كۆماری ئیسلامی ئێران لە كوردستانی ڕۆژهەڵاتەوە تا عەفرین!

زانا ڕۆژهەڵاتی

لەو كاتەوەی دەوڵەتی توركیا هێرشی كردووتە سەر كانتۆنی عەفرین لە كوردستانی ڕۆژئاوا، كاربەدەستانی كۆماری ئیسلامی ئێران ئەم هێرشە مەحكووم دەكەن و هێندێك لە بەكرێگیراوانی كوردی كۆماری ئیسلامی ئێران بە ئاشكرا هێرش دەكەنە سەر دەوڵەتی توركیا و ئەردووغان و باس لە كۆمەڵكوژی و كیمیابارانی گەلی كوردی كوردستانی ڕۆژئاوا لەلایەن توركیاوە دەكەن و ئەو هێرشە بە دژ گەلی كورد دەزانن! لەنێو وتارەكانیاندا باسی ئەنفالی كورد بەدەستی سەدام و نەدانی مافە ڕەواكانی كوردەكانی كوردستانی ڕۆژئاوا و كوردستانی باكوور دەكەن و بەگشتی كۆمەڵكوژی، ئەنفال و كیمیابارانەكانی كوردستانی باشوور و ڕۆژئاوا دژ بە مافەكان مرۆڤ و ئەنجام سیاسەتی فاشیستی دژی كورد دەزانن.
ئەوە ڕاستییەكی حاشا هەڵنەگرە كە گەلی كورد لە لایەن داگیركەرانییەوە و چوار ڕژیمەكەی عێراق و سوریە و ئێران و توركیاوە بەرەوڕووی گەلێك سیاسەتی شوینی و جینۆساید بوونەتەوە و مێژووی لانی كەم سەد ساڵەی ئەم دوواییانەی ئەم ڕژیمانە پڕن لە نموونەی ئەو سیاسەت و هەڵسووكەوتانە. بەڵام ئەوەی كە كاربەدەستانی ڕژیمی كۆماری ئیسلامی ئێران كە خۆی یەكێك لە داپڵۆسێنەرترین ڕژیمەكانی دژی گەلی كوردە و بە درێژای نزیك بە چوار دەیە دەسەڵاتی خۆی لە ئێران دژە مرۆڤانەترین هەڵسووكەوتەكانی دژ بە گەلی كوردی وڵاتەكەی خۆی ڕەچاو كردووە چۆن دەتوانێ پشتیوان و داكۆكی كاری گەلی كورد بێت لە پارچەیەكی دیكە؟!

پرسیار ئەوەیە ئایا سیاسەت و هەڵسووكەوتەكانی كۆماری ئیسلامی بەرامبەر بە گەلی كورد لە كوردستانی ڕۆژهەڵات هەر لە فەرمانی جیهادی خومەینی بۆ سەر كوردستانی ڕۆژهەڵات و كۆمەڵكوژی خەڵكی مەدەنی، تیربارانی لاوانی سنە لە فڕۆكەخانەی شاری سنە، كۆمەڵكوژی و تۆپبارانی خەڵكی مەدەنی لە شەڕی ٢٤ ڕۆژەی سنە، ئێعدامی ٥٩ لاوی مەهابادی، كیمیابارانی شاری سەردەشت، لەسێدارەدانی چالاكانی مەدەنی و سیاسی، شەهید كردنی هەزاران پێشمەرگە و تیرۆری ڕێبەرانی بزووتنەوەی مافخوازی كوردستانی ڕۆژهەڵات، ڕۆژانە لە سێدارەدانی لاوانی كوردستان، بڕینەوەی سزای زیندانی درێژماوە دژی چالاكانی سیاسی و مەدەنی كورد، سیاسەتی هەڵاواردنی كوردستان و دواكەوتوو ڕاگرتنی ناوچە كوردنشینەكان لە بواری ئابوورییەوە، سیاسەتی بە ئەنقەست گیروودەكردنی خەڵكی كوردستانی ڕۆژهەڵات بە ماددە هۆشبەرەكان كە بە ئەنفالی سپی ناسراوە، كوشتنی ڕۆژانەی كۆڵبەرانی كورد لە سەر سنوورەكان كە تەنیا بۆ بژیوی ژیانی خۆیان پەنا دەبەنە بەر ئەم كارە پڕ مەترسییەوە بگرە تا ئەو مافانەی كە تەنانەت لە یاسای بنەڕەتی كۆماری ئیسلامی بۆ گەلی كورد و باقی پێكهاتە ئیتنیكی و نەتەوەییەكانی دیكەی ئێرانی باسی لێوەكراوە كە لە لایەن ئەم ڕژیمەوە بە ئەنقەست پشتگوێ خراوە و دەیان نموونەی تری سیاسەتی دوژمنكارانە بەرامبەر بە گەلی كورد لە كوردستانی ڕۆژهەڵات فاشیستی و دژ بە مافەكانی مرۆڤ و گەلی كورد نین؟!
شەهید كردنی سێ چالاكی سیاسی لە شاری سنە (هاوینی ڕابردوو)، داسەپاندنی حوكمی سێدارە بەسەر ڕامین حسەین پەناهی چالاكی سیاسی، گرینگی نەدان بە لێقەوماوانی بوومەلەرزەكەی ناوچەی كرماشان كە لەنێو خێوەتدا دەژین و سێڵاو خێوەتەكانیانی گرتووتەبەر و... لەلایەن  كۆماری ئیسلامی ئێرانەوە فاشیستی و دژ بە هەموو بنەماكانی مافی مرۆڤ نییە؟! بۆ دەبێ هێرشی توركیا بۆ سەر خەڵكی كوردی عەفرین فاشیستی بێت بەڵام هێرشی كۆماری ئیسلامی بۆ سەر بزووتنەوەی ڕزگاریخوازی كوردستانی ڕۆژهەڵات فاشیستی و نامرۆڤانە نەبێت؟!
هەڵوێستی كۆماری ئیسلامی بەرامبەر بە هێرشی توركیا تەنیا لەو ڕوانگەیەوە سەرچاوە دەگرێت كە ئەگەر ئەردووغان و توركیا خۆیان بە میراتگری ئیمپراتۆری سونەی عوسمانی دەزانن و ئەمڕۆكە خەونی پێكهێنانی ئیمپراتۆری عوسمانییان لە سەردایە و ئەوا لە لایەكی دیكەوە كۆماری ئیسلامی كە خۆی بە میراتگری ئیمپراتۆری شێعەی سەفەوی دەزانێ، ململانیەكانیان لە ئێستادا بە هۆی بەریەك كەوتنی بەرژەوەندییەكانیان لە ناوچەكە توندتر بووەتەوە. ناكۆكییەكانی توركیا و كۆماری ئیسلامی لە سەرەتای نائارامییەكانی سوریا كە لە لایەكەوە توركیا خوازیاری ڕووخانی ڕژیمی بەشار ئەسەد بوو، بەڵام كۆماری ئیسلامی بە هەموو توانایەوە لە هەوڵی پاراستنی دەسەڵاتی بەشار ئەسەد و پاراستنی سنوورەكانی سووریا بوو. دیاری سووریا و بۆ سیاسەتە زێدەخوازییەكانی كۆماری ئیسلامی و بەتایبەتی پرۆژەی دروست كردنی هیلالی شێعە بۆ پەرەپێدانی شێعەگەری جۆری تایبەت بە كۆماری ئیسلامی و ئاژاوە نانەوە لە ناوچەكە و بڵاو كردنەوەی هێژمۆنی خۆی و بە ژاندارمە بوونی ناوچەكە بووە، لە لایەكی دیكەشەوە بێ هیوابوونی توركیا لە پەیوەست بوون بە یەكێتی ئورووپا و جارێكی دیكە گەڕانەوە سەر هێڵی مەزهەبی توركیا لە ناوچەكە و بووژاندنەوەی ئیمپراتۆری عوسمانی لە ناوچەكە ئەم دوو ڕژیمەی بەرامبەر بە یەكدی وەستاندۆتەوە. 
هەر بۆیە ڕوونە كە هاشوو هاواری نوێنەرانی كۆماری ئیسلامی لە شار و ناوچە كوردنشینەكان لە مەجلیسی شوورای ئیسلامی تەنیا بانگەشەیە بۆ كۆماری ئیسلامی و نەك لە سۆنگەی مرۆڤ دۆستی و دڵسۆزییان بۆ گەلی كورد لە كوردستانی ڕۆژئاوا. ڕژیمێك بەم كارنامە خوێناوییەوە بەرامبەر بە گەلی كورد لە سنووری وڵاتەكەی خۆی، ناتوانێ پشتیوان و لایەنگر و داكۆكی كاری ڕاستەقینەی خەڵكی كورد لە هیچ پارچەیەكی دیكەی كوردستان بێت.

PM:08:36:24/02/2018




ئه‌م بابه‌ته 746 جار خوێنراوه‌ته‌وه‌‌