ئازادی بەندكراوانی خۆپیشاندانە جەماوەرییەكانی كوردستانی ڕۆژهەڵات، ئەركێكی مرۆیی و ئازادیخوازانەیە

سەرەڕای هەموو زەبر و زەنگ و هەڕەشەكان، خەڵكی كوردستانی ڕۆژهەڵات بە نافەرمانییەكی مەدەنی بەرفراوان بە پانتایی هەموو كوردستان  بۆ پشتیوانی لە گشت پرسی لە كوردستانی باشوور،  ڕژانە سەر شەقامەكان بەڵام، كۆماری ئیسلامی كە ئەو رۆژە لە بەرامبەر شەپۆلی خەلكی ڕاپەریو توانای سەركووتی لە دەست دابوو، بۆ رۆژانی دوایی بە تۆڵەی بەشداری خەڵك، دەستی دایە ڕەشبگیری و سەدان كەس لە گەنجان و لە باقی چین و توێژەكانی خەڵكیان دەسبەسەر كرد. بەشێك لەو گیراوانە پاش ئەشكەنجە و ئازارێكی زۆر،  بە دانانی بارمتە ئازاد كراون، ژمارەیەكی تر كە رێژەیان دەگاتە سەدان كەس، هێشتا دەست بەسەرن و هەوڵی كەس و كاریان بۆ چاوپێكەوتنیان بێ ئاكام ماوەتەوە و چارەنووسیان نادیارە، ئەمە لە كاتێكدایە كە تەنیا تاوانیان پشتیوانی هێمنانە بووە لە ویست و ئیرادەی خەڵكی كوردستانی باشوور.
كۆمەڵەی شۆڕشگێڕی زەحمەتكێشانی كوردستانی ئێران وێڕای مەحكووم كردنی بەكار هێنانی توندوتیژی بەرامبەر بە خۆپیشاندانی هێمنانەی خەڵك و دەست بەسەر و دەستگیری خۆپیشاندەران، داوای ئازادی هەموو بەندكراوان دەكات و داواكاری و هەوڵدان بۆ ئازادی بەندكراواەكان بە ئەركێكی مرۆیی و ئازادیخوازانە دەزانێت و هەر بۆیەش داوا لە هەموو ئازادیخوازان، چالاكانی مافی مرۆڤ و ڕای گشتی جیهانی و ناوەندە نێونەتەوەییەكانی مافی مرۆڤ دەكات داواكاری ئازادی ئەو بەندكراوانە بن و هەوڵەكانیان بۆ ئەو مەبەستە چڕ بكەنەوە.

سەركەوێ بزووتنەوەی حەقخوازانە و ڕزگاریخوازانەی خەڵكی كوردستان.
سكرتارییەتی كومیتە ناوەندیی كۆمەڵەی شۆڕشگێڕی زەحمەتكێشانی كوردستانی ئێران
١٣ی خەزەڵوەری ١٣٩٦ی هەتاوی
٥ی ئۆكتۆبری ٢٠١٧ی زایینی



AM:10:48:05/10/2017




ئه‌م بابه‌ته 322 جار خوێنراوه‌ته‌وه‌‌


زۆرترین خوێنراو‌