سەنگەری شار، مەكۆی شۆرش

بەبۆنەی چالاكییەكانی رۆژی كۆمەڵە لە شارەكانی كوردستان
دارا قوڕەیشی

دۆشداماوكردنی دەزگای پۆلیسی سیاسیی كۆماری ئیسلامی و ئیتلاعاتی ئەو رژیمە لە شارەكانی كوردستان، پیشەی ئەو چالاك و تێكۆشەرانەیە كە بە كاری هوشیارانە و ماندونەناسانە، سەرەڕای زەخت و گوشاری بێ رادە، مەترسییەكانی بەربەرەكانێ لەگەڵ یەكێك لە دڕندەترین دەزگاكانی سەركوتی جیهان، بە گیان دەكڕن و پەیامی زیندووبوونی بزوتنەوەی رزگاریخوازی و عەداڵەتخوازی خەڵكی كوردستان بەهەموان رادەگەیەنن.
 خۆڕاگری لە بەرامبەر داگیركەر و حكومەتە گەندەڵ و زۆردارەكاندا لە سەرتاسەری گۆی زەوی خاوەن مێژووی تایبەتە. مێژووی زۆرێك لە وڵاتان كە تامی تاڵی داگیركران یان ئەزموونی ژیان لەگەڵ دیكتاتۆرەكانیان هەیە، لە زۆربەی حاڵەتەكاندا خاڵی بەرەنگاری و خۆراگری و خەباتی نهێنی و رێكخستنی شاراوە، ئەو بەشە لە مێژووەكەیانە كە نەسل بە نەسل شانازی پێوە دەكەن.
هەر بەم شێوەیە ئێمەی كورد و بەتایبەت ئێمەی كۆمەڵە جیا لە شانازییەكانمان لە بوارەكانی دیكەی خەبات و تێكۆشانی خوێناویماندا، خاوەن شانازییەكی گەورەین لە پێكهێنانی هێڵە شاراوەكانی خۆڕاگری ناوخۆدا و هەرگیز ئەو سەنگەرەمان بۆ دیكتاتۆر چۆڵ نەكرد.
هەر بە سەرنج بۆ باسی خەباتی نهێنی و خۆڕاگری ناوخۆ و رێكخستنی نهێنی بەبۆنەی چالاكییەكانی 26ی رێبەندان و رۆژی كۆمەڵەوە بە پێویستم زانی لەم یادداشتە كورتەدا چەند لایەنی ماناداری ئەو بوارە لە خەبات بدرێتە بەر باس و هاوكاتیش رێزلێنان و ماندوونەبینی كوتن بێ بەو چالاكانەی كە ئەمساڵیش بە كار و بوێری خۆیان لە شارەكانی كوردستان و بەبۆنەی رۆژی كۆمەڵەوە سەلماندیان كە كوردستان مڵكی كۆماری ئیسلامی نییە و خەڵكی كوردستان تامەزرۆی ئەو رۆژەن كە ئەو دەسەڵاتە بخەنە گۆڕی تاریخەوە.
بەپێچەوانەی ئەو جۆرە باسانە كە خەڵك و حیزبەكان لە كوردستاندا، لە دوو هێڵی جیاوازدا دەبینن، پێویستە بڵێین كە ئەم بیركردنەوەیە سەرتاسەر رەخنە هەڵگرە و هێنانەوەی نموونەی رێكخستنە نهێنییەكان بۆ سەلماندنی ئەم قسەیە بەڵگەیەكی بە هێزە.
كۆماری ئیسلامی هەرچەندە هەمووكات و بە تایبەت پاش ئەوەی بە شێوەی نیزامی توانیویەتی بوونی ئاشكرای حیزبەكان و بە تایبەت كۆمەڵە قەدەغە بكات، هەموو كات زیاتر لە بیری ئەوەدا بووە كە چۆن بیرۆكە و بیرەوەری و كولتوور و پێوەندییە دەرونییەكانی خەڵك و ئەو حیزبانە بنبڕبكات. ئەمە خولیایەكی نەزانانە بوە لەلایەن كۆماری ئیسلامییەوە چونكە سەرەڕای خەرج و باجی زۆر هیچكات تێیدا سەركەوتوو نەبووە. سەركەوتو نەبووە چوونكە ئەوە ئێستا سێ جیل بەسەر جیلی یەكەمی كۆمەڵەدا هاتووە و ئەوە زیاتر لە دوو دەیەیە كە حزوری ئاشكرامان لە شەقامەكانی كوردستان نییە بەڵام ئەی بۆ دەستە دەستە لاوان و خوێندكاران و خەڵكی تێكۆشەر و جیلی تازە پەیوەست دەبن بە ریزە نهێنییەكانی خەباتی كۆمەڵە؟
كۆماری ئیسلامی كە بە تەما بووە و هەیە كە تەنانەت دێڕبەدێڕی كتێب و دەفتەری پەروەردە لێواولێو بكات لە بابەتی ئایدیۆلۆژیكی خۆی و هیچ مەجالێكی فەرهەنگی نەدا بە بیرە جیاوازەكان، بە تایبەت لە كوردستان بە چاوی زۆر وردبینانەوە بەدواداچونی ئەوە بكات كە هەموو رێگایەك لە بیرهاتنەوەی ئەو حیزبانە بگرێت، ئەی بۆ ئێستاش پۆل پۆل لاوی تێكۆشەر بە گڕوتینەوە پێیان پەیوەست دەبن؟ تەنیا ئەم دوو نموونە چكۆلەیە لەوانەیە كافی بێ بۆئەوەی بڵێین یەكەم كۆماری ئیسلامی سەركەوتووی مەیدانی شەڕی لە بیربردنەوەی خەباتی خەڵكی كوردستان نەبووە و دواتریش ئەوە بڵێین كە رۆڵ و پێگەی تێكۆشەرانی نهێنی بەدرێژایی ئەم ساڵانەی دیكتاتۆری لە زیندوڕاگرتنی بیرۆكەی خەباتدا، رۆڵێكی بەهێز و دیارە.
خەباتی نهێنی و رێكخستنەكانی كۆمەڵە هاوكات مەیدانێكی پڕ لە ئەزمون و دژوار و راستەقینەیە بۆ بارهێنانی شۆڕشگێڕانی داهاتوو. بێگومان ئەو كەسانەی كە شارەزاییان هەبێت لە شێوازی كاری كۆمەڵە، ئەوە دەزانن كە چۆناوچۆن تێكۆشەرێك لە ریزە نهێنییەكاندا ئەزمون كۆدەكاتەوە و هێدی هێدی مەهارەتەكانی بەرەنگاری پەیدادەكات. ئەم تاكە تێكۆشەرە پاش تێپەڕاندنی ئەزموونە سەرەتاییەكان كە زۆربەی جار ئاوێتەی مەترسییە، دەبێتە شۆڕشگێڕێكی بە ئەزموون و ئەوەش لەبیرنەكەین كە هەر ئەم شۆڕشگێڕە قەرار وابووە كە لە سیستمی پەروەردەی كۆماری ئیسلامیدا بەشێوازێك باربێت كە خۆ دوور بگرێ لە بزوتنەوەی خەڵكەكەی خۆی!
چالاكی چالاكانی نهێنی لە روویەكی دیكەوە پیشاندەرەی ئەو راستییەیە كە كۆماری ئیسلامی تەنیا بە زۆر خۆی داسەپاندووە، دەنا پێگەی راستەقینەكەی لەناو جەماوەری كوردستاندا لە كەمترین ئاستی مومكیندایە.
كار و تێكۆشانی ئەو چالاكانە ئەم راستییە دەخاتەوە بیری كۆماری ئیسلامی كە ئەو تەنیا لە بنكە و بارەگاكانی سەركوتدا حاكمە نەك لە شەقام و كۆڵانەكان و نەك بەسەر زەین و خۆشەویستی و لایەنە دەرونییەكانی كۆمەڵگای كوردستاندا. هاوكات ئەم چالاكیانە ئەو راستییەش بۆ بیری خەڵك دووپاتدەكەنەوە كە دڵنیا بن بزووتنەوەكەیان زیندووە و بە رێكخستن و هاوئاهەنگیەكانی ئەو بزووتنەوەیە دڵخۆشیان دەكات و مزگێنی ئەوەیان پێدەدا كە هێڵی مقاومەت لەسەر جێی خۆیەتی.
كوڵ و كفی كاری نهێنی لەوانەیە راستەوخۆ و بە ئاشكرا رێگای چوون بۆ ناو كۆمەڵە نەخاتە بەردەم لاوانی خاوەن هەست و خەبات دۆست بەڵام بە زمانی هەست و ئیشارە ئەوە دەخاتە بیری لاوانەوە كە هەوڵبدەن بۆ پەیوەستبوون بەو خەباتەوە ئەوانیش لە ئەركی بەرەنگاربوونەوە دژی ئەو رژیمەی كە ژیان و گوزەران و وڵاتی لێ زەوت كردون، بەشداربن و شانازی بە خەبات و بەشداری خۆیانەوە بكەن.
بەم بۆنەیەوە، جێی خۆیەتی كە جارێكی دیكەش لە بۆنەی رۆژی كۆمەڵەدا هاوكات لەگەڵ ئەوە كە رێز لەو رۆژە ئازیزە دەگرین، ماندوونەبینی لەو تێكۆشەرانە بكەین كە ئاڵای سووری ئازادیخوازی و دادپەروەری و نیشتماندۆستییان لە تەشكیلاتی نهێنی و سەنگەری شاردا بەرز راگرتووە.


PM:07:25:09/03/2017




ئه‌م بابه‌ته 678 جار خوێنراوه‌ته‌وه‌‌


زۆرترین خوێنراو‌