تۆپبارانی بنكە و بارەگاكانی كۆمەڵە لە سنوورەكانی رۆژهەڵات

وتووێژ لە گەڵ هاوڕێ عەبدوڵڵا ئازەربار "بەرپرسی كۆمیسیۆنی نیزامی كۆمەڵە"

سازدان: ئاسۆی رۆژهەڵات

پرسیار: هاوڕێ عەبدوڵڵا سەرەتای پرسیارەكانم بەوە دەست پێ دەكەم، هەر وەك هەمووان ئاگادارن ئەمڕۆ دووشەممە، تۆپخانەكانی كۆماری ئیسلامی بنكە و بارەگاكانی كۆمەڵەیان لە سنوورەكانی رۆژهەڵات كردە ئامانج، ئەگەر دەكرێ زانیاری زیاتر لەم بارەیەوە بدەن بە خوێنەرانمان؟

عەبدوڵڵا ئازەربار: لە ماوەی هەفتە و رۆژانی رابردوودا ئێمە هەواڵمان لە سەرچاوە خۆجێیی و ناوخۆییەكانەوە بە دەست گەیشت كە كۆماری ئیسلامی خەریكی جموجۆڵە لە سنوورەكان و هێز و تۆپخانە لە سەر سنوورەكان جێگیر دەكات، لە رۆژانی رابردوودا ئەم هەوڵانەی كۆماری ئیسلامی چڕتر و چڕتر بوویەوە، هەواڵەكان تا دەهات زۆرتر و زۆرتر ئاماژەیان بەوە دەدا كە كۆماری ئیسلامی بە زوویی دەیەوێ سنوورەكانی رۆژهەڵات بە ئەزموونی ساڵانی رابردوو تۆپباران بكا.

شتێكی دیكەی كە لێرەدا دەمەوێ ئاماژەی پێ بكەم وەك چۆن كاتی بۆمبگوزارییەكەی بنكە و بارەگاكانی كۆمەڵە لە دوو ساڵی رابردوودا، پێش ئەوە عەمەلیاتێكی ساختە لە مەریوان كرا، دواتر دەنگۆ و چالاكی‌هایەك لەوێ بڵاو بووەوە كە گومانیان لە سەر بوو، لە رووی هەموو ئەوانەوە دەتوانرا تەشخیس بدرێت و ئێمە پێشبینیمان دەكرد كە بە زوویی سنوورەكان تۆپباران دەكرێن و ئامادەباشمان دا بە هێزەكانمان، تا بەرەبەیانی ئەمڕۆ دووشەممە، ١٢ی پووشپەڕ، كاتژمێر ٥ و ١٥ خولەك، تۆپبارانەكە دەستی پێكرد، تۆپبارانەكە زۆر بە چڕی و بە سەختی بوو، پێشووتریش بۆردومانی ئەم سنوورانە كراوە بەڵام كەم جار بەم چڕی و بەم مەودا زۆرە بووە.

پرسیار: پاساوی كۆماری ئیسلامی بۆ تۆپبارانی ناوچە سنوورییەكان چییە؟

عەبدوڵڵا ئازەربار: پاساوی كۆماری ئیسلامی ئەوەیە كە هێزی پێشمەرگەی كۆمەڵە لەم سنوورانە جێگیرن؛ بەڵام پێشووتریش كە هێزی پێشمەرگەش لەوێ جێگیر نەبووە ئەم سنوورانە هەر بەم شێوەیە بۆردومان كراون؛ هەر وەك چۆن زۆرێك لە سنوورەكانی دیكەش بۆردومان دەكا كە هێزی پێشمەرگەی لێ نییە، دارستان دەسووتێنێ پێش بە كەسب و كاری خەڵك دەگرێ، دەیەوێ نەوارە و پشتێنەیەكی ئەمنیەتیی دروست بكات كە میلیتاریزەیە و هیچ كەس تێیدا هاتووچۆ ناكات، هەوارچی و خەڵكی كۆچەری لێ نییە، كەسابەتی تێدا ناكرێ، خەڵك، تێیدا هاتووچۆ ناكا و بەم شێوەیە كۆماری ئیسلامی
 دەیهەوێ كۆنتڕۆڵێكی زۆرتری بە سەر ئەم سنوورانەدا ببێ .

پرسیار: بۆ چی كۆماری ئیسلامی لەم هەلوومەرجەدا تۆپبارانی سنوورەكان دەكات؟

عەبدوڵڵا ئازەربار: رەنگبێ یەكێك لە هۆكارەكانی ئەوەی كە كۆماری ئیسلامی تۆپبارانی سنوورەكان دەكات ئەوەبێ كە هەرێمی كوردستان ئێستا بە ئاقارێكدا دەڕواتە پێشێ كە لە لایەكەوە پرسی رێفراندۆم لە ئارادایە و كۆماری ئیسلامی دەیەوێ زەختێكی زۆرتر بخاتە سەر هەرێمی كوردستان و لە رێگای هەرێمی كوردستانەوە بۆ سەر ئۆپۆزیسیۆنی كوردی رۆژهەڵات، دوێنێ ئاوی زەی گرتووەتەوە و زەختی خستووەتە سەر خەڵكی شاری قەڵادزێ، ئەمڕۆ تۆپبارانی سنوورەكانی كردووە، دیارە هەمیشە لەو فەسڵەدا كە پوش و گیا زەرد دەبێ دەیهەوێ ئەو سنوورانە پاك بكاتەوە و وەك باسم كرد دەیهەوێ پشتێنەیەكی ئەمنیەتی دروست بكات، لە زۆر جێگای دیكە دارستانەكان دەسووتێنێ، جێگای واش هەیە زەربی شەستێكیش نیشان دەدات، كۆماری ئیسلامی بۆیە لە رێگای تۆپبارانەوە ئەو دارستانانە ئاگر تێبەردەدات بۆ ئەوەی كۆمەڵێك فاكتۆری دیكەش بپێكێ، مەعامەلە و كەسابەت لەوێ، هاتووچۆكان لەوێ هەڵقەنێ و نیگەرانیان بكات بەوەی كە لەو سنوورانە جێگیر بن.

پرسیار: ئەم تۆپبارانە تا چەندە زەرەر و زیانی گیانی و مادی بۆ خەڵكی ناوچەكە و هێزی پێشمەرگەی كۆمەڵە بە دواوە بووە؟ و ئێوە خۆتان بۆ ئەگەری دووپاتبوونەوەی ئەم حاڵەتانە ئامادە كردووە؟

عەبدوڵڵا ئازەربار: بە داخەوە زەرەر و زیانێكی زۆری بە خەڵك گەیاندووە، ماڵ و منداڵی زۆر هەوارچی و كۆچەر سووتاوە، زەرەری كەسابەت و كاریان وێكەتووە و سنوورەكانیان لێ نائەمن بووە، كەشێكی ناخۆش دروست بووە، رەوەندەكان ناچار بوون  شوێنی خۆیان بەجێبێڵن، خۆیان كۆبكەنەوە و تووشی زیان هاتوون.
دیارە لەم رووداوە زیانی گیانیشی تێدا بووە، بە پێی دوایین زانیارییەكان ژنێكی كۆچەر بریندار بووە، دوو پێشمەرگەی كۆمەڵە لە یەكێك لە بنكەكانی كۆمەڵە برینداربوون كە ئێستا دۆخی تەندروستییان باشە.

بەڵێ، ئێمە حەتمەن لە رۆژانی داهاتوودا زۆرتر و زۆرتر خۆمان بۆ ئەگەری دووپاتبوونەوەی ئەوانە ئامادە دەكەین، ئیمە حەتمەن هەڵسەنگاندنی خۆمانمان لە سەر ئەم تۆپبارانانە هەیە و لە رووی ئەم هەڵسەنگاندنانەوە دەبێ بزانین پێویست بە چ هەوڵێك هەیە بیگرینە پێش.

پرسیار: بەرپرسیاریەتی زەرەر و زیانی گیانی و ماددی ئەم تۆپبارانە لە ئاستۆی كێیە؟

عەبدوڵڵا ئازەربار: بەرپرسیاریەتی گیانی و زەرەر و زیان لە خەڵك لە ئەستۆی كۆماری ئیسلامیە، هیچ پاساوێك نییە بۆ ئەو تۆپبارانانەی كە دەیكا لە سنوورەكان و ئێمە ئەو كارەی ئەوان مەحكووم دەكەین و بە هیچ شێوەیەك رەوایی پێ نادەین.

پرسیار: تا چەندە ئامانجی ئەم تۆپبارانە زەربە لێدان لە بنكە و بارەگاكانی كۆمەڵە بووە لەم سنوورە؟

عەبدوڵڵا ئازەربار: ئامانجی ئەم تۆپبارانەی ئەمڕۆ ئامانجدار بووە، هەر لە رووی خەسارەتهایەك كە بەر ئێمەش كەوتوون ،دیارە ئەو بە ئامانجی زەربە لێدان بە بنكەكانی كۆمەڵە و حیزبەكانی دیكەی كوردستانی رۆژهەڵات كە لەم سنوورە جێگیرن ئەم كارەی كردووە، بەڵام حزووری پێشمەرگە بە راستی پاساو و شەرعییەتێكی نییە بۆ ئەوەی ئەم تۆپبارانە بكات ئەوە بەهانەیەكە كە ئەو دەیگرێ، دیارە ئامانجی ئێمە بووە بەڵام پاساوی تۆپباران كردنی ناوچەكە ئەمە پاساوێكی نایاساییە و هیچ مەنتقێكی لە پشت نییە.

پرسیار: وەك دوایین پرسیار، كۆماری ئیسلامی لەو رێگایەوە دەتوانێ كارتی فشارێك دروست بكات بۆ كشانەوەی هێزەكانتان لە سنوورەكانی رۆژهەڵات؟

عەبدوڵڵا ئازەربار: نەخێر ناتوانێ كارتی فشارێك بێ بۆ كشانەوەی ئێمە لە سنوورەكان، ئێمە بۆخۆمان بە پلانی خۆمان چووینە ئەم سنوورانە و لە چوارچێوەی پلان و نەقشەی خۆشماندا دەگەڕێینەوە، هەر چەند بە پێی نائەمن بوونی دۆخی سنوورەكان ئارایشی ئێمەش دەگۆڕدرێ، بەڵام ئەوەی كە لە سنوورەكان بگەڕێینەوە، نەخێر؛ مومكین نییە.  


PM:01:28:04/07/2017




ئه‌م بابه‌ته 661 جار خوێنراوه‌ته‌وه‌‌


زۆرترین خوێنراو‌