دەپسێنێ پەتی زوڵم و دەشكێنێ سامی حاكم و قەناره

پێشكەش به یادی هەمیشە زیندووی "ڕامین"ی قارەمان  
ئارام بوداغی 
 
هەواڵ كورت و دڵتەزێن بوو
قاڵاوەكانی تارانی تەم و دووكەڵ
پایتەختی داعشی شیعە و
خیلافەتی سێدارەی ئێران
ئەمڕۆ ڕامینیان له كوردستان ئەستاند.
ڕامین له سەر داری سێدارەوه له شەقەی شاباڵیدا 
دڕی به چڵكه هەوری شەوی تاری تاراندا 
شار و باژێر و شەقامان دەهەژێنێ  
دەسەڵاتی ڕەشی تاران دەلەرزێنی
باڵ لێ‌دەدا و له سنەی سووری سەربەرز
له گەڕەك و شەقامەكان دێت و دەچێ و
لەگەڵ "سەباح" و "حامید" و "بێهزاد" سروودی "كاك شوان" دەڵێتەوە  
له ئاویەرە، كەچی له كامیاران و كرماشان به دەستی سدیقەكان دەنووسرێتەوه
هاوكات له مەریوان له ئاوێنەی زرێباردا دەدرەوشێتەوه و
لەگەڵ "پەرویز" و فوئادەكان سروودی "فوئاد" دەڵێتەوه  
لەگەڵ "شەریف" و "ئومێد"ەكان ئاگری دارستان دەكوژێنێتەوه و
داربەڕووەكان دەڕوێنێتەوه.
له بانه لەگەڵ "چیا" بەرەنگاری داگیركەر دەبێتەوه
له سەقز لەگەڵ "هەڵۆ" و حەمەحسێنەكان سروودی "سوورە سوار" و "ڕێی خەباتمان" دەڵێنەوه
له بۆكان لەگەڵ "ئەرسەلان" و "سەید ئەسعەد" شیعری "دەلالۆ" دەخوێننەوه
له مهاباد وانەكانی "خانه" دەڵێتەوه و 
لەگەڵ "جەماڵ" سروودی "هەڵگرن ئاڵای ئازادیی وڵات" دەڵێنەوه
ڕامین لەگەڵ كۆڵ‌بەرانه
لەگەڵ تاوی باڵی خرۆشانه
لەگەڵ ڕاپەڕینی بێ‌بەشانه
لەگەڵیدان گوندی و جوتیار
ژن و پیاو و كیژ و لاوی باژێر و شار.
ڕامین ناسرەوێ و له گشت سووچی كوردستانه
هەر لەو كاتەدا هاواری ڕەنج و بێ‌دادیی سیستان بلووچستانه
زایەڵەی ژنێكی ئازار دیتوو و پیاوێكی ڕیش چەرمگه 
بۆ مناڵێكی ڕووت و قوت، جل‌وبەرگه
ڕامین لە ئەهوازه و لەگەڵ "فوئاد عەڕەب"
دەبنه كانی بۆ گەڕەكی تینووەكان
دەبنه دەنگی دلێری ڕاسانی جەماوەر و شۆڕشی چەوساوەكان.
ڕامین له گشت ئێران دەنگی ("نا"یه بۆ سێداره)
دەپسێنێ پەتی زوڵم و دەشكێنێ سامی حاكم و قەناره.
ڕامین سنوورەكان دەبەزێنێ و
له سلێمانی و هەولێر و كەركوك سەرهەڵدێنێ 
پرچی گەرمیان دەهۆنێتەوه و قژی شنگاڵ دادێنێ 
قامیشلی و كۆبانی و دیاربەكر دەخرۆشێنێ
ڕامین ئازادییه، ژیانه، كۆڵ‌نەدانه.
***
من دڵنیام ڕامین خۆی بە ئێراندا كردەوه تا گۆمی مەندی ستەم بشڵەژێنێ
خەو له چاوی پاسدار و بەكرێگیراو و داگیركەر و 
زیندانەوان و جەللاد و مەلای تاران بزڕێنێ
رۆژهەڵاتم بخرۆشێنێ و
لەوێشەوه بانگی ئازادی كوردستان له ماشەری پەیامگری مافی مرۆڤ بهاڵێنێ.  
بەڵێ بەڵێ خۆی بە گەرووی داگیركەردا كردەوه
تا تۆوی هەستان و خرۆشان بۆ ڕزگاری كوردستان بچێنێ.
ڕامین به لەشی زامارەوه 
به لەرز و یاو و ئەشكەنجە و ئازارەوه 
نەترس و نەبەز، ورەی بەرنەدا 
هەرەسی بە مەرگ هێنا
چۆكی به جەللاد دادا.   
ڕامین وابوو، چون به باوەڕی پۆڵایینی
"كاك ئەحمەدی شەعبانی" گۆچ كرابوو
زیندانی كردە مەیدان
مەیدانی قارەمانی و كۆڵنەدان
ون نەبوونی ئاسۆی ژیان
بوو بە ڕۆڵەی خۆشەویستی ماڵ بە ماڵی كوردستان.
 
*** 
دێوە پیر و تاریكبیر و 
هەناو ڕەش و ڕەوش ڕەشەكەی تاران 
خەیاڵی خاوە 
سەری له چیاكانی كوردستان دراوە 
له حاست گەلم دۆش‌داماوە، 
ئەوەتانێ، تا دار بۆ "ڕامین"ێك هەڵ‌دەدەن 
سەدان "ڕامین" سەرهەڵ‌دەدەن 
تا "ڕامین"ێك دەبڕنەوە 
ڕامینستان هەڵدەچنەوە و 
بەرز و سەركەش ڕادەبنەوە. 
تا "ڕامین"ێك دەدروونەوە 
كێو و كێڵگە و ئاخ و باخی كوردستانم 
هەر "ڕامین"ە و دەڕوێنەوە و 
ڕەپستەیە و دەشنێنەوە و 
نابڕێنەوه و ناتوێنەوە. 
ڕامین نامرێ و بەپێوەیه
له سەنگەری شۆڕشدایه و پێشمەرگەیە
نامرێ چون ڕامین هەموومانه و هەموومان ڕامینین
نامرێ چون پڕشنگی ئازادیی وڵاتە 
ئاسۆی ڕوونی ڕۆژهەڵاته 
چونكه بزه و بیروباوەڕی نامرن
چون ئامانج و ئاواتەكانی نامرن 
نامرێ چونكه ئازادی نامرێ
چونكه كوردستان نامرێ.  
ئەوەی دەمرێ شەمشەمەكوێرەكانی تارانن
ئەوەی مردووه بیری تاریكی ئیمامەكەی ئێرانه
ئەوەی بۆ هەتا هەتایە ڕق و قینی جەماوەری پێ بڕاوه
ئەوەی ڕووڕەشی و شەرمەزاریی مێژووی مرۆڤایەتی بۆ ماوه 
مەلاكانی قوم و تارانن.
ئەوەتانێ هەر دوێنێكه عەبای ڕەشی باوەڕیان
كەوته بەر قینی جەماوەر و گڕیان دا. 
ڕامین ڕەمزی ئازادی و ژیانه
هەوێن و ڕەوتی هەر مانه
ئەوەی بۆ هەمیشه دەمێنێ و
هەتا هەتایه زیندوویه
هەر ڕامینه و هەر ڕامینه.
 
۱۷ی خرمانانی ۱۳۹۷
٨ی سیپتەمبری ٢٠١٨

PM:07:37:07/10/2018




ئه‌م بابه‌ته 215 جار خوێنراوه‌ته‌وه‌‌