لە خۆت بپرسە و هەڵسەنگاندنی بۆ بكە!

بیژەن قوبادی

ئەوا خولێكیتر لە فریودان و شانۆگەری بە ناو هەڵبژرادن لە لایەن كۆماری ئیسلامیی ئێرانەوە دەستی پێكرد. لە پێش هەموو شتێكدا و بۆ دەركەوتنی رواڵەتی راستەقینەی ئەو خۆسەپاندنە لە ژێر دەمامكی بەناو هەڵبژاردندا باسی زۆر كراوە و ئەكرێت. لێرەدابە بێ دووپات كردنەوەی باسەكانیتر، ئاماژە بە لێدوانەكانی بەرپرسانی كۆماری ئیسلامی ئەكین كە لە سەری سەرەوە تا خواری خوارەوە چ  مەبەستێكیان لە بەشداری كردنی دەنگدەران لەوە پرۆژە سوواوەدا هەیە.
عەلی خامنەیی وەكو بانترین پلە و  رێبەری ئەو رژیمە كاتێك ئەڵێت : "گرینگ نیە دەنگ بە كێ دەدەن، گرینگ ئەوەیە ئێوە لە هەڵبژاردندا بەشداری بكەن.” لەوانەیە پاساویان ئەوە بێ كە مەبەستی ئەوەیە كە بەربژێرێكی تایبەت زەق نەكاتەوە. بەڵام لە راستیدا مانای ئەو وتە ئەوەیە كە ئێوە بەشداری ئەو شانوگەریەی ئێمە بكەن، گرینگ نیە لەرسەر بەرگەكانی دەنگدان چی ئەنووسن یان هەر بە سپی ئەیخەنەوە ناو سندووقەكان، چۆن ئێمە كەسی خۆمان داناوە و پێویستمان بە ناوە نووساروەكانی ئێوە نیە و تەنیا هاتن و چوونە سەر سندووقەكان لە لایەن ئێوەوە مەبەستەكی ئێمە ئەپێكێت.
لە لایەكیترەوە كاتێك گۆی لە باسەكانی بەربژێرەكان لە سێ خولی دیبەیتەكانیان ئەكەین هەموویان باس لە قەیرانی ئاوبووری، سیاسی و كۆمەڵایەتی ئەكەن و باس لە گەندەڵیە و ناكارامەیی ئەم بەرپرس و ئەوە بەرپرسیانە هەموو تاوانەكان ئەخەنە ئەستووی لایەنی بەرانبەر و خۆیان بە بێ تاوان ئەزانن. ئەوە ئەركی من و تۆی دەنگدەرە كە لێیان بپرسین: ئێوە هەركامەتان بەرپرسی پلە بەرزی ئەوە دەسەڵاتە بوون و ئەو دۆخەی ئەمڕۆ كۆمەڵگای ئێرانی تەنیوەتەوە بەرهەمی كاری خۆتان و دەسەڵات و سیستەمەكەتانە. هەرچیەك كە هەیە بەرپرسی راستەوخۆی هەر خۆتانن. بۆیە ئەوە زاتی ئەو سیستەم و دەسەڵاتەیە كە وابێت و گۆڕێنی هیچكام لە مۆرەكانی یا جێگۆڕكێ كردن پێیان، هیچێك لە بابەتە ناگۆڕێت.
بە دڵنیایەوە هەر كار و كردەوەیەك كە لە لایەن مرۆڤەوە ئەنجام ئەدرێت، بۆ گەیشتن بە مەبەستێكی روون و ئاشكرایە و هەر كارێك كە بە بێ مەبەست و هۆكار و دەرەنجام، ئەنجام بدرێت بێگاری و كارێكی بێهودەوە ئاو لە هاوەن كوتانە.
بۆیە جێگای خۆیەتی تۆی دەنگدەر كە بە نیازی بەشداریكردن لەو بەناو هەڵبژاردنەیت، بەرلەوەی ناسنامەكەت بە دەستەوە بگریت و بۆ بنكەكانی دەنگدان بكەویتە ڕێ، ئاوڕێك بە خولەكانی پێشووتری بەشداریكردنەكەت بكەیت و وەكو بازرگانێك سوود و قازانج و دەسكەوتەكانی دەستنیشان بكەیت. هەروەها پێویستە لە هەمانحاڵدا ئەم پرسیارانە لە خۆت بكەیت:
١ـ دەرەنجامی بەشداریكردنی خولەكانی پێشووتر چی بووە؟
٢ـ ئاستی ژیان تا چەندە بە لایەنی باشیدا گۆڕاوە؟
٣ـ لە باری دابین كردنی بنەماكانی ژیان، ئاسایش و ئارامی، گەرەنتی سەقامگیریی ئابووری و كۆمەڵایەتی، پاراستنی حەوزەی ژیانی تاك و كۆمەڵ چەندە پارێزراوە؟
٤ـ كامە دەسكەوتی ئابووریی بەدواوە بووە؟
٥ـ هیوا بە ژیان و گوزەرانی باشتر چەندە پەرەی سەندووە؟
٦ـ مەترسیەكانی سەر ژیانی خەڵك و وڵات تا چەندە رەواوەتەوە؟
٧ـ جێگەوە پێگەی وڵاتەكەت لە باری ناوچەیی و نێونەتەوەیی لە چ ئاستێكدایە؟ 
٨ ـ بۆ تەنیا لە كاتی هەڵبژاردنەكاندا باس لە مافی نەتەوەكان و هەژاری و بێكاری ئەكرێت؟ بۆ لە كاتی ئاساییدا ئەو باسانە و وروژاندنیان زیندان و سزادانی قورسی بەدواوەیە؟
 هەروەها كۆمەڵێكی بەرفراوان لەو چەشنە پرسیارانە لە خۆت بكەوە وڵامیان لە لای خۆت هەڵسەنگێنە ئینجا بڕیار بدە كە بەشداری بكەیت یان نا؟
بە پێی ئەزموونی ئەم چواردەیەی، هیچكام لە بەڵێنەكانی بەربژێرەكان لە راستای بەرژەوەندی و قازانجی كۆمەڵگاوە نەچوونەتە بواری جێبەجێكردنەوە و ئەو بەڵێنانە لەم كاتانەدا ئەدرێن، تەنیە كایەیەكی بێشەرمانەیە لە گەڵ فامی جەماوەر و گاڵتە پێكردنیەتی.
بۆیە بەشداریی ئێوە و چوونە سەر سندووقەكانی دەنگدان جگە لە چەند پات بوونەوەی ئەزموونەكانی پێشووتر و خولانەوە بە دەور بازنەیەكی بێ ئاكام هیچی بەدواوە نیەوە و شەرعیەت و رەوایی پێدانە بەو هەل و مەرجەی كە بە سەرتانا داسەپاوە.


AM:11:36:15/05/2017




ئه‌م بابه‌ته 1240 جار خوێنراوه‌ته‌وه‌‌