ڕاپۆرتێكی كورت لە یەكەمین كۆنفڕانسی ڕێكخراوی كۆمەڵەی ژنانی ڕۆژهەڵات لە دەرەوەی وڵات

ئامادەكردنی: ژیان خۆشپەیام

ڕۆژی شەممە ١٩ی نوامبەری ٢٠١٦ی زاینی، یەكەمین كۆنفڕانسی ڕێكخراوی كۆمەڵەی ژنانی رۆژهەڵات لەژێر دروشمی "بوونی ژنان لەڕیزی خەباتدا پێشاندەری سیمای ئازادیخوازانەی بزووتنەوەی كوردییە" بە بەشداری بەرچاوی چالاكانی مافی ژنان و یەكسانیخواز لە شاری ڕۆتێردامی وڵاتی هۆلەنددا بەڕێوەچوو.
كۆنفڕانسەكە بە ساتێك بێدەنگی بۆ یادی ژنان و پیاوانی گیانبەختكردووی ڕێگەی ئازادی و یەكسانی دەستی پێكرد، پاشان سۆهەیلا بابەك وەك پێشكەشكاری كۆنفڕانسەكە چەند پەخشان و شێعری تایبەت بە ژنان و مێژوویەكی كورت لە چۆنییەتی درووستبوونی ڕێكخراوی كۆمەڵەی ژنانی ڕۆژهەڵات و چۆنیەتی دامەزراندن و ئەركەكانی و كورتەیەك لە چالاكییەكانی ئەم چەند ساڵەی پێشكەش كرد. جێی باسە كە نوێنەرانی چەندین ڕێكخراو و چالاكی بواری ژنان لە هۆلەند، لەم كۆنفڕانسەدا بەشداربوون كە چەند كەسێكیان لەسەر داوای خۆیان چەند باسێكیان بە زمانی ئینگلیسی پێشكەش كرد. لە كۆنفڕانسەكەدا خاتوو ئیریس سخێلف هاود بە نوێنەرایەتی ڕێكخراوی یو.ئێن.پی ئۆ، باسێكی پێشكەش كرد. خاتوو كلێرە فیلیپۆ، كارناسی ماڵی و نووسەر، بە نوێنەرایەتی حێزبی كار لە وڵاتی هۆلەنددا باسێكی پێشكەش كرد، هەروەها خاتوو ئیرا ستام بە نوێنەرایەتی ڕێكخراوی پاساژەوە باسێكی پێشكەش كرد. شایانی باسە هەر كام لەم خاتوونانە خۆشحاڵی خۆیان دەربڕی لە بەشداری لەم كۆنفڕانسە و وێڕای پشتیوانی، هیوای بەردوامیان بۆ ڕێكخراوی كۆمەڵەی ژنانی ڕۆژهەڵات و كاری هاوبەشی دوولایەن خواست.
پاش پاوسێكی بچووك، كۆنفڕانسەكە بە پانێلی یەكەم كە لەلایەن حەمید شەریفییەوە بەڕێوەبرا، درێژەی پێدرا. پانێلەكە بە باسی هاوڕێ ناهید بەهمەنی، بەڕێوەبەری ڕێكخراوە جانبییەكانی كۆمەڵە، سەبارەت بە ڕۆڵ و گرنگیپێدان بە بەشداری ژنان واتە بە تواناكردنی ژنان لە بەشداریكردن لە سیاستدا، دەستی پێكرد. پاشان دوكتر ئەسعەد ڕەشیدی باسێكی لەسەر ڕۆڵی ژنان لە پەیوەندی نێودەوڵەتیدا پێشكەش كرد. لە كۆتایی پانێلی یەكەمدا خاتوو عێسمەت سۆفی باسێكی لە ژنانی ناوداری جیهان لە مێژوودا كرد و پاشان بەشداربووان تێبینی و پرسیاریان سەبارەت بە باسەكان پێشكەش كرد. پاشان پاش نیوەڕۆ بە نەریتی ڕێكخراوی كۆمەڵەی ژنانی ڕۆژهەڵات، كۆنفڕانسەكە بە ڕێزگرتن لە ژنێكی چالاك و تێكۆشەری كوردی ڕۆژهەڵات بە ناوی هاوڕێ عەتیە مێعمارپوور دەستی پێكرد. لە درێژەدا چەند پەخشانێك لەلایەن بەڕێز كەژاڵ عەلی، شاعێری كورد، پێشكەش بە بەشداربووان كرا. پانێلی دووهەمی كۆنفڕانسەكە لەلایەن هاوڕێ ژیان خۆشپەیامەوە وەك بەڕێوەبەری پانێل دەستی پێكرد و بە باسی هاوڕێ دڵنیا ڕەحیمزادە، دەستەی بەڕێوەبەری ڕێكخراوی كۆمەڵەی ژنانی ڕۆژهەڵات، دەستی پێكرد. هاوڕێ دڵنیا بە نوێنەرایەتی لە ڕێكخراوی ژنانی ڕۆژهەڵات، پلاتفۆرمێكی بۆ پشتیوانی لە هاوڕەگەزخوازان و شكاندنی ئەو تابۆیە پێشكەش بە بەشداربووان كرد. لە درێژەی پانێلی دوهەمدا شەهاب شێخی باسێكی سەبارەت بە " حێزبایەتی، كوردایەتی، ژنایەتی" پێشكەش كرد. پاشان موحەمدسینا ئەمانی باسێكی سەبارەت بە ڕەنگدانەوەی كەسایەتی ژن لەنێو چیرۆك و ئەفسانەی كوردیدا باس كرد و لەكۆتایدا بەشداربووان تێبینی و پرسیارەكانیان سەبارەت بە باسەكان پێشكەش كرد.
لەدرێژەدا حەمید شەریفی، شاعێر و نووسەری كورد، باسێكی سەبارەت بە پرسی هاوڕەگەزخوازان پێشكەش كرد و باسی لەوەش كرد كە پێشتر داوای لە لایەنێكی تر كردبوو بۆ پێشكەشكردنی ئەم باسە یان لانیكەم خوێندنەوەی شێعرێك بۆ پشتیوانی لە هاوڕەگەزخوازان، بەڵام بەداخەوە ڕازی نەبوون لەسەر باسكردنی و هەروها خۆشحاڵی خۆی دەربڕی بۆ ئەوەی لایەنێك بەشێوەی ڕەسمی پشتیوانی لەم بەشە لە كۆمەڵگەش كرد لە درێژەدا شێعرێكی بەناوی "هاوڕەگەزخوازان بگرین بۆ خۆتان" پێشكەش كرد.  پاشان خاتوو جەمیلە میرەكی، ئەندامی حێزبی كۆمۆنیستی كرێكاری ئێران، باسێكی سەبارەت بە ژنان بە زمانی فارسی پێشكەش كرد.
خاتوو فەزیلە شۆڕش، بەرپرسی ئۆفیسی ئۆروپای یەكێتی ئافرەتانی كوردستان، باسێكی پێشكەش كرد و لە میانەی باسەكەیدا جەختی كردەوە لەسەر یەكدەنگی و یەكڕیزی ژنانی چوارپارچەی كوردستان. لەدرێژەدا هاوڕێ سۆهەیلا بابك، دەستەی بەڕێوەبەری ڕێكخراوی كۆمەڵەی ژنانی ڕۆژهەڵاتی بە بەشداربووان ناساند كە بریتیی بوون لە هاوڕێیان بەهار ئێسماعیلپوور، لیمۆ بایزیدزادە، ژیان خۆش پەیام، كەژاڵ ئیلخانیزادە، پەری كەمانگەر و دڵنیا ڕەحیمزادە. لەكۆتاییدا، كۆنفڕانسەكە بە پەیامی هاوڕێ ناهیدی بەهمەنی، وەك بەرپرسی ڕێكخراوە جانبیەكانی كۆمەڵە، كۆتایی پێهات و لە كۆتایی كۆنفڕانسەكەدا هاوڕێ گوڵێ قوبادیپوور، لەلایەن ڕێكخراوی كۆمەڵەی ژنانی ڕۆژهەڵاتەوە سپاسی هەموو ئەو هاوڕێیانەی كرد كە ئەو رۆژە بەتەواوی ئەرك و زەحمەتەكانیان لەسەر شان بوو. 


PM:08:11:09/12/2016




ئه‌م بابه‌ته 814 جار خوێنراوه‌ته‌وه‌‌