كەمپەینێك بۆ دژایەتی لە گەڵ كردنەوەی سەفارەتی ئێران لە كانەدا دامەزرا

ئاسۆی رۆژهەڵات: مالی كورد لە كانەدا بە پشتیوانی حیزبەكانی رۆژهەڵات كەمپەینێكی كۆكردنەوەی واژۆیان بۆ پشتیوانی لە لایەحەی تەحریمی ناوەكی ئێران و مەحكوم كردنی پێشیلكاری مافی مرۆڤ لە ئیران و هەروەها نەكردنەوەی سەفارەتی ئێران لە كانەدا دامەزراندووە و لەم رێگایەوە داوا لە كوردەكانی كانەدا دەكەن ئەم داخوازینامەیە كە بۆ پاڕلەمانی كانەدا دەنێردرێت، واژۆ بكەن.

بۆ زانیاری زیاتر لەم بارەیەوە لێدوانێكمان لە بەڕێز هاوڕێ حەمید بەهرامی، چالاكی سیاسی و كادری كۆمەڵە لە كانادا وەرگرتووە.

پرسیار: هەر وەك ئاگادارن كەمپەینێك بۆ دژایەتی لە گەڵ كردنەوەی سەفارەتی ئێران لە كانەدا دامەزراوە، ئەم كەمپەینە كەی دروست كراوە؟ ئامانج لە دروستكردنی چیە و رێكخەرانی ئەم كەمپەینە كێن؟ 

حەمید بەهرامی:
 ئەم كەمپەینە لە ۲۸ی ئاوریلەوە لە لایەن مالی كورد لە كانەدا بە پشتیوانی حیزبەكانی رۆژهەڵات دەستی پێكردووە. ئەم كەمپەینە تێدەكۆشێت ژمارەیەكی بەرچاو لانیكەم پێنج هەزار واژۆ كۆ بكاتەوەو لە رێگای دوو لە پارلەمانتارانی كانەدا كە بەڵێنیان داوە بیبەنە پارلەمان بۆ پشتیوانی لە بەلگەنامەی ژمارە s-219.  ئەو بەڵگەنامە لە دەوڵەتی پێشووی كانەدا نزیكەی یەك ساڵ و نیو پێش ئێستا لە پارلەمانی كانەدا پەسەند كرا. بە پێی ئەو بەلگەنامەیە، كانەدا تەحریمی خستووەتە سەر بەرنامە ناوەكیەكانی ئێران و هەرجۆرە پەیوەندیەكی ئابووری لەگەڵ ئێران هەڵپەساند، هەروەها دەوڵەتی ئێرانی بە هۆی پێشیلكاریەكانی مافی مرۆڤ  مەحكوم كرد و باڵوێزخانەی ئێرانی بە هۆی خراپەكاری و كاری سیخۆری لە كانەدادا، داخست.

بەهاتنە سەركاری دەوڵەتی نوێ ساڵی رابردوو لەكانەدا ، دەست و پەیوەندەكانی كۆماری ئیسلامی و لابییەكانیان هەوڵیاندا كەمپەینێك بخەنەكار بۆ كۆكردنەوەی ئیمزا و لەو رێگاوە فشار بخەنە سەر پارلەمانی كانەدا بۆ هەڵوەشاندنەوەی ئەو بەڵگەنامەیەی دەوڵەتی پێشوو. كە لە لایەن پارتی كۆنسێرڤاتیڤەوە سەرۆكایەتی ئەكرا.

ئێمەش بە پێچەوانەی ئەوان پێمانوایە ئەو بەڵگەنامە لە جێگای خۆیدا بوو و هیچ گۆڕانكارییەك لە سیاسەتەكانی كۆماری ئیسلامیدا رووی نەداوەو ئەو بەڵگەنامە دەبێت وەك خۆی بمێنێتەوە. 

پرسیار: ئەم كەمپەینە تا چەندە توانیوویەتی سەركەوتوو بێ لە كۆكردنەوەی واژۆ، یا بە واتایەكیتر لە لایەن كوردانی كانەداوە چۆن پێشوازی لێكراوە و تا كەی درێژەی دەبێت؟

حەمید بەهرامی: دیارە ئەم هەوڵەی ئێمە لە رۆژەكانی سەرەتایدایە و بۆ ماوەی یەك مانگ درێژەی دەبێت و هیوادارین كە بتوانین بەو رێژە بەرچاوەی كە پێویستە واژۆ كۆ بكەینەوە بۆ پاڵپشتیكردن لەو بەڵگەنامە. ئەمە كارێكی هاسان نییە بە تایبەتی بە هۆی ئەوەی كە خەڵكی ئێمە گرنگی ئەوتۆ بەم جۆرە كارانە زۆر نادەن لە كاتێكدا ئەو رێژە لە واژۆ بێ كاریگەر نابێت و كاریگەری خۆی دادەنێت لە سەر بیروڕای پارلەمانتاران. لێرەشەوە داوا لە هەموو تاكێكی كورد دەكەم، كە ئەم بانگەوازە دەبینن، كە هاوكارمان بن و ئەم نامەیە ئیمزا بكەن. مەرج نیە لە كوێ دادەنیشێت، بە مەرجێككەسێكی حەقیقی بیت و ئیمەیلت هەبێت دەتوانی واژۆی بكەیت.

پتیشنەكە بە زمانی ئینگلیسی ئامادە كراوە،  بەڵام لاپەڕەی واژۆ كردنەكە بە پێنج زمان و زاراوە ئامادە كراوە، بۆ ئاسان كاری بۆ ئەو كەسانەی كە ئینگلیسی نازانن .  

پێویستە ئاماژە بەوە بكەم كە هەر كەسێك ئەم پتیشنە واژۆ دەكات، حەتمەن دەبێت سەیری ئیمەیلەكەی بكات و لەسەر ئەو نامەیە كە لە لایەن ماڵی كورد بۆی هاتووە كلیك بكات بۆ ئەوەی ئیمەیلەكەی كانفێرم بكات دەنا واژۆكەی بە حیساب نایەت. 

لینكی ئەو پەیجە كە دەتوانن واژۆی بكەن لە خوارەوە هاتووە:
  
https://l.facebook.com/l.php?u=https%3A%2F%2Fmalakurd.com%2F%3Ftikaname%3D1&h=ATPCQV6q3vXlZ5A-8mgkynHtxJjCyoJpKs8ZZPyya0HPexiCn6i5djEbZ1341RntQmrj7_grA_FhIHXKAYWx5FGUEC4566sW4ziqPLAIuwe_V-c9SbXjMijnb-uSR0nBI94gN8-K


AM:10:34:08/05/2017




ئه‌م بابه‌ته 159 جار خوێنراوه‌ته‌وه‌‌