بوومەلەرزەی ناوچە كوردنشینەكان و كەمتەرخەمی ناوەندە بەرپرسەكان

ئاسۆی ڕۆژهەڵات

بە پێی ئەو هەواڵانەی لە ناوخۆی وڵاتەوە بڵاو بوونەتەوە، تا دێت ژمارەی قوربانییەكانی بوومەلەرزەكەی شەوی یەكشەممە لە سەر دووشەممە لە ناوچە كوردنشینەكان تا دێت روو لە زیادبوونە و تا ئێستەش دەوڵەت ئامارێكی دروست نادات بە دەستەوە.
بە پێی وتەكانی وتەبێژی رێكخراوی كۆنتڕۆڵكردنی قەیرانەكانی كۆماری ئیسلامی، لەم رووداوەدا تا ئێستە ٣٤٥ كەس گیانیان لە دەستداوەو زیاتر لە ٥٣٤٦ كەس بریندار بوون  وگەیەندراونەتە نەخۆشخانەكانی كرماشان.
بە پێی زانیارییەكان، سەرپول زەهاو زیاترین خەساری بەركەوتووەو بەداخەوە نەخۆشخانەی ئەو شارە رووخاوە، هەربۆیە توانای گەیاندنی خزمەتگوزاری بۆ هاوڵاتیان نییە . چاودێران هۆكاری چوونەسەرەوەی ژمارەی قوربانییەكان لە شاری سەرپول زەهاو دەگەڕێننەوە بۆ نەبوونی ناوەندی باشی خزمەتگوزاری پزیشكی و بیمارستانی باش لەو شارە.
بەشێكی زۆری قوربانییەكانی سەرپول زەهاو، ئەو كەسانەن كە لە چەند ساڵی رابردوودا كەڵكیان لە پرۆژەی مەسكەن مێهر وەرگرتووەو چوونەتە ناو ئەو بینایانەوە كە لەو پرۆژەیەدا دروست كراوە. ناستاندارد بوونی ئەو پرۆژانە و لە هەمان كاتدا دروستكردنی ئەو بینایانە لە سەر هێڵی بوومەلەرزە، هۆكاری چوونەسەرەوەی قوربانییەكانی نیشتەجێی پرۆژەكانی مەسكەن مێهرە.
دوای سەرپول زەهاو قەسرشیرین زۆرترین زیانی گیانی و ماڵی بەركەوتووە. نەبوونی خزمەتگوزاری پزیشكی لەو شارەو لە هەمانكاتدا ناستاندارد بوونی بیناكان، هۆكاریتری چوونە سەرەوەی زیانی گیانی و ئابووری قەسرشیرین بوون بە هەمانشێوەی سەرپول زەهاو و ناوچەكانیتری كرماشان و دەورووبەری.
بە پێی لێدوانی یەكێك لە چالاكانی مەدەنی كرماشان بۆ ناوەندی هەواڵنێری ئاسۆی رۆژ، كەمتەرخەمی بەرپرسان لە دوای بوومەلەرزەكە هۆكاری چوونە سەرەوەی قوربانییەكانە. ئەم چالاكە مەدەنییە كە نەیتوانی ناوی خۆی ئاشكرا بكات لە وتووێژ لەگەڵ ئاسۆی رۆژهەڵات رایگەیاند:" بەرپرسانی دەوڵەتی لەوە خۆیان دەبوارد كە زانیاری دروست بدەن بە خەڵك . ئەو ئامارانەی كە تا ئێستە لە زیانە گیانییەكان بڵاو كراونەتەوە جێی باوەڕ نین. پرۆسەی پشكنین و گەڕان بە دوای قوربانییەكاندا زۆر خاو دەچێتە پێش. هێشتا گومانی ئەوە دەكرێت كەسانێك لە ژێر دار و پەردووی خانووە ڕووخاوەكاندا مابێتنەوە."
هەروەها لە بارەی خزمەتگوزاری پزیشكییەوە بۆ قوربانییەكان ئەم چالاكە مەدەنییە وتی:" بە گشتی شارەكانی كرماشان و دەورووبەری چەندین ساڵە بە دەست كەمبوونی خزمەتگوزاری پزیشكیەوە دەناڵێنن، هەرچەند ناوچەكانی كرماشان و دەورووبەری لە سەر هێڵی بوومەلەرزەن كە پەیوەستە بە زنجیرە شاخی زاگرۆسەوە، بەڵام كەمترین گرینگی بە پرسی بوومە لەرزە دراوە لە خزمەتگوزارییە فەوەرییەكاندا. "
لە بارەی پرۆژەی مەسكەن مێهرەوە ئەم چالاكە مەدەنییە وتی:" پرۆژەی مەسكەن مێهر پرۆژەیەكی پۆپۆلیستی بوو بۆ ئەوەی بە قەولی خۆیان خەڵك بكەن بە خاوەنی خانوو، ئەم پرۆژەیە جگە لەوەی لە باری ئابوورییەوە لە لایەن سیستەمی مافیایی سپاوە بەڕێوە دەچوو و خێرێكی زۆری بەم ناوەندە سەربازییە و ژمارەیەك بەرپرس لە شارەكان گەیاند. لە باری ئەمنیەتی بیناسازییەوە لەمێژە ناڕەزایەتی هەیە لەسەر ئەم پرۆژەیە. كەس خۆی بە خاوەنی ئەو ناڕەزایەتیانە ناكات. پرۆژەی مەسكەن مێهر لە زۆر رووەوە پرۆژەیەكی ناستانداردە، تەنانەت بەرگەی گەرما و سەرماش ناگرێت. "
بە پێی زانیارییەكان تا ئێستە لێكۆڵینەوە لە سەر كاریگەرییەكانی ئەو بوومەلەرزە بەردەوامە و تا ئێستەش تیمە پشكنینەكان خەریكی پشكنینن بۆ ئەو كەسانی رەنگە لە ژێر دار و پەردووی خانووەكاندا مابێتنەوە.


PM:04:21:13/11/2017




ئه‌م بابه‌ته 109 جار خوێنراوه‌ته‌وه‌‌