نمایش كردنی سێ فیلمی كەیوان كەریمی لە سینەما سالم

ئا: ئاسۆی رۆژهەڵات

سەرلە ئێوارەی رۆژی شەممە ١٧ی دیسەمبەر، سێ فیلمی دەرهێنەری كوردی كوردستانی رۆژهەڵات، كەیوان كەریمی لە سینەما سالم لە شاری سولەیمانی نمایش كران. 
بەرنامەكە كاتژمێر ٨ی ئێوارە دەستی پێكرد و سەرەتا رەوەز حەمە ساڵەح بەڕێوەبەری ناوەندی غەزەڵنووس و سینەما سالم، باسی لە كارەكانی كەیوان كەریمی كرد و گرینگی بڵاو بوونەوەی ئەم فیلمانە لەم كاتەدا كە كەیوان بە هۆی دەرهێنانی فیلمی "نووسین لە سەر شار" لە زیندانە. هەروەها لە لایەن سینەم سالمەوە داوا كرا كە سینەماكاران و هونەرمەندان پشتیوانی ئەم هونەرمەندە بكەم كە ئێستە لە زیندانەكانی كۆماری ئیسلامیدایە. 
دوای قسەكانی رەوەز حەمە ساڵەح، سەرەتا فیلمی "نووسین لە سەر شار" بڵاو كرایەوە. فیلمی نووسین لە سەر شار فیلمێكی گرافیكیە كە لە رێگای دروشم و نووسینەكانی سەر دیوارەكانەوە مێژووی ٤ دەیەی ئێران و رەنگدانەوەی سیاسەت لە سەر دیوارەكانی دەگێڕایەوە.
ئەم فیلمە كە دەكرێت بە فیلمێكی دێكۆمێنتاریش ناوی ببەین، گێڕانەوەكانی خۆی لە سەردەمی پاشایەتی و خەبات بۆ نەمانی پاشایەتی و نووسراوەكانی سەر دیوارەكانەوە دەست پێكرد. لەم سەردەمەدا دیوار ببوو بە سەكۆی خەڵك بۆ بۆ دەربڕینی ناڕەزایەتییەكان و ئەوەی كە شەقام و دیوار شان بە شانی یەك دەڕۆشتنە پێش و رەنگدانەوەی ویستی شەقام لە سەر دیوارەكان دەبینرا. هەروەها دیوارەكان ببوو بە شوێنی وەرگرتنی هەواڵ بۆ خەڵك، وەك كەسێك بە وتووێژ لە گەڵ هەواڵنێرییەك بە زمانی ئینگلیزی باس لەوە دەكات ئەوان متمانەیان بە هەواڵەكانی رادیۆ و تەلەفیزیۆن نییە، متمانەیان بە هەواڵی سەر دیوارەكانە.
دوای هاتنە سەركاری رژیمی ئیسلامی و هەر لە سەرەتاوە هەوڵدرا بۆ یەكدەست كردنی نووسراوەكانی سەر دیوارەكان و لە گەڵ هەوڵدان بۆ دەستەمۆ كردنی خەڵك هەوڵی دەستەمۆ كردنی دیوارەكانیش درا. بەڵام تا دەستپێكردنی جەنگی ٨ ساڵە، دیوار هیشتا شوێنی ململانێ حیزبی و سیاسییەكان بوو. جەنگی ٨ ساڵە هەموو دیوارەكانی یەك دەست كرد. رەسم و وێنەی كوژراوەكانی جەنگ و دروشمەكان بۆ هاندانی جەماوەر بۆ چوونە جەنگ جێگەی ململانێ سیاسییەكانی گرتەوە. دیوارەكان تا كۆتایی هاتنی جەنگی ٨ ساڵە بە رەسمی كوژراوانی جەنگ رەنگێندرابوون. دوای جەنگی ٨ ساڵە دروشمەكان گۆڕان، ئاوەدان كردنەوە و دروشمی ئاوەدانی بوو بە دروشمی سەر دیوارەكان. دوای هاتنە سەركاری خاتەمی دروشمەكان گۆڕان و دیوارەكانیش هەروەها. پڕۆپاگەندە و ریكلام بۆ كۆمپانیا و كاڵاكان بوو بە دروشمی زاڵی سەر دیوارەكان. سەردەمی ئەحمەدی نژاد سەردەمێك بوو كە دەیویست دروشمە بونیادییەكانی رژیم بباتەوە بۆ سەر دیوارەكان. دیوار هەمدیسان ببێتەوە بە شوێنی سیاسەت نەك بازرگانی. وێنەی رێبەرانی كۆماری ئیسلامی كە دەم بە بزە و پێكەنین بوون و هەروەها جۆری كێشانەوەی رەسمی كوژراوانی جەنگی ٨ ساڵە و نووسینەوەی دروشمە سەرەتاییەكان بوون بە رەنگ و نووسراوەی زاڵی سەر دیوارەكان. دیوارێكی دەستەمۆ كراو كە لە لایەن دەسەڵاتی زاڵەوە دەنەخشێندرێ.
سەردەمی ناڕەزایەتییەكانی دوای دەوری دەیەمی هەڵبژاردنی سەرۆك كۆماری، ئەو سەردەمەی كە بە سەردەمی بزووتنەوەی سەوز ناسراوە، دیوار جارێكیتر بووەوە بە پانتای كێشە سیاسیەكان و رەنگ و بۆی سیاسەتی گرتەوە. درووشمی بژی و بمرێ و ... جارێكیتر هاتەوە سەر دیوارەكان.
دوای سەركوتی ناڕەزایەتییەكان، دیوار لە مانا سیاسییەكەی دوور كەوتەوەو نهێلیزم و سروشت گەرایی بوو بە رەنگی زاڵی دیوارەكان، گەڕانەوە بۆ گوند و ژیانی سرووشتی، وەك ئەوەی هەموان لە شار و درۆ ژیانی شار بێزار بن و لە ناو ئەو ژینگە پیسەوە گەڕانەوە بۆ ژینگەی خاوێن ببێت بە فەنتازیای زاڵ. هەرچەند گرافیتییەكان، لێرەدا وەك هێزێكی نووستوو لە ناو شار هەوڵیان دەدا سیاسەت بگەڕێننەوە بۆ سەر دیوارەكان، بەڵام ئەوان ناچارن وەك چریكەكان دەم و چاویان داپۆشن. 
بە گشتی ئەم فیلمە گێڕانەوەی ئەو چوار دەیە و رەنگە زیاتریش- چون هەندێ جار دەگەڕایەوە بۆ سەردەمی مەشرووتەش-لە مێژووی ئێران. بەڵام لە كۆتاییدا دەیگوت پێویستە بمیزێن بە سە هەموو شتدا، یانی رەخنە و بە ژێر پرسیار بردنێكی رادیكاڵ  و بونیادی سیاسەت.
دوای فیلمی "نووسین لە سەر شار" دوو كورتە فیلمی "ژیانی ژن و پیاوی كرێكار" و "ژیان لە سەر سنوور" لە دەرهێنانی كەیوان كەریمی نمایش كران. دوای نمایش كردنی فیلمەكان بەشداربووانی ناو سینەماكا بە واژۆ كردنی نامەیەكی پشتیوانی، پشتیوانی خۆیان لەم سینەماكارە دەربڕی.
جێگەی ئاماژەیەك كەیوان كەریمی كە سینەماكارێكی خەڵكی بانەیە لە  رۆژهەڵاتی كوردستان، دوای دروستكردنی فیلمی "نووسین لە سەر شار" بە ٦ ساڵ زیندانی كردن و ٢٢٣ زەربە قەمچی مەحكووم كرا كە دوای پێداچونەوە حوكمەكەی داشكا بۆ ١ ساڵ زیندان و ٢٢٣ زەربە قەمچی و لە ئێستادا لە بەندی ٨ ی زیندانی ئێوین دەستبەسەرە.
 


AM:09:24:18/12/2016




ئه‌م بابه‌ته 386 جار خوێنراوه‌ته‌وه‌‌


زۆرترین خوێنراو‌