رامین حسێن پەناهی ، گیانی لە مەترسیدایە

لە حاڵێكدا ٩ رۆژە رامین حسێن پەناهی زیندانی سیاسی كورد، بە دوورینەوەی لێوەكانی لە زیندانی رەجایی شاری كەرەج مانی لە خواردن گرتووە و لە ژووری تاكەكەسیدا دەستبەسەرە و بە نامرۆڤانەترین شێوە، بە دەست و لاقی زنجیر كراوەوە بەردەوام لە ژێر كامێرای چاودێریدایە، ئەمڕۆ دوو شەممە ٣ی سێپتەمبەر بەرامبەر بە ١٣ی خەرمانان، كەمپەینی بەرگری لە رامین حسێن پەناهی رایگەیاندووە كە رامین هەڕەشەی ئیعدامی لە سەرە.
ئەم كەمپەینە لە زاری سەرچاوەیەكی ئاگادارەوە ئەوەی بڵاو كردۆتەوە مەترسی ئەوە هەیە لە ٤٨ كاتژمێر داهاتوودا ئەم زیندانییە سیاسییە كوردە كە دوور خراوەتەوە بۆ زیندان رەجایی شاری كەرەج لە سێدارە بدرێت.
كەمپەینی بەرگری لە رامین حسێن پەناهی، رۆژی یەكشەممە ١٢ی خەرمانان ڤیدیۆیەكی لە رامین حسێن پەناهی بڵاو كردەوە كە ڤیدیۆكە بە كامێرای مۆبایل گیرابوو، لەو ڤیدیۆ كورتە ٣٧ چركەییەدا رامین وێڕای ئەوەی كە سپاسی خۆی ئاراستەی خەڵكی كوردستان و ئێران دەكات بەوە كە پشتیوانی دەكەن، رایگەیاندووە كە ئەو تیرۆریست نییە، بەڵكوو چالاكێكی مەدەنیە و تۆمەتی تیرۆریست بوون بە درۆ ئەخاتەوە.
یەكێك لەو شتانەی كە بووە بە هۆی ئەوەی لەم كاتەدا نیگەرانی بەرامبەر بە ئیعدام و جێبەجێ كردنی سزای ئەم چالاكە سیاسیە كوردە زیاتر ببێت بە ناوی دێكۆمێنتارییەكە كە شەوانی ١١ و ١٢ی خەرمانان رایەڵەی تایبەت بە پارێزگای سنە بە ناوی (تیرۆر) بڵاوی كردۆتەوە. 
چالاكێكی كەلتووری لە شاری سنەوە وێڕای دەربڕینی نیگەرانی خۆی بەرامبەر بە بڵاوبوونەوەی ئەم بەناو دێكۆمێنتارییە لەم كاتەدا رایگەیاند :" ئەم چەشنە كارانە لە میدیاوە ئامادە كردنی جەماوەر و روانگەی جەماوەرە بۆ جێبەجێ كردنی سزای ئیعدامی رامین. "
ئەم چالاكە كەلتوورییە كە بەهۆكاری ئەمنیەتی ناوی لای ئاسۆی رۆژ پارێزراوە لە درێژەی قسەكانیدا وتی :" میدیا ئەو كەرەسەیە دەوڵەت كەڵكی لێوەردەگرێت بۆ سەركوتی خەڵك و ئامادە كردنی خەڵك بۆ ئەو مەبەستەی خۆی دەیهەوێت. ئێمەی كوردی رۆژهەڵات لە نەبووی میدیادا زۆر خەسارمان پێ گەیشتووە. میدیا چەكێكی گرینگی سەردەمە و كۆماری ئیسلامی لەم كاتەدا خەریكە كەڵك لەم چەكە وەردەگرێت دژ بە كورد و بە تایبەت لە دۆسیەی رامین دا زۆر كەڵكی لێ وەرگرتووە. "
ئەم چالاكە هەروەها وتی :" ئەوەی تا ئێستە رژیم سزای داسەپێنراو بە سەر رامین حسێن پەناهی جێبەجێ نەكردووە بە هۆی گوشارە ناوخۆیی و نێونەتەوەییەكانەوەیە. ئێستە روانگە و شەپۆلێكی گەورەی دژە سزای ئیعدام لە ئێران لە ئارادایە. ئەمە ئەو هێزەیە كە ئەتوانرێت كەڵكی لێ وەربگیردرێت نەك تەنها دژ بە سزای داسەپێنراو بە سەر رامین، بەڵكوو دژ بە سزای ئیعدام بە گشتی لە ئێران."
دەربارەی ئەوەی كە چی بكرێت لە ئێستادا ئەم چالاكە مەدەنیە رایگەیاند :" بەهەمانشێوە كە دەسەڵات دەیهەوێت بیروڕای خەڵك بۆ ئەوە ئامادە بكات كە ئەم سزایە جێبەجێ بكات، سەرجەم ئەوانەی كە دژی ئیعدامن، پێویستە خۆیان و خەڵك بۆ رووبەڕوو بوونەوەی ئیعدام ئامادە بكەن. ئیعدام كردەوەیەكی نامرۆڤانەیە و مەحكووم كردنی خزمەت بە ئێستا و داهاتووی كۆمەڵگایە."
لە درێژەی قسەكانیدا هەروەها وتی :" نابێ بهێڵێن لە فەزای مەجازی و لە تۆڕە كۆمەڵایەتییەكاندا ، لە رۆژنامە و ماڵپەڕەكاندا پرسی رامین و ئیعدام بێدەنگ بێت، لە هەمانكاتدا پێویستە كار بكرێت بۆ ئەوەی خەڵك لە شارەكان بە تایبەت لە سنە دژی ئەم سزایە بن و بە هەوڵی خەڵك و رێكخراوە نێونەتەوەییەكان هەوڵی راگرتنی ئەم سزایە بدرێت."


PM:02:15:03/09/2018




ئه‌م بابه‌ته 362 جار خوێنراوه‌ته‌وه‌‌