وتووێژی هاوڕێ عەبدوڵڵا موهتەدی سەبارەت بە هاتنەسەر كاری ترامپ و كاردانەوەی لەسەر ئێران لە ڕووداو

پرسیار: هەڵسووكەوتی ترامپ لەگەڵ ئێران و بە تایبەتی لەسەر پرسی كورد چۆن دەبێت؟
وڵام: بەو شێوەیەی كە دەبینرێ لە هەفتەكانی ڕابردوودا ئەوەیە كە دەسەڵاتی كۆماری ئیسلامی ئێران ترسێكی زۆری هەیە لە هاتنە سەر كاری دەوڵەتی ترامپ لە ئامریكا و بە دیاردەیەكی موسبەت و بە كەڵكی نازانێ بۆخۆی و پێموایە ئەوە كاریگەری دەبێ لەسەر سیاسەتی ناوخۆیی ئێران، دیارە ئەمریكاش چی دەكات لەگەڵ ئێران هیچكەس وا ناڵێت و خۆشیان وا ناڵێن، گوایە ئامریكا هێرشی نیزامی دەكاتە سەر ئێران، بێجگە لەوەی ئەوكاتەی كە بزانن بە مسۆگەری ئێران بەرەو درووستكردنی چەكی ئەتۆمی دەچێت بەڵێ دەستی لێدەوەشێنێ، دەنا ئەو كارە ناكەن، بەڵام چی دەكەن؟ یەكیان ئەوەیە كە  ئەو ئاسانكارییە ئابوورییەی كە بۆ سەرمایەگوزاری و بازەرگانی و مۆعامەلەی ئێقتسادی لەگەڵ ئێران كە ئەمریكای دەورەی ئۆباما فەراهەمی كردبوو نامێنێ و ئەوە كاریگەرییەكی گەورەی لەسەر باروودۆخی ئابووری ئێران دەبێ، زۆر سزای ئابووری دەخەنە سەر ئێران بەڵام مەرج نییە لە پەیوەند لەگەڵ ڕێكەوتنی ئەتۆمیدا بێت، دەتوانێ لە پەیوەند لەگەڵ زۆر بابەتی تر وەكوو: داڵدەدانی تێرۆریزم، وەكوو دەستێوەردان لە كاروباری ناوچە، وەكوو موشەكی بالستیك، مافی مرۆڤ و زۆر بابەتی دیكە بێت.

پرسیار: لە دەوڵەتی نوێی ئەمریكادا ئەركەكانی سەر شانی كوردی ڕۆژهەڵات بە تایبەت حیزبە سیاسییەكان چییە؟
وڵام: ئێمە كاتی ئەوە هاتووە و پێویستە بەبێ هیچ مەرجێك بەرەیەكی یەكگرتووی كوردی رۆژهەڵات درووست بكەین، یانی ئەگەر ئێستا كاتی نەبێ ئیتر نازانم كەیە، زۆر لە مێژە ئەو قسە دەكەم، ئاخرین جار لە كۆنفڕانسی مێری لە هەولێر.
ئێمە پێویستە سیاسەتمان یەك بخەین، پێویستە لێكدانەوەمان یەك بخەین، پێوستە  لە بواری پێشمەرگایەتی و دیپلۆماسی و لە بواری ئەمنییەوە هەماهەنگیمان ببێت، ئەو پێویستییانە لە بەردەم ئێمەن، ئەگەر لەم قۆناغەدا ئێمە بتوانین بە یەكگرتوویی بگەین،  بە بڕوای من ئەو كاتە دەتوانین لە باروودۆخی ناوچەیی و دەرەكیش كەڵكی باش وەربگرین.

پرسیار: هاتنە سەركاری ترامپ دەتوانێ دەرفەتێك بدات بە حیزبەكانی كوردستانی ڕۆژهەڵات بۆ خەباتی زۆرتر؟
وڵام: بەڵێ چوونكە دۆناڵد ترامپ چی دەكات؟ یەكێك لە كارەكانی بێجگە لە سزا ئابوورییەكان ئەوەیە، دەستدرێژییەكانی ئێران لە ناوچەكە بێ جواب ناهێڵێتەوە و دەوەستێتەوە لە بەرانبەریان، مادامێك وابێت لەگەڵ دنیای عەرەب و ئیسرائیل و توركیە زۆرتر نزیك دەبێتەوە و هەوڵ دەدات دەستێوەردانەكانی ئێران بەربەستی بۆ درووست بكات، هەوڵ نادەن بە چەك لە ئێران بدەن، بەڵام هەوڵ دەدەن لە ناوخۆی ئێران دەستی كەسانێك كە دژبەری ئێرانن ئاوەڵا تر بێتەوە، جا ئەوە كوردە یان نەتەوەكانی ئێرانن یان ئۆپۆزیسیۆنی سەراسەرییە، بەڵێ ئەو ئەگەرە هەیە، ئەمە مسۆگەر نییە بەڵام ئەگەرێكی زۆر هەیە كە وابێت.


PM:12:05:22/01/2017




ئه‌م بابه‌ته 1058 جار خوێنراوه‌ته‌وه‌‌