ڕاگەیاندنی هاوبەشی کۆمەڵە و حدکا "پێش بە ماشینی كوشتاری رژیم بگرن"

كۆمەڵانی خەڵكی كوردستان
نەتەوە مافخوزەكانی ئێران
خەڵكی ئازادیخواز
كۆڕو كۆمەڵە نێونەتەوەییەكان

هەروا كە بینیمان لە میانەی چەند ڕۆژ خۆپێشاندانی ئێعترازی جەماوەری و سەرتاسەرییەكانی خەڵكی وەزاڵەهاتووی ئێران و هاواری مافخوازیی نەتەوەكان لە ئێراندا، كۆماری ئیسلامی ئەمجارەش بە بەرچاوی هەموو جیهانەوە جگە لە سەركوت و داپڵۆسین، هیچ وەڵامێكی دیكەی بۆ داخوازیی ڕەوا و مەدەنییانەی خەڵكانی ناڕازی نەبوو.
لەم ماوەیەدا بەپێی ئامارە فەرمی و نافەرمییەكان بە هەزاران كەس لە لایەن دام و دەزگا سەركوتكەرەكانی ڕژیمەوە دەسبەسەر كراون و سەدان كەس بریندار و دەیان كەسیش لە سەر ناڕەزایی دەربڕین لە شەقامەكان، بە دەستی هێزەكانی ڕژیم كوژراون.
لە ڕەوتی دەسبەسەركردنی ناڕازیان، بەوپەڕی توندوتیژییەوە هەموو مافە ئینسانی و یاساییەكانی دەسبەسەركراوان پێشێل كراون.  كۆماری ئیسلامی ئەمجارەش تەنیا به ئەشكەنجە و سەركوت و داپڵۆسین وڵامی داخوازییەكانی كۆمەڵانی خەڵك دایەوە. لەم ڕۆژانەشدا، خامنەیی ڕێبەری ڕژیم ڕایگەیاند كە ئەو كەسانەی لە خۆپیشاندانەكاندا بەشدار بوون مۆرەی دوژمنن و وێڕای بە "وەحشی" ناوی بردنیان، فەرمانی سەركوتی توندوتیژتری دەركرد و بۆیەش مەترسیی گیانی دەسبەسەركراوان و خەڵكی ناڕازی و زیندانیانی سیاسی زۆرتر بۆتەوە.
بە پێی هەواڵەكان چەند كەس لە دەسبەسەركراوان لە ژێر ئەشكەنجەدا كوژراون و بۆ چاوترسێن كردنی خەڵك، ڕژیمی كۆماری ئیسلامی بەنیازی وەڕێ خستنی شەپۆلێكی دیكەی ئێعدامی زیندانیانی سیاسییە.
ویژدانە ئازادیخوازەكانی جیهان!
ڕژیمی كۆماری ئیسلامی سەرچاوەی تیرۆریزمی نێودەوڵەتییە و خەڵكی ڕاپەڕیو وئازادیخوازی ئێران پێویستیان بە پشتیوانیی هەموو جیهانە تا بە دەستی بەتاڵ بەڕەوڕووی ئەم ڕژیمە نەبنەوە. ئەم ڕژیمە لە رابردووشدا نیشانی داوە و ئیستاش هەمان ڕەوت درێژە دەدا و تۆڵەی هەموو شكستە سیاسی و پووچەڵبوونەوەی پیلان و ئاژاوەگێڕییەكانی لە خەڵكی بێ دەسەڵاتی وڵاتەكەی خۆی دەستێنێتەوە و بۆ ئەمەش لە زیندانییەكانەوە دەست پێ دەكات. بۆیە پێویسته هەرچی زووتر كۆمەڵگای جیهانی هەڵوێستی هەبێ و پێش بە ماشینی كوشتار و تاوانەكانی كۆماری ئیسلامی بگرێت. 
هەر لەو پێوەندییەدا، وەزیری ئیتلاعاتی ڕژیمی تاران، هەڕەشەی لە حیزبەكانی كوردستان كردووە و رایگەیاند كە گورزی قورسیان لێ دەوەشێنن. ئێمە نیگەرانی كردوە و پیلانە تیرۆریستییەكانی كۆماری ئیسلامین، بەتایبەت بەرامبەر به ژن و منداڵی كوردانی ئێران كە لە كوردستانی عێراق نیشتەجێن. جێی وەبیرهێنانەوەیه پێشتریش بە دەیان كەس ئەندام و ڕێبەرانی حیزبەكانی كوردستانی ئێران لەلایەن كۆماری ئیسلامییەوە تیرۆر كراون و هەمیش كردەوەی تیرۆریستی و تەقینەوە بەدژی ژن و منداڵی كوردەكانی ئێران لە كوردستانی عێراق ئەنجام دراوە.
خاوەن هەڵوێست بوونی كۆمەڵگای نێونەتەوەیی و كۆڕ و كۆمەڵ و ڕێكخراوە مافی مرۆییەكان و وشیاری ڕای گشتی جیهانی و میدیاكان بۆ بەهاناوە چوونی خەڵكی بێ دەسەڵات و ناڕازی ئێران دەتوانێت یارمەتیدەرێكی بەهێز بێت بۆ وەستانی ماشێنی كوشتار و داپڵۆسینی ڕژیمی كۆماری ئیسلامی لە ئێران.

كۆمەڵەی شۆڕشگێڕی زەحمەتكێشانی كوردستانی ئێران
حیزبی دێموكراتی كوردستانی ئێران
٢١ی بەفرانباری ١٣٩٦
١١ی ژانویەی ٢٠١٨



AM:12:09:12/01/2018




ئه‌م بابه‌ته 598 جار خوێنراوه‌ته‌وه‌‌


زۆرترین خوێنراو‌