رێكخراوی چاودێری مافی مرۆڤ نیگەرانی خۆی لە مەرگە گوماناوییەكانی ناو زیندانەكان دەربڕی

ئاسۆی ڕۆژهەڵات: رێكخراوی چاودێری مافی مرۆڤ لە راگەیاندنێكدا كە رۆژی ٢٣ی رێبەندان بڵاوی كردۆتەوە، پشتیوانی خۆی لە ژمارەیەكی زۆر لە ناوەند و رێكخراوەكانی لایەنگری مافی مرۆڤ دەربڕیوە كە نیگەرانن لە مەرگە گوماناوییەكانی ناو زیندانەكان لە ئێران.

رێكخراوی مافی مرۆڤ دەڵێت:" لە سەرەتای مانگی جێنیڤەری ٢٠١٨ەوە ژمارەیەك كەس لە زیندانەكانی ئێران بە شێوەی گومانئاوی گیانیان لە دەستداوە كە پێویستە بە شێوەی بێ لایەنانە لێكۆڵینەوە لە مەرگی ئەو كەسانە بكرێت.

ئەم رێكخراوەیەی لایەنگری مافی مرۆڤ ئاماژەی داوە بە مەرگی سینا قەنبەری و وەحید حەیدەری، كە لە دوای خۆپیشاندانەكان قۆڵبەست كران و گیانیان لە دەستدا، هەروەها ئاماژەی داوە بە مەرگی كاووس سەیید ئیمامی، كە بەرپرسانی كۆماری ئیسلامی ئیدیعای ئەوە دەكەن خۆی كوشتوە. 

لەم راگەیاندنەدا ئاماژە نەدراوە بە ژمارەیەك كەس كە لەزیندانەكان لە دوای خۆپیشاندانەكان گیانیان لە دەستدا، لەوانە ، سارۆ قارەمانی، كیانووش زەندی و حسەین قادری لە شاری سنە كە گیانیان لە دەستدا و دواتر باوكی سارۆ ناچار كرا لە بەردەم تەلەفیزیۆن كۆمەڵێك شت بڵێتەوە كە ناڕاست و بێ بنەما بوون. 

لەم راگەیاندنەی رێكخراوی چاودێری مافی مرۆڤدا، تەنها ئاماژە بە ٣ كەس كراوە، لە حاڵێكدا بە پێی ئەو زانیارییانەی لە بەردەست ئاسۆی رۆژهەڵاتدایە زیاتر لە ١٠ كەس لە مانگی رابردوودا لە ژێر ئەشكەنجەدا گیانیان لە دەستداوە. كە لێرەدا ناویان دەهێنین. 
١: سینا قەنبەری- تاران
٢: سارۆ قارەمانی – سنە
٣: كیانووش زەندی – سنە
٤: موحسن عادڵی – دزفوول
٥: وەحید حەیدەری- ئەراك
٦: حسەین قادری- سنە
٧: محەممەد نەسیری- زەنجان
٨: عەلی پوولادی- چالووس
٩:حەسەن توركاشوەندی- كەرەج
١٠ شەهاب ئەبتەحی- ئەراك
١١: كاووس سەیید ئیمامی

PM:01:31:13/02/2018




ئه‌م بابه‌ته 270 جار خوێنراوه‌ته‌وه‌‌