28ی گەلاوێژ هێمای خۆڕاگری كوردستانی ڕۆژهەڵاتە






   فۆئاد شێربەیگی

دوای ڕاپەڕینی گەلانی ئێران لە ڕێبەندانی 1357دا و نەمانی دەوڵەتی پاشایەتی لە ئێران، كوردستانی ڕۆژهەڵات دەرفەتێكی بۆ هەناسەهەڵكێشان لە كەشوهەوایەكی ئازاد بۆ رەخسا و حزبەكان بە ئاشكرایی دەوری سیاسییەكی بەرچاویان لە وشیاركردنەوەی خەڵكدا گێڕا و هەروەها تواندرا بە شێوەیەكی ڕاستەقینە بەڕێوەبردنی شارەكان بكەوێتە دەستی خەلك و دەیان ئەزموونی بە نرخ بەدەست هات.
دەسەڵاتی نگریسی ویلایەتی فەقیهـ لە تاران بە زووترین كات دوای بەدەستەوە گرتنی جڵەوی دەسەڵات سەرنجی بۆ لای كوردستان ڕاكێشرا و بە دیتنی بەهاری ئازادی و دیموكراسی لە كوردستان شڵەژا و زانی ئەوە لە كوردستان شتێک لە ئارادایە كە لەگەڵ خەونە ڕەشەكانی ئەو بۆ دەسەڵاتدارێتی لە ئێران ناتەبایە و كوردستان بووەتە جەزیرەیەكی جیا لە ئێران، تەسلیم بوو بە دەسەڵاتی ئایینی و وەكوو نموونەیەك لە ژیانی ئازاد مەترسی گەشەسەندنی هەیە.
یەكەم جێژنانەی دەسەڵاتی مەلاكان لە تاران بۆ خەڵكی كوردستان نەورۆزی خوێناوی سنە بوو كە بە تۆپ و گولەبارانی شاری سنەی خوێناوی خەڵكی ئەو شارەی لە خوێن گەوزاند و دوابەدوای ئەوش لە كاتی هاتنی نوێنەرانی بۆ كوردستان دیتیان كوردستان تەزیو و بەزیو نییە و ناتواندرێت بە ئاسانی دەستی بەسەردا بگیرێت و بخرێتە ژێر دەسەڵاتی ئەوان و هەروەها هێز و توانای ئەوەشیان نییە لەو كاتەدا بەرەنگاری ببنەوە، هەر بەو هۆیەوە یەكەم سەری تەسلیم بوونیان لە مێژووی دەسەڵاتدارێتی خویان دانەواند و تەسلیمی ئیرادەی خەڵكی كوردستان بۆ بەڕێوەبردنی هەڵبژاردن بوون.
بەڵام تاڵی ئەو چۆكدادانەیان لە زاردا هەر ما و بەتەمای دەرفەتی گونجاو خۆیان لە كوردستان ماتدا و بەدوای ئەوەشدا كۆچی مێژوویی مەریوان ئەوەندەی تر وشیاری كردنەوە كوردستان تەسلیم نابێت و نابەزێت هەر بۆیەش خومەینی فتوای جیهادی دژ بە كورد دەركرد و هێزی ڕەشایی و تاریكی ڕووی لە كوردستان كرد.
مانای فتوای جیهادی خومەینی حەڵال كردنی گیان و ماڵ و نامووسی كورد بۆ هیزی داگیركەر و فەرمانی ئەوپەڕی كوشتن و تاڵان كردنی بێ‌بەزەییانەی گەورە و بچووكی خەڵكی كورد بوو و كاتێكی هەستیاریش بوو بۆ كوردستان كە تەسلیم بێت و ئاوات و ئارەزووەكانی بە خنكاوی ببینێتەوە و كەرامەت و شەڕافەتی پێشێل بكرێت یا خۆڕاگری بكات.
كۆمەڵە وەكوو حزبێكی بەرپرس لە ئاست چارەنووسی خەڵكەكەی و بە لێكدانەوەیەکی دروست و تێگەیشتنێكی مێژوویی لە نووسراوەی مێژوویی " خەڵكی كورد لە بەردەم تاقیكردنەوەدا " بڕیاری خۆڕاگریدا و گرینگی ئەو خۆڕاگرییەی بۆ خەڵك ڕوون كردەوە و خەڵكیش بەوپەڕی لەخۆبردووییەوە و بە باوەڕێكی قایم و پۆڵایین بەرەوپیری ئەو بانگەوازەوە هاتن و بەدوای ئەوەدا بۆ ماوەی سێ مانگ كوردستان كەوتە شەڕێكی بێ بەرامبەر لەگەڵ داگیركەران، شەڕێك كە لایەكی خەڵكی كوردستان بوو بە ورەی بەرز و ئیرادەی پۆڵایینەوە بە ڕێبەڕی حزبەكانی كوردستان و لایەكی تر، هێزی پڕچەكی دڵ پڕ لە قین و ڕەشی دەسەڵاتی مەلاكان.
ئەو خۆڕاگرییەی كە تا ئەمڕۆش ڕەمزی خۆبەدەستەوە نەدانی كوردستان و سەرفەرازی خەڵكی كوردە و كوردستانی كردووەتە چقڵی چاوی دوژمنان و هیوابەخش و پشت ئەستووری خەڵكی كوردستانە و سەرەڕای هەموو هەوراز و نشێوەكانی بەردەمی بوو بە بزووتنەوەیەكی خۆڕاگری نەتەوەیی و هەتا ئەمڕۆش دوای 38 ساڵ هەر زیندووە و لە لایەن خەڵكی كوردستانەوە بە پیر و گەنجەوە ، بە ژن و پیاوەوە هەر لە ئارادایە و دەسەڵاتی تاران نەیتوانیوە تەسلیم بوونی كوردستان ببینێت.
بڕیاری ئەوسەردەمی خەڵكی كوردستان خاڵێكی وەرچەرخان بوو لە مێژووی سیاسی ئێراندا و بوو بە تەنیا سەنگەری بەرگری لە ئازادی و ڕاپەڕین و ئەو سەنگەرە هەتا ئەمڕۆش ئاوەدانە و ئێستاش تەنیا دەربیجەیەکە کە ڕووناكی ئازادی و دیموكراسی لێوە دیارە و بزووتنەوەی كورستان زیندووە و ئاڵاهەڵگری شۆڕشێكی نوێیە و بەدڵنیاییەوە موژدەی سەركەوتنی هێزی ڕووناكی بەسەر تاریكی كۆماری ئیسلامی هەر لە كوردستانەوە دەبیسترێت و خۆری رزگاری لەوێوە هەڵدێت.
لە كۆتاییدا جارێكیتر ڕێز دەگرین لە گیانبازی و تێكۆشانی هەموو خەباتكارانی نەتەوەكەمان و بەڵێن نوێ دەكەینەوە ئەو سەركەوتنەی ئەوان لەو تاقیكردنەوە مێژووییەدا بەدەستیان هێنا ئێمەی جیلی نوێش بە دڵ و گیان دەیپارێزین و ئێستاش ئێمە خۆمان هەر لەو تاقیكردنەوەیەدا دەبینین و دڵنیاشین سەركەوتنی یەكجاری زۆر نزیكە. 


PM:06:21:09/08/2017




ئه‌م بابه‌ته 389 جار خوێنراوه‌ته‌وه‌‌