوژیک شیئیزم تەنیا ئەو دین و ئایینەیلە ک لە قورئان ناو لە لێیان هاتوید قەبوول داشتن، یارسان وە کفر زانستیان، وەڵیم وە هوو تەلاش گەورایل یارسان لە ئەو سەردمە و تەدبیرەیگ ئاگاهانە و لە لاییگەو کیشە لە ناوخوەی دەسەڵاتدارەیل بڕیار دریاد ک مەردم یارسان لە سەر بڕوایل دونیادوینین خوەیان بمینن، وەڵیم ئیە تەنیا لە تئوری و قسە بی و لە کردەوە و ئەمەڵ لە گەرد مەردم یارسان وە شیوەیل فرە ناخوەش هەڵسکەفت کریاد و جیا لە ئەویگ ک وە ڕوانگای شاروەند سێیوم چەو لەی مەردمە کریاد لە فرە شوون وە ناو شەیتان پەرەس و کافر ناو وە لییان بریاد و وەداخەو ئەگەریش بتواستیان فرە موهتەرەمانە ناو لە مەردم یارسان بوردیان وە پێیان وەتیان "ئەهل هەق" ک ناویگ بێ ڕیشەوئەساسە.  وەداخ گرانتریگەو مەردم یارسان خوەیانیش خوەیان وە ئەهل ھەق ناو بەن ک ئیە سیاسەت ڕژیم بیە ئەڕا لەبەین بردن هویەت مەردم یارسان، نە ڕێز گردن لە ئی بەش فرە گەورا لە نەتەوەی کورد.
ڕژیم ئسلامی ئێران هەر لە ماوەی هاتنە سەرکاری جیا لە ئەوە ک تەمام جەریانەیل سیاسی لە ئێران لە بەین برد، دژایەتییگ ڕوین و ئاشکارا لە گەرد مەردم کورد داشت وە لە بار ئابووری و ئقتسادی و بایخ داین وە وەزئـ خەڵک، مەردم کورد و ناوچە کورنشینەگان هەمیشە لە پەراویز خستیاد و لە فرە شوینیش ڕێگری لە پیشکەفتن و سەرکەفتن نەتەوەی کورد وەتایوەت مەردم یارسان گردیاد.
ڕێگری لە دەرس خوەنین و درێژەداین وە خوەنین لە ئاست بان ئەڕا جوانەیل یارسان، ڕێگری لە ئستخدام بوین کەسەیل یارسانی لە ئورگان دەوڵەتی و فرەییگ لە شوینە شەخسیەگان ژێر دەسەڵات خوەیان، و هەڵە و ئشتبا زانستن ژن خوازین و ژن داین وە مەردم یارسان، دەرکردن کارمەندەیل و کارکەرەیل یارسانی لە سەر کار، تەوهین و بێ ڕێزی وە باوەڕەیل و ئاداب و ڕسووم یارسانیەیل لە ناو ڕووژنامەگان سەر وە دەسەڵات .... و فرە بێ ڕێزی تر نموونەیلیگ لە هەڵسکەفت دەسەڵاتدارەیلە لە ماوەی ئی سی و چوار ساڵ دەسەڵاتدارییانە.
لە دویاین فشارەگان دەسەڵاتدارەیل وە سەر مەردم یارسان وە هوو ئەوە ک مەردم یارسان وەتایوەت جوانەیل و ڕووشن هویرەیل ئی باوەڕ قەییمی مەردم کوردە، هانە شوون زنیەو کردن شارستانیەت خوەیان و هویەت کورد بوین خوەیان توان و لە بار سیاسی لەگەرد هزبە سیاسیەگان کورد هاودەنگ بینە و هەرا و ترسیگ لە ئەوە دیرێد ک مەردم نەتەوەی کورد وە گشت قەومەیل کورد لە خوەرهەڵات یەک بگرن، دەس داسە فشار فرەتر وە سەر مەردم یارسان و بڕێگ لە باوەڕمەنەیل یارسانی لە شار کرماشان و سەرپێڵ زەهاو ئەڕا ئورگانە ئەمنیەتیەگان چڕییە و هەڕەشەی بڕین هەق و هقووقیان وە لییان کردیە.
وە ڕوی ماڵپەڕ و سایت "یارسان میدیا" لە ناوڕاس مانگ ڕێبەندان چل و نوو بنەماڵەی یارسانی لە شار سەرپێڵ زەهاو ئەڕا دادگای ئنقڵاب کرماشان چڕیانە و وە پێیان وەتنە ک هویچ هقووق و مەزایاییگ دی لە لایەن دەسەڵاتەو وە پێیان نیەریەد، کاتیگ ک مەردم یارسان مەمەڕ ئی بڕیارە پرسینە، لە جواو وە پێیان وەتنە ک ئیوە موسەڵمان نیین و نماز نیەخوەنین، وە ئییە قانوون تازەیگە ک دویاتر هەر چی بنەماڵەی یارسانیە گریدە وەر، جی باسە بویشیمن فرەییگ لە ئی کەسەیلە ک ئەڕا دادگا چڕیانە و بڕیار بڕین هەق و هقووق وە سەریان داسەپیایە، خانەنشین یا بازنشەستە بینە و ساڵان ساڵ خزمەت کردنە.
هەر وە ڕوی ئی خەوەرە لە ناو ئەو سایتە هاتیە ک نزیک وە سی و یەی کەسیش لە کرماشان ئەڕا دادگا چڕیانە و وە پێیان وەتنە هەق و هقووقدان بڕیمن.
ئی جوور گوشارەیلیگ لە سەر مەردم یارسان هەمیشە وەتایوەت لە سەردەم دەسەڵاتداری ئسلامیەیل وە ئی سی و چوار ساڵە هەر بیە وەڵیم ئی میزانە وە گوشار نشانەیگە لە هەرا و دڵەڕاوکەی دەسەڵات وە مەردم کورد وەگشتیی و مەردم یارسان وەتایوەتی. وە زانن ک مەردمان کورد لە هەر قوناخیگ وە میژوو وە گەرد هاودەنگی و پاڵپشتیی یەک تر تویەنستنە گەورا دیکتاتورەیل ناو میژوو وە ناو بوەن و ئی جاریشە نیشانەگان ئەوە ئویشن ک نەتەوەی کورد لە خوەرهەڵات کوردستان وەرەو هاودەنگییگ چوود و ئیە بیەسە هوو هەرای سەرەکی ڕژیم وە تەنیا کاریگ ک ڕژیم توتالیتر دەسەڵاتدار لە ئێران کەید و گشت دیکتاتورەیل لە درێژای میژوو کردنە، ئەوەسە ک تەنیا گوشار بخەنە سەر خەڵک و لە ئەهروم زوور کەڵک وەر گرن ک نەتیجەگەیشی دیارە هەر ئەو جوورە ک تەمام دیکتاتورەیل لە بەین چیین وەتایوەت تووف و مەوج ئی یەکی دو ساڵ وەرینە ک خوەرهەڵات ناوڕاس گردیەسە وەر و خەڵک دی دەسەڵاتداری دیکتاتوری قەبوول نیەکەن، ئیانیش ئاخر و ئاقبەتیگ جیا لە تەمام دیکتاتورەیل لە ناو دنیا نەیرن.

PM:06:52:18/03/2013




ئه‌م بابه‌ته 996 جار خوێنراوه‌ته‌وه‌‌


زۆرترین خوێنراو‌