بۆ یادی گیانبەختکردووانی ٣ی خەرمانان

جەلیل ئازادیخواز

تۆ هاتی وەك هەناسەی شەماڵ!
ڕەوتی نەجیبی بەفر 
چاوێكت ڕەیحان،
هەناسەت؛
تاسەی هەموو ئاشقە ناكامەكانی مێژوو.

دڵت لە بڕوا شەپۆل لێدەدا
نیازت وابوو 
لەبارەگای كەسكی چیا،
هەگبەی هەژاریی شار 
پڕكەی لە كولێرەی تریڤە.

هاتی باوەشێ گزنگی سپێدە 
باقەیە بزەی شەبەق
لەبەژنی تاریكی شار هەڵخەی! 
سرك سرك 
وەك چاوی نەسرەوتی حەوزە گەوورە
گەرووی نەبڕاوەی زیرەك،
چریكەی شمشاڵەكەی قالە مەڕە
سەرت سەری تەرەغەیە 
كڵاوی لاری شەیداییت 
كردیتیە ئەرسەلانی ئەم چیرۆكە.

دەستێكت ڕەوایەتی حەوزەگەورە و
دەستێكت 
پڕە لە چاوی كەسكی زرێبار.
بۆنی خاكی تاڵەسوار دەدەیت! 
ڕەنگت،
ڕەنگی لفكەی جامانەكەی فوئادە
زووڵاڵی قەڵەمەكەی ئەمینت پێیە؛

ئەم هەموو بەرامەت لە كوێ هێناوە.؟
ئێستا سەردەمی قاتووقڕی بەرامەیە و
شەمامە شەیداكانی ئەڵمانە بە كۆرپەیی لەدار دەدرێن.

ئەوەتا شەو دێزی خەیاڵی پەروێز 
شیرینەكانی وڵاتی دارستان 
بۆن بە هەنگاوەكانی مەرگەوە دەكەن و
زەماوەندی سەربەرزی ڕیكدەخەن.

مەریوان ساڵ دوازدەی مانگ
ئاسمانی پڕە لەقاقا!
بەژنی بلێسەی ئاور و
سەری حەیرانی ئازادی .
فڕین باوەشی چۆڵ ناكا
پۆل پۆل لاوک
هەڵدەفڕن و چیا بەند بە بەندی 
پڕ دەبێت لە بەندی دم دم 

ئەم قەڵا میراتی ئاشقانە و ناسرەوێ.


PM:03:52:31/08/2018




ئه‌م بابه‌ته 548 جار خوێنراوه‌ته‌وه‌‌


زۆرترین خوێنراو‌