بێکاری، مزگانییگ تر ئەهمەدینژاد ئەڕا خەڵک کرماشان


کیارەش شەهسەواری


گەوراترین شار خوەرهەڵات کوردستان، وە هوو بوین لە سەر سنوور وڵات ئێران و وە هوو شەڕ هەیشت ساڵەی ئێران و ئەراق هەمیشە تویش کیشە و گرفت فرەییگ بیە، یەکیگ لە ئی کیشەیلە کە کیشەی سەرەکیە و لە سەر فرە باوەت کارگەری دیرێد بیکاریە و نەوین کاریگە ک بتویەنید پشت وە لێ بوەسید.
لە سەردەم هاتنەسەر دەسەڵات رژیم ئسلامی وە هوو سیاسەت هەڵە و ناوەندگەرایی دەسەڵاتدارەیل وە شیوەی دروس چەو لە ناوچە کوردنشینەگان نەکریاد و ئی شارەیلە وە بار کارخانە و شوون کار، هەمیشە لە دویای باقی ناوچەگان بینە و لە کات شەڕ هەیشت ساڵەیش تویش زەرەر و زیان فرەییگ بینە، وەڵیم یەواش یەواش و لە دویای شەڕ و نە وە پشتگیری و خواست دەسەڵاتدارەیل، بەڵکم وە هوو هاوکاری و زامەت خەڵک ناوچەگە بڕێگ کارخانە و کارگای سەنئەتی وەتایوەت لە دو شوون شەهرەک سەنئەتی لە جادەی بێستوین و جادەی سنە دروس کریا و چەن کارخانەیش لە شارستانەگان و دەور و وەر شار جوور کارخانەی روین نەواتی نازگوڵ و..... کەفتنە ڕێ وەڵیم وە هوو ڕێژەی جەمگا وەتایوەت نیرووی جوان ئی کارخانە و کارگایلە جواوگوو ئی نیرووی کارە نەویە و ئیە بیەسە هوو کوچ ئجباری یا جینوساید ئابووری، وەڵیم وەداخەو ئیسە ئی قەیرانە ک سەرەکیترین کیشەی خەڵک ناوچەگەس فرەتریشەو بیە.
گەورا شار خوەرهەڵات کوردستان وە گەرد ڕێژەی فرەتر لە یەی ملیوون کەس و ئوستان کرماشان ک فرەتر وە دو ملیوون کەسە ( وە ڕوی ئامار خود دەسەڵات) جەمئەیت دیرێد، ک وەی ڕێژە فرەیگی جوانە و بیکارن ک بیەسە هوو ئەوەی ک لە بار خەڵاف و ئێئتیاد و کەم بوین ژنخوازین و ئیدز و فرە کیشەی تر کرماشان پلەی یەکم وە دەس بارێد، وەڵیم وە گشتی بەدتر لە دویای وەسەرکار هاتن "مەهموود ئەهمەدینژاد"ـە ک وەگەرد سیاسەت هەڵەی ئابووری و ئقتسادی و سیاسەت ناونەتەویی، کیشەی بیکاری فرەترەو کردیە و ڕووژ لە دویای ڕووژ کارخانە و کارگاگان لە سەرانسەر ئێران داخریەن و لە کرماشانیش بەدتر لە هەر شوونیگ تر کیشەی ئابووری فرەوە بیە و کارخانەگان داخریەن و کارگەرەیل بیکار بوون و شەرمەندەی ژن و مناڵیان بوون، ئەڕا نموونە کارخانەی گەورای نازگوڵ لە ئازەر مانگ پارەکەوە وە هوو کیشەی ماڵی و نەوین مەواد سەرەتایی ئەڕا تەولید دەس کردیەسە دەرکردن کارگەرەگان و لە پارەکە زمسان پانسەد کارگەر دەرکرد و لە تاوسان ئمساڵیش دویس کارگەر بیکار بین. وە ڕوی قسەی وەرپرسەیل ئی کارخانە تەهریمەیل ناونەتەوەی مەمەڕ سەرەکی ئی کیشەیلەسە و لە لایەن وەرپرسەیل هکوومەتیشەو ئی قسە پشڕاس کردیە. وە لایگ ترەو وە ڕوی تەبسەرەی یەک وە مادەی هەفت، ماوەی قەرارداد و دوارە کردنی ها ژێر دەس خاوەن کار  ک ئیە یەکیگە لە خاڵە سەرەکیەگان کیشەی کار و کارگەرەیل لە ناو ئێران، لە ڕوی خەوەرەگان کارخانەی قەن هەداد ئادڵیش داخریایە و فرەتر وە سەد کارگەر ئەو کارخانە بیکار کریانە، وە ڕوی قسەی ئەنجمەن سنفی کارگەرەیل بەرق و فلز کاری کرماشان پارەکە زمسان شیفت شەو دو کارخانە لویلە سازی نەوەرد ساوە و نەوەرد سەفا داخریا و نزیک و هەیشتسەد کارگەر بیکار بینە، وە هوو کار نەکردن کوورەیل ئاجڕ پەزییش ئمساڵ فرەتر وە پەنج هزار کارگەر فەسڵی بیکار بینە، داخریاین کارخانەی بافت قەرب لە ساڵ هەیشتاوهەفت و داخریاین سەدان کارگا و کارخانەی گەورا لەی چەن ساڵە وەتایوەت لەی یەک و دو ساڵە بیەسە هوو کیشە و گرفت فرەییگ ئەڕا خەڵک کرماشان، وە شیوەییگ ک دی دەنگ بڕێگ لە نوینەرەیل مەجلس ئسلامییش دراتیە. سەید فەتوڵڵا هوسەینی لە نوینەرەیل ئوستان کرماشان و ئەندام کومیسیون ئەمنیەت نەتەویی مەجلس وە گەرد ڕخنە لە دەوڵەت ئەڕا کەمتەرخەمی وە کیشەی بیکاری لە کرماشان، فرەبوین ڕووژ لە دویای ڕووژ بیکاری لەی ئوستانە مەترسی دار زانست  و قسەی خامنەیی ڕێبەر ڕژیم ئسلامی دوارە کردەو ک کیشەی سەرەکی کرماشان بیکاریە، لە لاییگترەو ڕووهوڵڵا بەیگی جیگر ئابووری مەجلس شورای ئسلامی لە داخریان هەفتا لە سەد کارخانەیل لە ئێران ڕخنە لە سیاسەتەیل ئابووری دەوڵەت گرد و ئیە وە کیشەییگ گەورا ناو برد.
لە ناو ئێران نزیک وە پەنج ملیوون بنەماڵە کارگەرن ک ئیە یانی سی ملیوون لە خەڵک ئێران وە نان کارگەری ژییەن و لە گەرد بیکاری کارگەرەیل و داخریاین کارخانەگان ئی بنەماڵەیلە تویش کیشەی فرەییگ بوون. لە لاییگترەو وە هوو سیاسەت هەڵەی ئابووری دەوڵەت و تەهریمەیل ناونەتەوەیی وە سەر ئێران و گرانی ڕووژ لە دویای ڕووژ وە شیوەییگ ک لە ماوەی سێ مانگ یەی قەڵەم کاڵا فرەتر لە سێ بەرابەر گرانەو بوود وە هەر ئیە بوودە هوو ئەوەیگ ک مناڵ کارگەر بیکار نەتویەنید دەرس بخوەنید و جوور یەی شاروەند ژیان نەکەید، وە هەر ئیە بوودە مەمەڕ جیایی و لە بەین چین بنەمای یەی بنەماڵە و خەڵاف و ئێئتیاد و هزار کیشەی تر لە لی دروس بودن و لە وەرایوەریشی هویچ وەرپرسیگ جواوگوو ئی کیشەیلە نیە و مەقامەیلیش لە گەرد زانستن ئی کیشەیلە هویچ کاریگ نیەکەن و تەنانەت ئزنیش وە کارگەرەیل نیەن ک سنفیگ و شووراییگ سەروەخوو داشتوون، وە پێچەوانەیش فرەییگ لە چالاکەیل کارگەری باڵبەس و ڕەوانەی بەندخانەگان کەید.
لە لاییگ ترەو یەکیگتر لە کیشەگان کارگەرەیل لە ئێران وە گشتی و لە کرماشان وەتایوەتی، نەوین ئستاندارد ئیمنی کارە ک کیشەی گیانی ئەڕا کارگەرەیل درس کردیە. وە ڕوی قسەی "سوهراب بەرئەندیشە" مودیر گشتی کار و ڕفای ئجتمائی ئوستان کرماشان دویس و هەیشتاو نوو مەورد هادسەی  کاری خەوەر داس ک چەن کەسیش گیانیان لە دەس دانە. ئیە لە هاڵیگە ک کەمتر کارگەریل بیمەی کار و بیمەی خەدەماتی دیرێد و تەنیا تویەنیم بویشیم بانانیگ نادیار فرە تیەریک لە سەر ڕێ کارگەرەیل و ژن و مناڵیان هەس لە ناو ئێران ژێر دەسەڵات ڕژیم ئسلامی.


PM:07:18:18/02/2013




ئه‌م بابه‌ته 1082 جار خوێنراوه‌ته‌وه‌‌


زۆرترین خوێنراو‌