یەكیەتی ئوروپا جارێكیتر گەمارۆكانی بە سەر ئێراندا داسەپاندەوە

ئا: ئاسۆی ڕۆژهەڵات

یەكیەتی ئورووپا كۆمەڵێك لە گەمارۆكانی دژ بە رژیمی ئیسلامی كە پەیوەندن بە پێشێلكردنی مافی مرۆڤەوە دووبارە بە سەر ئێراندا داسەپاند. ئەم گەمارۆیانە لەحاڵێكدا جارێكیتر بە سەر رژیمدا داسەپاوەتەوە و نوێ كراوەتەوە كە بڕیاروایە رۆژی دووشەممە، ١٦ی ئاپریل یەكیەتی ئورووپا كۆببنەوەو لە سەر كۆمەڵێك گەمارۆی نوێ دژ بە ئێران راوێژ بكەن.
بەڵام ئەندامانی یەكیەتی ئورووپا هاودەنگ نین لە سەر گەمارۆ نوێیەكان كە ئامانج لەو گەمارۆ نوێیانە رزگار كردنی یەكیەتی ناوەكی نێوان ئێران و وڵاتە زلهێزەكانە و بە بەرجام ناوی لێدەبرێت. پێشتریش وەزیری خەزانەداری ئەمریكا باسی لەوە كردبوو ئەگەری هەیە واشنگتۆن كۆمەڵێك گەمارۆی نوێ بە سەر ئێراندا داسەپێنێت. 
یەكیەتی ئورووپا جارێكیتر ٨٢ كەسایەتی ئیران خستە لیستی گەمارۆكانەوە كە وەك پێشێلكاری مافی مرۆڤ لە ئێران ناسراون و گەمارۆكانی بۆ سەر ئەو ٨٢ كەسە بۆ ساڵێك نوێ كردەوە. 
محەممەد عەلی جەعفەری، فەرماندەی گشتی سپای پاسداران و سادق لاریجانی بەرپرسی ناوەندی دادوەری (قوەی قەزاییە) و كۆمەڵێك بەرپرسی سپا و ناوەندە قەزاییەكانی رژیم لە ٦ ساڵ لەوە پێشەوە لە لیستی ئەم گەمارۆیانەدان. 
قەدەغە بوونی سەفەر بۆ وڵاتانی یەكیەتی ئورووپا و بلۆكە كردنی سەرمایەی ئەم كەسانە لەم وڵاتانە بەشێكە لەو گەمارۆیانەی یەكیەتی ئورووپا.
هەروەها بە پێی ئەم گەمارۆیانە هەناردە كردنی هەر كەرەسەیەك كە بۆ سەركوت یان كۆنتڕۆڵی پەیوەندییە تەلەفۆنی و ئەنتەرنێتییەكانی خەڵك بەكار ببرێت قەدەغەیە.
هاوكات یەكیەتی ئورووپا كە لە ساڵی ٢٠١٦ەوە دوای پەیماننامەی بەرجام پەیوەندییە ئابوورییەكانی خۆی لەگەڵ ئێران دەست پێكردۆتەوە، ئێستا كە ئەمریكا باس لە هەڵوەشاندنەوەی بەرجام دەكات دەیهەوێت بە دیاری كردنی كۆمەڵێك گەمارۆی نوێ بە سەر ئێراندا، بەر بە هەڵوەشاندنەوەی بەرجام بگرێت. بەڵام ئەندامانی یەكیەتی ئورووپا لەمبارەوە هاوڕا نین. 
فەرانسە لایەنگری ئەوەیە كۆمەڵێك گەمارۆی نوێ بە سەر ئێراندا داسەپێنرێت بە هۆی بەرنامە مووشەكییەكانی رژیمەوە و هەروەها دەستێوەردانی ئێران لە نائارامییەكانی رۆژهەڵاتی ناوەڕاست، لەوانە رووسیە. پاریس هیوادارە بە دیاریكردنی گەمارۆ نوێیەكان بۆ سەر ئێران، ئەو دڵنیاییە بە ترامپ بدات كە یەكیەتی ئورووپا نیگەرانییەكانی ئەمریكا سەبارەت بە ئێران بە هەند وەردەگرێت.
بەڵام ئیتالیا كە دژی داسەپاندنی گەمارۆی نوێێە بە سەر رژیمدا، نیگەرانی ئەوەیە داسەپاندنی ئەم گەمارۆیانە ببێت بە هۆی ئەوەی دەرفەتی بازرگانی كردن لەگەڵ تارانی لە دەست بچێت.
هەروەها رۆم لە سەر ئەو باوەڕەیە كە داسەپاندنی گەمارۆ نوێیەكان بە سەر رژیمدا گەرەنتی نییە بەوەی ئەمریكا لە بەرجام نەچێتە دەرەوە.
ئێستا بڕیار وایە وەزیرانی دەرەوەی وڵاتانی یەكیەتی ئورووپا رۆژی دووشەممە ١٦ی ئاپریل لە لۆگزامبۆرگ كۆ ببنەوەو لەم بارەوە گفتوگۆ بكەن.
بریتانیا و ئاڵمان پشتیوانی لە روانگەی فەرانسە دەكەن، لەحاڵێكدا ئوتریش (نەمسا) و ئیسپانیا و ئیتالیا دژی گەمارۆ نوێیەكانن. 
مانگێك لەوە پێش پاریس، رۆم و لەندن پێشنیاری ئەوەیان كرد كە یەكیەتی ئورووپا بە پشت بەستن بە گەمارۆكانی ئەم یەكیەتیە كە تایبەتە بە قەیرانی سوورییە، فەرماندە سەربازی و میلیشیاكانی سەر بە ئێران بكاتە ئامانج. ئەم گەمارۆیانە بریتییە لە قەدەغە بوونی سەفەرو دەستبەسەرداگرتنی ئەو كەسانەیە كە لە سوورییە خەریكی بازرگانی كردنن.
ئەم سێ وڵاتە ئورووپاییە نیگەرانی ئەوەن مووشەك و تەكنۆلۆژیا مووشەكیەكانی ئێران بگاتە سووریە و هاوپەیمانەكانی لە ناوچەكە لەوانە حووسیەكانی یەمەن.

PM:03:18:13/04/2018




ئه‌م بابه‌ته 477 جار خوێنراوه‌ته‌وه‌‌