زەقتربوونەوەی ململانێی نێوان باڵەكانی رژیم

ئاسۆی ڕۆژهەڵات

دوای ئەوەی ماوەیەك لەوە پێش عەلی موتەهری، نوێنەری تاران لە مەجلیسی شۆرای ئیسلامی لە وتووێژ لەگەڵ خەبەر ئانلاین، داوای كردوە ئەحمەدی نژاد سەرۆك كۆماری پێشتری كۆماری ئیسلامی دادگایی بكرێت.
ئەم وتانەی موتەهری دوای ئەوە دێت كە لە ماوەیەك لەوە پێشەوە ژمارەیەك لە لایەنگرانی ئەحمەدی نژاد لە شاه عەبدولعەزیز مانیان گرتووە و خوازیاری ئەوەن خامنەیی بە دادوەری شاهروودی لە پرسی هێرش بۆ سەر ئەحمەدی نژاد و لاینگرانی بكۆڵێتەوە.
دوا بە دوای وتووێژەكەی موتەهری لەگەڵ خەبەر ئانلاین، مەرجان زەهرایی لە رۆژنامەی ئێعتماددا  بابەتێكی بڵاو كردۆتەوە و داوای كردوە ئەحمەدی نژاد بە شێوەی ئاشكرا دادگایی بكرێت.
زەهرایی لەو بابەتەدا ئاماژەی بەوە داوە، كە پێشنیاری موتەهری ئەوەیە كە ئەحمەدی نژاد بە شێوەی ئاشكرا دادگایی بكرێت و ئەمە باشترین ڕێگایە بۆ ئەوەی هەم وتەكانی ئەحمەدی نژاد و هەم وتەی بەرامبەرەكانی ببیسترێت.
هەر لەم رۆژنامەیەدا، عەبدولسەمەد خوڕەمشاهی هێرشی كردۆتە سەر ئەحمەدی نژاد و وتوویەتی :" بێگومان ئەم رەفتارانەی سەرۆك كۆماری پێشتری كۆماری ئیسلامی، بەدەر لەو كاریگەرییە خراپانەی كە رەنگە بەجێی بهێڵێت و دەبێت بەهۆی ئەوەی نائارامی لە كۆمەڵگا دروست بێت، كاریگەری خراپی دەبێت لە سەر ئەخلاقی سیاسی و رەفتاری كۆمەڵایەتی خەڵك لە كۆمەڵگا."
ئەم وتانە دەرخەری زەق بوونەوەی كێشەو ململانێی نێوان باڵەكانی رژیمە. هەركام لە باڵەكانی رژیم ئەویتریان بە گەندەڵی ماڵی و دووركەوتنەوە لە ئامانجەكانی شۆڕشی ئیسلامی تاوانبار دەكەن. 
لە ژمارەی رۆژی هەینی ٢ی دیسەمبەری رۆژنامەی كەیهان، كە رۆژنامەیەكە سەر بە باڵی توندڕەوی كۆماری ئیسلامی هێرش كراوەتە سەر بەرنامە ئابوورییەكانی كۆماری ئیسلامی و راپۆرتی ١٠٠ رۆژەی یەكەمی خولی دووهەمی سەرۆك كۆماری رووحانی و باس لەوە كراوە كە واقعی ژیانی خەڵك لەگەڵ ئەو ڕاپۆرتەدا ناتەبایە. 
هەركام لە باڵەكانی رژیم بە هێرش كردنە سەر ئەویتریان خۆیان لە پشتی خەڵك و بەتایبەت كێشە ئابوورییەكانی ئێستەی ئێرانەوە كە كێشەی بۆ ژیانی خەڵك دروستكردوە دەشارنەوە. رووحانی لە راپۆرتی ١٠٠ رۆژەی یەكەمی خولی دووهەمی سەرۆك كۆمارییدا، باسی لەوە كردوە كە دۆخی ئابووری خەڵك روو لە گەشەیە و باسی لە كەمبوونەوەی هەڵاوسانی ئابووری كردوە. لە بەرامبەردا رۆژنامەی كەیهان و هەروەها (دنیای اقتصاد) رەخنەی توندیان لەو راپۆرتە گرتوەو بە ناڕاست ناویان بردوە.
تا دێت كێشە و ململانێ كانی نێوان باڵەكانی رژیم زەقتر دەبێتەوە. كێشە ئابوورییەكانی ئێران و لەهەمانكاتدا گەندەڵی ئابووری هەركام لە باڵەكان و ئەوەی كە یەكتر بە گەندەڵی ئابووری تۆمەتبار دەكەن، هۆكاری زەقتر بوونەوەو زیاتر دەركەوتنی كێشەكانە.

PM:03:20:03/12/2017




ئه‌م بابه‌ته 180 جار خوێنراوه‌ته‌وه‌‌