لافاو خێمەی زیانبەركەوتوانی بوومەلەرزەكەی كرماشانی گرتەوە

ئا: ئاسۆی ڕۆژهەڵات

بە پێی ئەو هەواڵانەی بڵاو بوونەتەوەو كۆمەڵیك ڤیدیۆ و وێنە كە لە تۆڕە كۆمەڵایەتییەكاندا بڵاو بوونەتەوە، بە هۆی شەپۆلی بەرفراوانی باران بارینەوە لەم چەند رۆژەدا كە كوردستان و بەشێكی زۆر لە ئێرانی گرتۆتەوە، لە كرماشان و ناوچە بوومەلەرزە لێدراوەكان لافاو هەستاوەو ئاو چۆتە ناو خێمەی بوومە لەرزە لێدراوەكان و لە ئێستادا لە دۆخێكی زۆر نالەباردا دەژین.
دوای زیاتر لە چوار مانگ لە بوومەلەرزەكەی كرماشان و سەرپێڵ زەهاو، خەڵكی زیانبەركەوتوو لە دۆخێكی زۆر خراپدان و لە ناو خێمەدا دەژین و لە كەمترین ئیمكاناتی سەرەتایی ژیان بێبەرین ، بۆیە لەم كاتی بارانەشدا خێمەكانیان پڕ بووە لە ئاو ، كە گیانیان و تەندروستیان دەخاتە مەترسیەوە. 
پێڕانەگەیشتن بە دۆخی بوومەلەرزە لێدراوەكان لە چوارمانگی رابردوودا بابەتێك بووە كە هەموو دەم لە لایەن خەڵكی ناوچەكە و چالاكانی مەدەنی ئەو ناوچەوە باسی لێوە كراوە. 
بە هۆی پێڕانەگەیشتنی بەرپرسان و ناوەندەكانی تایبەت بەو بابەتە، وەك مانگی سوور و جیهاد سازەندەگی و شارەوانی و... لە چوار مانگی رابردوودا بە هۆی شەپۆلی سەرماوە ٤ كەس لە بوومەلەرزە لێدراوەكان گیانیان لەدەست دا و ژمارەیەكی زۆریش بریندار بوون. 
هەروەها بە پێی ئامارەكان ٢٠ كەس لە خەڵكی ناوچەكە ، بەهۆی كاریگەرییە رووحییەكانی پاش بوومەلەرزەكەوە خۆیان كوشتوە.
بڵاوبوونەوەی ڤیدیۆ و وێنەی ئەو خێمانەی كە ئاویان تێچووە، دەرخەری كەمتەرخەمی ناوەندە بەرپرسەكانە كە تا ئێستە هیچ هەنگاوێكی جیدیان بۆ یارمەتی دان بە لێقەوماوانی بوومەلەرزەكە نەداوە، بە پێچەوانەشەوە هەواڵەكان هەر لە یەكەم رۆژەكانەوە باسیان لەوە دەكرد كە ناوەندە ئەمنیەتییەكانی رژیم بەر بەوە دەگرن یارمەتییە خەڵكییەكان بە دەست زیانبەركەوتوان بگات.
رژیم و ناوەندەكانی لەحاڵێكدا ئەوەندە كەمتەرخەمن بەرامبەر بە زیانبەركەوتوانی بوومەلەرزەكە، كە بەشێكی زۆری سەرمایەی ئێران بۆ یارمەتی بە رژیمی ئەسەد و هێزە چەكدارەكانی یەمەن و گرووپە شیعەكانی عێراق خەرج دەكرێت. 
هەروەها بەردەوام باس لە دزی و راند خواری بەرپرسانی حكوومەتی دەكرێت كە تەنانەت خودی بەرپرسانیش توانای شاردنەوەیان نەماوە. 
ناڕەزایەتییەكانی مانگی بەفرانبار ناڕەزایەتی بوو بە دۆخی ئابووری و ژیانی خەڵكی و نەبوونی ئازادی لەو وڵاتە، بێگومان ئەم ناڕەزایەتیانە خواستی خەڵكی لە پشتە بۆ دۆخی ژیانێكی باشتر. بەشداری خەڵكی كرماشان بە شێوەی بەرفراوان لەو خۆپیشاندانانە بە هۆی دۆخی نالەباری ژیانیانەوەیە لە مێژووی دەسەڵاتدارێتی رژیمی ئیسلامی بە گشتی و دوای بوومەلەرزەكەی ٢١ی خەزەڵوەر بە تایبەتی.

PM:10:11:18/02/2018




ئه‌م بابه‌ته 640 جار خوێنراوه‌ته‌وه‌‌