گیانبازیتان پیرۆز

پێشکەش بە یادی دوو شۆڕەسواری ڕێگای ئازادی (ئەرسەلان جەوزاک و پەرویز عەبدی)
هەوار بۆکانی 

دار بەڕوویەک بسکەکانی و
نووسراوەیەکیش وشەکانی،
هەڵدەپڕوزێن.

خاک ڕاساوە و 
نیشتمان بە جەستەی ئازادیەوە باڵ دەگرێ،
دایکیش بە عەشقی نیشتمانەوە هەڵدەقرچێ و
مات و حەیران هەور بە دیار فرمێسکەوە.

ئیتر باڵندە کۆچەرەکان 
لە کۆچ وەستاونەوە و 
فڕینی عەشق سنوور ناناسێ!!
چەند بێ نازن بسکی دارستان و کچانی گەڕەکی خۆشەویستی
لێرە ئەوین سەردادەنەوێنێ
بۆ جەستەی، خاک و دار و بەرد و زیندەوەری
ئەوین سەرکەش و تۆش هەوێنی وی

ئێوە هاتن بە پیر زریکەی دارستان و هاواری وشە باڵا بەرزەکانی چریکەی مرۆڤایەتییەوە
ئەوان بوونە گڕە مشقاڵی خۆشەویستی و 
بەرز بەرز فڕین تاکوو ئەوپەڕی جیهان
ئێوە هاتن خۆتان لە جەستەی سووتاوی نیشتمان 
بسکی هەڵپڕوزاوی ئازادی و
ئازاری لێوی دووراوی زرێوار و
کانیە تینووەکانی وڵاتی بەفر 
مەمکی قرتاوی دارهەنارە عازەبەکان و
جمەی شەقامی برسی هاڵێنن!!
ئێستا زرێوار هیلاکە
لە ناڵەی ئازاری ئەم هەموو گوڵە تینووە
ئێوە هاتن ئەوینی مرۆڤایەتی
بە سەر جەستەی خاک و نیشتمان دابارێنن
ئێوە ساڕێژتان کرد خاک و 
تۆوی ئاشقیتان چاند و هەناردەی بەرهەمی مرۆڤایەتیتان کرد 
بۆ وڵاتانی قاقڕ
ئەوانیش هەناردەی باڕوت و گڕ

PM:04:36:31/08/2018




ئه‌م بابه‌ته 671 جار خوێنراوه‌ته‌وه‌‌