خدر سەعیدنژاد: دەرد و ئازاری زیندانیانی سیاسی لەوە زیاترە بە زمان باسی بکەی

خدر سەعید نژاد، چالاکێکی سیاسی کوردە کە ماوەیەک لە زیندانەکانی کۆماری ئیسلامی دابووە و ئێستا پەنابەرە لە وڵاتی دانمارک. بۆ گێڕانەوە و باس کردنی بەشێک لە دەرد و ئازاری زیندانیانی سیاسی لە ناو زیندانەکانی کۆماری ئیسلامیدا ئاسۆی ڕۆژهەڵات وتووێژێکی تایبەتیی لەگەڵ ئەنجام داوە.

ئا: ئاسۆی ڕۆژهەڵات

پرسیار: پێشەكی ئەگەر دەكرێ بە كورتی خۆتان بە خوێنەرانی ئاسۆی ڕۆژهەڵات بناسێنن؟
وڵام: من خدر سەعید نژاد، ساڵی ١٣٤٩ لە شاری بۆكان لە دایك بووم، ژیانی هاوبەشیم پێكهێناوە و خاوەنی سێ منداڵم بە ناوەكانی سروش سیاوەش و سولەیمان؛ و ئێستا ماوە سێ ساڵ و نیوە بە بنەماڵەوە وەك پەنابەر نیشتەجێی وڵاتی دانماركم.

پرسیار: با بچینە سەر پرسیارەكان، یەكەم پرسیارم بەوە دەست پێ دەكەم، ئێوە تا ئێستا چەندین جار لە لایەن ناوەندە ئەمنیەتییەكانەوە دەستبەسەر كراون، لە لایەن كام یەك لە ناوەندە ئەمنیەتییەكانەوە و لە چ ساڵێك دا دەستبەسەر كراون؟
وڵام: من ڕێكەوتی ٢٨ی ڕەشەممەی ساڵی ١٣٨٤ی هەتاویی، وێڕای دوو كەسیتر لە هاوڕێیانم بە ناوەكانی: محەمەد ئەمین سلێمانی و ساڵح كوێخا شێرە (بە داخەوە ئێستا لە ژیان دا نەماوە و ماوەیەك لەمەوبەر بە شێوەیەكی گوماناوی گیانیی لە دەستدا) كە تیمێكی سێ كەسی بووین و پێكەوە كاری نهێنیمان دەكرد، لە لایەن هێزەكانی ئیدارەی ئیتلاعاتی شاری بۆكان و بە بڕیاری دادوەری وەختیی ئەو شارە (جەعفەری)، بە تۆمەتی چالاكی سیاسی و هاوكاری لەگەڵ كۆمەڵە، دەستگیر كراین و بۆ ئیدارەی ئیتلاعاتی ئەو شارە گواستراینەوە.

پرسیار: ئێوە وەك چالاكێكی سیاسی كورد كە لە زیندانەكانی كۆماری ئیسلامی دابوون و لە نزیكەوە شایەدی ئەشكەنجە و هەڵسووكەوتی نامرۆڤانەی ناوەندە ئەمنیەتییەكانی ڕژیم بوون یا خۆتان بەرەوڕووی بوونەوە، هەڵسووكەوتی بەرپرسانی زیندان و ناوەندە ئەمنیەتییەكان لەگەڵ ئێوە چۆن بوو؟ 
وڵام: بە ڕاستی نازانی چۆن باس لە دەرد و ئازاری زیندانیانی سیاسی لە سیاچاڵەكانی كۆماری ئیسلامیدا بكەی، بە تایبەت ئەو كەسانەی كە بە تۆمەتی هاوکاری لەگەڵ حیزبە سەرەكییەكانی كوردستان وەك كۆمەڵەی شۆڕشگێڕ دەستبەسەر دەكرێن گوشارێكی زۆریان لە سەرە و بە داخەوە ڕێکخراوەکانی مافی مرۆڤی ئورووپاش چاویان نوقاندووە لەو هەمووە ئەزیەت و ئازار و زوڵم و زۆرەی كە دەرحەق بە زیندانیانی سیاسی دەكرێت.
من ٢٥ ڕۆژ لە گرتووخانەی ئیدارەی ئیتلاعاتی شاری بۆكان لە ژووری تاكەكەسی دابووم و لەو ماوەدا بە شێوەیەكی زۆر نامرۆڤانە و بێ ڕەحمانە هەڵسووكەوتم لەگەڵ كراوە و ئەزیەت و ئازار دراوم.
دوای ئەزیەت و ئازارێكی زۆر لە گرتووخانەی ئیتلاعاتی شاری بۆكان، لەگەڵ ئەو هاوڕێیانەی كە پێكەوە دەستگیر كرابووین بۆ زیندانی ناوەندیی شاری ورمێ گواستراینەوە و ماوەی نزیك بە سێ مانگیش لەم زیندانە بووین؛ بە هۆی ئەوەی كە من وەك بەرپرسی تیمەكە ناوم هاتبوو، زۆر ئەشكەنجە دەكرام، بەردەوام پرسیاری ئەوەیان لێ دەكردم كە چ كارێكم كردووە، مەسئولیەتم لە تەشكیلاتی كۆمەڵەدا چی بووە و ... ؛ هەموو ڕۆژێك لەگەڵ ئەم هاوڕێیانەی كە باسم كردن بەرەوڕوویان دەكردینەوە و ئەزیەت و ئازاریان دەداین كە دان بەوە دابنێین كە ئێمە چالاکی سیاسیمان كردووە، زیاتر هەوڵی ئەوان ئەوە بوو كە ناوی خەڵكی دیكە كە لەگەڵمان لە پەیوەندی دابوون لە ڕێكخستنەكانی شار بناسن، بزانن و دەستگیریان بكەن، بەڵام هەوڵەكانیان بێ ئاكام مایەوە.
پاش ماوەیەك منیان گواستەوە بۆ زیندانی مەهاباد و پێیان وتم كە بە بارمتەی ١٠٠ ملوێن تمەن لە زیندان ئازاد دەكرێم، بەڵام تا كاتی دادگایی كردنم بنەماڵەم نەیانتوانی بارمتەكە ئامادە بكەن، هەر بۆیە دوای ناڕەزایەتییەكی زۆر و نووسینی نامە بۆ بەرپرسانی زیندان، بارمتەكەیان بۆ کەم کردمەوە و کردیانە ٨٠ ملوێن تمەن. مافی گرتنی پارێزەریان لێ زەوت كردم و بۆخۆیان پارێزەرێکی خۆیان هێنا كە نە لە دانیشتنی دادگایەكەم دا بەشداری كرد و نە پشتیوانیشی كردم، هەر بۆیە لە لایەن دادگاوە بە سێ ساڵ زیندان و دوورخستنەوە بۆ شاری شوشتەر سزا درام.

پرسیار: ناوەندە ئەمنیەتییەكان زیاتر لە چ شێوازێك بۆ ئەزیەت و ئازار، (ئەشكەنجە)ی زیندانیانی سیاسی كەڵك وەردەگرن؟
وڵام: هەم ئازاری جەستەیی و هەم ئازاری ڕوحی هەبوو، بەڵام ئەوان زیاتر لە ئەشكەنجەی ڕۆحی كەڵكیان وەردەگرت و بە هەموو شێوازێک هەوڵیان دەدا چۆكت پێ دابدەن، زیندانی سیاسی لە لای ئەوان هیچ بەها و نرخێكی نییە بۆیە لە هیچ ئەزیەت و ئازارێك درێغی ناكەن، بە تایبەتی كە بزانن كوردیشی، بە پێی پێشینەیەكی خەباتكارانە كە كورد بە درێژایی تەمەنی كۆماری ئیسلامی بەرانبەر ئەم ڕژیمە گەندەڵە بوویەتی گوشارەكان زیاتریش دەبن.

پرسیار: بە گشتیی، ئەم ماوەیەی كە ئێوە لە نزیكەوە شایەدی بوون، دۆخی زیندانیانی سیاسی لەو گرتووخانە و زیندانانەی كە خۆتان تێیدا دەستبەسەر بوون، چۆن بوو؟
وڵام: زۆر خراپ، كۆماری ئیسلامی پێی وایە هەر كەس جۆرێكیتری بیر كردەوە كەلەگەڵ بیركردنەوەی ئەوان نەیەتەوە یا چالاكی سیاسی بكات ئەوە كافرە، تیرۆریستە و بە هەموو شێوەیەك تاوانبارە، هەر بۆیە تۆمەتی مەحارب كە یانی شەڕ لەگەڵ خودای دەخەنە پاڵ و یا سزای درێژماوەی بۆ دەبڕنەوە یا بە سێدارە و بڕینەوەی ئەندامێكی جەستە مەحكوومی دەكەن.
زۆر جار گوشارەكان بۆ سەر بەندكراوانی سیاسی تا ڕادەیەكە كە ئاواتەخوازی مردن دەبی بۆ ئەوەی لەم دۆخە ڕزگارت بێ. خواردنێكی زۆر خراپت پێ دەدەن، شەو و ڕۆژ لێپرسینەوەیە، ئیستڕاحەتت نییە، هەر حیسابی مرۆڤیشت بۆ ناكەن.

پرسیار: هەر وەكوو لە قسەكانی خۆتاندا گوێ بیست بووین، ئێستا ماوەی سێ ساڵ و نیوە لە وڵاتی دانمارك پەنابەرن، كێشە و لەمپەرەكانی بەردەم پەنابەرانی سیاسی وەك ئێوە كە ناچار بە جێهێشتنی وڵات كراون، و ئێستا نیشتەجێی وڵاتانی دیكەن، چین؟ ئایا ئاسانكاریتان بۆ كراوە بۆ مانەوە لەو وڵاتانە؟
وڵام: زۆر بە داخەوە هەر وەكوو خۆشت ئاماژەت پێدا من ماوەی سێ ساڵ و نیوە وێڕای بنەماڵەم لە وڵاتی دانمارك پەنابەری سیاسیم، هەموو بەڵگەكانی زیندانم ڕادەستی دادگای ئەم وڵاتە كردووە، زۆر بە داخەوە ئەوان بێ هیچ لێپرسینەوە و پرسیارێك لەمبارەیەوە وڵامی ڕەدیان پێ دامەوە، هەموو بەڵگەكانیشم ژمارەی پەروەندەی لەسەرە بەڵام هۆكارەكەی چیە بە ڕاستی تا ئێستاش وڵامێكی ڕوونیان پێ نەداومەوە، ئەم بەڵگانەی من ڕادەستی دادگام كردوون بە پێی ژمارەكەیان دەتوانن لە ڕێگای پارێزەرەوە لە دادگا تماشای بكەن بەڵام ئەوان ئەوەشیان نەكرد.
كێشە زۆرە بۆ كەسانی وەك من كە پەنابەری سیاسین و لە خاك و وڵاتی خۆیان دابڕاون، تۆ كە لە ڕووی ناچاری وڵاتی خۆت بەجێدێڵی و ڕوودەكەیە ئورووپا پێت وایە هەموو شتێك لێرە باشە و دەتوانی ژیانێكی نوێ دەست پێ بكەیەوە، بەڵام زۆر بەداخەوە لێرە هەموو شتێك پێچەوانەیە، كەس لە دەرد و ئازارەكانی تۆ تێناگات، كەس نازانێ چەند برین لە جەستەی تۆ دا هەیە كە ساڕێژكردنیان مەحاڵە.
بە داخەوە لێرەش زۆر كەمن ئەو كەسانەی كە وەك كورد تاڵی و ناخۆشیان بینیبێت و لێت تێبگەن، ئەوان هەموو شتێك لە ڕوانگەی خۆیانەوە دەبینن، بۆیە هیچ كەس لێت تێناگا كە باسی زیندان، ئەشكەنجە و ئیعدام دەكەی. 

پرسیار: وەك پرسیاری كۆتایی، دوایین قسەتان چیە؟ 
وڵام: ئاواتم ئەوەیە ڕۆژێك بێت و بتوانم بگەڕێمەوە وڵاتەكەی خۆم و بۆنی ئازادی هەڵمژم، بستێك خاكی كوردستان بە هەموو دونیا ناگۆڕمەوە، بەڵام ناچارم ئێستا ڕووم لە هەندەران كردووە. بە هیوای ڕزگاری یەكجاریی كوردستان.

PM:09:21:19/01/2019




ئه‌م بابه‌ته 329 جار خوێنراوه‌ته‌وه‌‌