شكاندنی تابۆكان

دڵنیا رەحیمزادە

لەم بابەتەدا دەمەوێ باسێكی كورت بكەم لە كەمینەیەك لە كۆمەڵگە كە تا ئێستاكەش لە زۆربەی وڵاتان و كۆمەڵگەكان، باسكردنی بڤەو تابۆیە. لە هەندێك لە كۆمەڵگەكان ئەم تابۆیە شكاوەو تا ڕادەیەك باسی لێ ئەكرێت. ئەمڕۆكە ئەمەوێ چاوپێخشاندنێكی كورت بكەم لەسەر مەوزوعی هاوڕەگەزخوازەكان و جۆرەكانیان و پێگەیان لە كۆمەڵگەی ڕۆژئاوا و هەروەها پێگەیان لە كۆمەڵگەی ڕۆژهەڵاتی ناوەڕاست و بەتایبەتی كۆمەڵگەی ئێران و كوردەواری. من زۆر خۆشحاڵ ئەبوم كە كەسێك كە خۆی هاوڕەگەزخوازە بێت و لێرە ئەم باسە بێنێتە ئاراوە بەڵام، بەداخەوە دوای چەند هەوڵێك نەمتووانی كەسێك كە كورد بێت یان كوردی بزانێت ڕازی كەم، هەربۆیە بە ئەركی خۆمی ئەزانم كە وەك چالاكێكی بواری ژنان و سیاسەت ئەم باسە بێنمە ئاراوەو هەوڵ بدەم چیتر ئەم باسە تابۆ نەبێت. 
لە ڕاستیا من هەوڵم ئەوەیە كە دێگەرباشانیش وەك بەشێك لە كۆمەڵگە ببینرێن و وەك باسێكی پزیشكی و ئینسانی و دەروونناسی خوێندنەوەی بۆ بكرێت. بە تایبەتی ئەحزابی كوردستانی ڕۆژهەڵات هەوڵ بدەن بۆ شكاندنی ئەم تابۆیە.
لەم بابەتەیا  تێئەكۆشم پێناسەیەكی كورت لەم بارەوە بكەم و لەهەمانكاتدا دەستنیشانكردنی كێشە و گیروگرفتە كان و كۆماری ئیسلامی ئێران چۆن هەڵسوكەوت ئەكات لەگەڵ هاوڕەگەزخوازەكان؟ دیدی كۆمەڵگەو كێشەو گرفتەكانیان و چی ئەبێ بكرێت بۆ ئەوەی ئەم تابۆیە بشكێت و ئەم بەشە لە كۆمەڵگەش ببیندرێن و چیتر نەترسن لەوەی كە بوونیان هەیە؟ واتا، رێگە چارەو پێشنیارەكان...

سەرەتای بابەتەكەم بە ناساندنی گ.ل.ب.ت دەست پێ ئەكەم. 
(گ.ال.ب.ت) بە كەسانێك ئەوترێت كە مەیل و حەزی جنسیی جیاوازلە ‌غەیر هاوڕەگەزخوازەكانیان هەیە كە لە فارسیا بە دگرباشان ناو ئەبردرێت. دێگەرباشان چەند جۆریان هەیە كە بریتیین لە هاوڕەگەزخوازە پیاوەكان (گەی)، هاوڕەگەزخوازە ژنەكان (لێزبیەن)، دووڕەگەزخوازەكان (بیسێكسواڵ) و ترانسجەندەر كە وشەی گ.ال.ب.ت كورتكراوەی ئەم وشانەیە.

هاوڕەگەزخوازە پیاوەكان (گەی)
بە پەیوەندی هەست و سۆزو جنسی نێوان دوو پیاو ئەوترێت هاوڕەگەزخوازی پیاوان، كە لە زمانی ئینگلیسیدا بە گەی ناوی لێئەبردرێت. ئەم دەستەواژەیە لە ساڵی ١٩٢٠ی زاینی پەرەی سەند و بوو بە باو. هاوڕەگەزخوازی نێوان پیاوان لە نوسراوە ئایینیەكاندا بە لەوات كە لە قورعاندا ئەیگەڕێننەوە بۆ قەومی لوت كە كەوتوونەتە بەر عەزاب و سزای خوا، ناوی لێ ئەبردرێت. 
بیسێكسواڵ،  ترانسجەندەر، ترانسێكشواڵ، ترانسڤێستتەیت  transvestite ، ئاندرۆگین، جەندەركویەر،

 لێسبین؛
بە پەیوەندی هەست و سۆز و جنسی نێوان دوو ژن ئەوترێت هاوڕەگەزخوازی ژن یان لێسبیەن. پێناسەی ڕەگەزی هەر كەسێك یاخود سێكسوالیتی هەر كەسێك لانی كەم پەیوەندی بە سێ هۆكاری موجەزاو مۆرتەبێت بە یەكەوە هەیە كە بریتین لە جنس یاخود سێكس، ڕەگەز یان جەندەر و هەروەها مەیلی جنسی واتا سێكسواڵ ئۆریەنتەیشێن. جنسی دابەشكردنی مرۆڤەكان لە دوو گرووپی ژن یان پیاو پێك دێت كە هەر كەس بە پێی بیولۆژیكی یان ئەكەوێتە ئەكێك لەم دوو گرووپە یان لە نێوان ئەم دوو گرووپە پێناسە ئەكرێن. بۆ پێناسە كردنی جنس، پێناسەی جنسی كرۆمۆزۆمەكان، جنس غۆدەدی، جنسی هۆرموونی، پێكهاتە لاوەكییە كانی توو خستنەوە یان تەولیدی مێسل و ئەندامی تەناسۆلی دەرەكی كەسەكە ئەبێت لەبەرچاو بیگیرێت، هەربۆیە تەنیا بە پێی جۆری كرۆمۆزۆمە جنسییەكان یان ئەندامە دەرەكییەكان ناكرێت ڕەگەزی كەسێك دیاری بكرێت.

مێژووی لێسبیەن
لە یۆنان دوورگەیەك هەیە بە ناوی لێزبوس كە شوێنی ژیانی ژنە شاعیرێكی بەناوبانگی سەدەی شەش بە ناوی سوفۆیەو شێعر لە وەسفی ژن و پیاو بە تایبەت عەشق بە ژنان ئەڵێت، هەربۆیە كاتێك لە سەدەی نۆزدە نەیانتوانی ووشەیەكی تایبەتیان بۆ هاوڕەگەزخوازی ژنان بدۆزنەوە، خەڵك بۆ ئاماژەدان بە ووشەی هاوڕەگەزخواز، ئاماژەیان بە سوفۆ و شوێنی  ژیانی داوەو ئێستاكە و بە مروری زەمان بووە بە وشەی لێسبیەن كە لە هەموو دوونیا بۆ وشەی هاوڕەگەزخواز بە كاردێت. 
تریبادیسم دەستەواژەیەكە كە بۆ شێوەی پەیوەندی سێكسی نێوان دوو ژن بەكار دێت كە بە عەرەبی بە موساحێقە ناوی لێ ئەبردرێت. هاوڕەگەزخوازی ژنان بە واتای لێزبیەن یەكەم جار لە زمانی سێكسۆلۆژیستەكانی سەدەی نۆزدەو بیستەوە سەری هەڵدا. 

لێزبیەنەكان لە جیهاندا؛
ئۆسترالیا، ئامریكای باشوور و لە ئەوروپاش دوای ئێسڵاحی قانوونی قیبرێسی باشور وەك ئاخرین وڵاتی ئەوروپا، لە هیچكام لەمانە، وڵاتێك نییە بە پێی یاسا هاوڕەگەزخوازی تاوان بێت. لە زۆربەی وڵاتان ئەوروپی لەگەڵ ئەوەی هاوڕەگەزخوازی تاوان نییە و بە رەسمییەت ناسراوە، هاوكات كاریان كردوە یان خەریكن كار ئەكەن بۆ یاسای تایبەت بۆ پشتیوانی لە هاوڕەگەزخوازەكان. بەڵام لە زۆربەی وڵاتانی ڕۆژهەڵاتی ناوەڕاست بە هۆی شەریعەت و یاسا ئایینیەكان، هاوڕەگەزخواز بوون تاوانە و بەرخوردی پێئەكریت لە ڕۆژهەڵاتی ناوەڕاست هاوڕەگەزخوازەكان هیچ ئازادییەكیان نیە. 
لە ئێستادا هاوسەرگیری هاورەگەزخوازەكان تەقریبەن لە ١٦ وڵاتی دونیا یاساییە. هەروەها ڕێكخراوی نەتەوە یەكگرتووەكان، راگەیاندنی پشتیوانی لە مافی كەمینە جنسییەكانی بڵاو كردوەتەوەو تا ئێستا ٩٤ وڵاتی ئەندام لە ڕێكخراوی نەتەوە یەكگرتووەكان ئێمزایان كردوە بەواتای ئەوەی مافەكانیان لە بەرچاو ئەگیرێت. 

ئێران و هەڵسوكەوت لەگەڵ هاوڕەگەزخوازەكان؛
لە ئێران بە پێی یاسا هاوڕەگەزخوازی ژنان لە ژێر ناوی موساحقە واتە هاوڕەگەزخوازی ژنان، تاوانە. بە پێی شەریعەت بە تایبەت شەریعەتی شیعە كە یاسای ئێران لەسەر ئەو بنەمایە داڕێژراوە، موساحقە واتە هاوڕەگەزخوازی ژن و لەوات واتە هاوڕەگەزخوازی پیاوان بە یەك ڕێژە مەحكومە. بۆ ژن حوكمی بەردەبارانی هەیەو بۆ پیاوان لە سەربەرزاییەوە فڕێدانە خوارەوەیە و لە یاساكەشدا ئاماژە بەوە كراوە لە جیاوازییەك نییە لە نێوان فاعێل و مەفعول یان كافر و موسوڵمان بەو مانایەی لە وڵاتی ئیسلامی هەر جووتێك لە هاوڕەگەزخوازەكان سزای مردنە. لە یاسای ئێران بە پێی مادەی ١٣٤ ی قانون موجازاتی ئیسلامی، هەركاتێك دو ژن كە هیج پەیوەندی خزمایەتییان بە یەكەوە نییە بە بێ هۆكارێكی زەروری، بە ڕووتی لە شوێنێك بن، بە ١٠٠ زەربە شەلاق مەحكوم ئەكرێن و ئەگەر ئەمە ٣ جار دووپات بێتەوە، سەری چوارەم جار سزاكەیان كوشتنە. 
لە ئێرانی ژێر دەسەڵاتی كۆماری ئیسلامی كە هەموو جومگەكانی دەسەڵات و بە تایبەتی سێ وەزارەتخانە و دەزگای بەهێزی وەك وەزارەتی ئیرشادی ئیسلامی، وەزارەتی ئاموزش و پەروەرش و دەزگای دەنگ و ڕەنگ یان سداوسیما وەك سێ ناوەندی بەرهەمهێنانی كولتور، تا ڕادەیەكی بەرچاو لە ئاراستەكردنی ڕێچكەی كولتووری و فەرهەنگی سەركەوتوو بووە و پێڕەوی لە كولتووری كۆن و دواكەوتووانەی ئیسلامی لەناو چین و توێژە جیاجیاكانی كۆمەڵگا یەكێك لە كێشە هەرە سەرەكییەكانی ئەم كەمایەتییە جنسییانەیە.
كوردستانی ئێرانیش وەك بەشێك لەو كۆمەڵگەی كە ئەمڕۆكە بە پێی شەریعەت و یاسای ئیسلامی سیستمی كۆماری ئیسلامی ئێران بەڕێوە دەچێت، هاوڕەگەزخوازەكان لەگەڵ دوو كێشەی گەورەی یاسایی و كولتووری بەرەوڕوون. 
بۆچوون و دیدی ئیسلامی بۆ هاوڕەگەزخوازەكان بەپێی دەقەكانی قوئان و سونەت و حەدیست و تەفسیرەكان،  ئینكار و لەناوبردنیان بووە. وەك ئەوەی ئەگەر هەموو ئێمە مەخلووقی خوداین، ئەم كەمینەیە (هاوڕەگەزخوازەكان) ناقسولخێلقەن و دەسەڵاتدارانی شەریعەتی ئیسلامی ڕاسپێردراون بۆ ئەوەی كە هەڵەی خودا ڕاست بكەنەوە و لەناوبردنیان یەكەمین و دوا ڕێگەچارە بووە. 
لە كوردستانی خۆشمان كەمینەیەك لە كۆمەڵگا  لە ژێر تەئسیر و كاریگەرییەكانی دید و كولتووری ئایینی هەموو كات بە شتێكی عەیبە، نەنگ و مایەی سەرشۆڕی ناوزەد كراون، بۆیە بەردەوام خۆشیان خۆیان تەریك خستۆتەوە، خۆیان شاردۆتەوە و زۆر جاران ئینكاری دەروونیاتی خۆیان كردووە. هەبووە ساڵەهای ساڵ حاشای لەو مەیلە دەروونییەی خۆی كردووە. 
هەر كام لە ئێمە دوور و نزیك تەجرووبە و ئەزموونێكمان لە بەرەوڕوو بوونەوە لەگەڵ ئەو كەمینەیە هەبووە و تاڕادەیەك لەوبارەیەوە لەگەڵ كێشە و گیروگرفتەكانیان ئاگادارین بەڵام پێمخۆشە چەند قسەیەك لە زمانی چەند كەسێكەوە بگێرمەوە. بە پێی قسەی یەكێك لە ناوخۆی كوردستانی ڕۆژهەڵاتەوە كە نەیویست ناوی ئاشكرا بێت، باسی لەوە دەكرد كە كاتێك زانی هاوڕەگەزخوازە نەیوێرا لە هیچ شوێنێك باسی بكات، ناچار بوو شوو بكات بەڵام ساڵها كێشەی بوو لە گەڵ مێردەكەی. ئەو ئێستا لە مێردەكەی جیا بووەتەوە بەڵام هێشتاكەش ئاسەواری دەستدرێژیەكانی لە ناخدا ماوە. ئەو خانمە باسی لەوە ئەكرد كە نەیوێراوە بە بنەماڵەكەی بڵێت و ئێستاكەش بە شێوەی نهێنی هاوڕەگەزخوازە. پرسیارم لێكرد خەڵك چۆنن لەگەڵت؟ وتی زۆر باشن چۆنكە نازانن من هاوڕەگەزخوازم پێیان وایە بێوەژنێكی بە ئەدەبم و خەریكی پەیوەندی لە گەڵ ئەم پیاو و ئەو پیاو نیم. لێم پرسی چۆن هاوڕەگەزخوازێكی تر وەك خۆت دۆزیوەتەوە بە لەبەرچاو گرتنی نهێنی بوونی دۆخەكە؟ لە وڵامدا باسی ئەوەی كرد كە كاتێك بۆ دەرسخوێندن ناچار بووە بڕواتە خابگا و لەوێ لەگەڵ كچێك كەم كەم پەیوەندییان گرت و دواتر زانیویانە هەستێكی تایبەت و جیا لە ڕفاقەتیان هەببوە بۆ یەك و دوای ساڵهاو دوای جیا بوونەوە لە مێردەكەی دووبارە دیداریان تازە كردەوەو ئێستاكەش پەیوەندییان هەیە بەیەكەوە. (هەوڵم دا لەگەڵ ئەو ڕفێقەشی گفتوگۆیەك بكەم بەڵام، رفێقەكەی حازر بە قسە كردن نەبوو).
هەر لەوبارەوە لەگەڵ كچێكی تر لە ئۆرووپا قسەم كرد، ئەو ئێستا لە وڵاتێكی ئازاد ئەژی باسی لە كراوەیی دایكی كرد. وتی خوشك و براكانم زۆر زوو بۆیان هەزم بوو و قەبووڵیان كردم. وتی دایكم زۆر مێهرەبانە ئێستاش جار جار لەگەڵ ڕفێقەكەم دەعوەتمان ئەكات. بەڵام لە خزم و كەسم تا ئێستا كەسێكی وا نەبووە بۆی قبووڵ كرابێت و بە ئاسایی وەریگرتبێت. ئەو خانمە وتی؛ من لە كاتی پێگەین و هەرزەكاریەوە هەستم كرد و زانیم كە لێسبیەنم و كاتێكی ئێگجار زۆری خایەند كە دەوەروبەریەكانم تێگەیەنم كە ئەمە شتێكی ئاساییە. خزمو كەسەكانم زۆربەیان لە دەرەوەی وڵاتن و زۆریشیان خۆیان پێ رۆشنبیرە بەڵام تا ئێستاكە تەنیا یەك دوو كەس منیان بەم شەرایەتەوە قبوڵ كردووە. 
ئێران یەكێك لە ٧ وڵاتی جیهانە كە هاوڕەگەزخوازی بە پێی یاسا سزای مەرگی هەیە، بە پێچەوانەی وڵاتانی ئازاد كە هاوڕەگەزخوازییان پێ مەیل و گرایەشێكی ئاسایەو بە پێشكەوتنی عێلم بەوە گەیشتوون هاوڕەگەزخوازی نەخۆشی نییە. ئێران ئێستاكەش هاوڕەگەزخوازی پێ نەخۆشییەو پێی ئێنحرافی جنسییەو تاوانە. بەڵام هەڵسوكەوتی كۆماری ئیسلامی ئێران لە گەڵ چەند سێكشواڵەكان جیاوازە. دوای فتوای خۆمەینی كە بە ئەو ئاشۆفتێگی جێنسی ناوی لێ بردوون، لە ئێران ئیزنی نەشتەرگەری بە ترانسەكان دراوە. بە پێی بڵاوكراوەكان ٤٥٪ لەو كەسانی نەشتەرگەریان كردوە چەند سێكشواڵ نەبوون و تەنیا لەبەر تیروتانەی بنەماڵە و كەسە نزیكەكانیان و دەستەبەری كەمێك ئازادی زیاتر حازر بوون نەشتەرگەری بكەن. ئەو كەسانەی نەشتەرگەریان كردوە، پاش نەشتەرگەریەكە وتوویانە كە بەڕاستی زۆر زەحمەتە لە وڵاتێك بژی كە بڕوای بە جیاوازییەكان نیەو ئەو جیاوازییە بە نەخۆشی بزانێت و بەشێك لە كۆمەڵگەش لەبەرچاو نەگرێت و حاشایان لێ بكرێت. لەم بارەوە ئەو كەسەی كە لە ئۆروپا ئەژی وتی كە هەموو هاوڕەگەزخوازەكان نەشتەرگەریان پێ چارەسەر نییە و تەنانەت پێیان تەوهینە. كەسێك كە لێسبیەنە بە مانای ئەوە نیە كە خۆی بە پیاو ئەزانێت و ئەیەوێ لەگەڵ ژن پەیوەندی بێت بۆیە نەشتەرگەری پێ ڕێگە چارە نییە. 
لەگەڵ كەسێك قسەم كرد كە بە ئەسڵ خەڵكی شاری سنەیەو ئێستاكە لە توركیە ئەژی و كاردانی خەبەرنگاری و لیسانسی مەدەدكاری ئێجتماعی لە تاران گرتووەو چەندساڵێكیش هەر لە تاران كاری كردووە. ئەو كەسە گەیە و لە كاتی گێڕانەوەی بیرەوەرییەكانیە باسی لەوە كرد كە لە كاتی مناڵی و هەرزەكارییەوە هەستی بەوە كرد كە لە هاوكلاس و براكانی لە باری هەست و سۆزەوە جیاوازە. باسی لەوە كرد كە بنەماڵەكەی ئاگادارن بەڵام دایكی بەردەوام ئەگری و ئەڵێ تۆ هەڵەی و ئەوەی تۆ باسی ئەكەی نەجسە باسی مەكە. یەكێك لە براكانی كە بە تەواوی پەیوەندی لەگەڵ پچڕاندووەو باقی خوشك و براكانی هەر باسەكە بە لاڕێدا ئەبەن و باوكیشی بە هیچ شێوەیەك ئاگادار نییە چون پێی وابوو باوكی بەرخوردی شەدیدتر ئەكات. ئەو باسی لەوە ئەكرد كە لەگەڵ ئەو كەسانەی كە پەیوەندییان بوو زۆریان باسی ئەحزابی رۆژهەڵات كردووە و گلەییان بووە كە بۆ كەس باسێكیان لێناكات؟!  باسی لەوە ئەكرد كە بنەمەڵاكەی زۆر دائەنیشتن بە دیار بەرنامەكانی كاناڵە كوردییەكان بە تایبەت رۆژهەڵات تی ڤی و ئەو زۆر چاوەڕوانی ئەوە بووە كە لە یەكێك لە كاناڵاكان یان لە گۆشەیەك باسێك لەوان بكرێت بۆ ئەوەی ئەم تابۆیە لە بنەماڵەی ئەوان بشكێ و بتوانێ باسی خۆی بكات. ئێستاكەش زۆر دڵخۆش بوو بەوەی هەنگاوێك بەرەو شكاندنی ئەو تابۆیە هەڵئەهێندرێت. بەتایبەتی داوای تریبوون و شوێنێك بۆ قسە كردنی ئەكرد كە دەنگی خۆیان بگەیەنن بە كۆمەڵگە.
لە دوا ئەو قسانەی كە لەم چەند كەسەم بیست و ئەوانیش پێشتر باسیان لێكردببو لە نێوان خۆیانا بەوەگەیشتم بزوتنەوەی ئازادیخوازی گەلی كورد خاڵی دڵخۆشكەر و هیوابەخشن لەم بوارەدا... بزووتنەوەی كوردستان بزووتنەوەیەكی پێشكەوتن خواز بووە و ئەمە هاوكات كە خاڵی دڵخۆشكەری هاوڕەگەزخوازەكان و چالاكانی مافەكانی ئەم كەمایەتییەیە بووە جێی پرسیاریشە.
دیارە زۆر بەحسی پسپۆری تایبەتی پێویستە دەربارەی ئەم كەمینەیە لە كۆمەڵگای كوردستان ئەنجام بدرێت، بەڵام بە دڵنیاییەوە ئەمە سەرەتاو هەنگاوێكی گرنگە.

ڕێگەچارە و پێشنیارەكان؛ 
(پلاتفۆرمی ڕێكخراوی كۆمەڵەی ژنانی ڕۆژهەڵات بۆ ئەحزابی ڕۆژهەڵاتی كوردستان)

بزووتنەوەی ڕەوای كوردستان و بزووتنەوەی شۆڕشگێڕانەی كوردستان، بزووتنەوەیەیەكی پێشكەوتنخوازە. زۆری خایاندووە تا ئەم حەقیقەت و واقعییەتە مێژووی و ئەمڕۆییە لە ڕێگەی عیلم و زانستەوە تەوزیح بدرێت. ئەم كەمینەیە لە دێر زەمانەوە و هاوكات لەگەڵ مێژووی مرۆڤ و دواتر مرۆڤایەتی بوونی هەبووە. لە كۆتاییدا مرۆڤ گەیشتۆتە ئەو بڕوایەی كە پەنا بردنە بە ئینكار و حەزف ڕێگەچارە نییە و بگرە زۆریش دڵڕەقانە و غەیرە ئینسانییە. ئیعتراف پێكردن بەو كەمینەیە لە هەر كۆمەڵگایەك و دەستەبەركردنی حمایەت و پشتگیری یاسایی بۆ دابین كردنی ئازادییەكانیان، ئەركێكی ئەخلاقی و پرەنسیپێكی بەرزی مرۆڤی شۆڕشگێڕ، ئازادیخواز و پێشەنگی خەباتە.
هەموومان دەزانین چل پەنجا ساڵ لەمەوبەر لە كوردستانی ئێران باس كردن لە مافی ژنان چ بڤەیەكی گەورە بووە. لە كۆمەڵگایەك كە نقومی كولتووری پیاو سالاری بوو و لە هەمان كاتیشدا ژن وەك بەشێك لە میراتی بنەماڵە و وەك كاڵایەك چیها زوڵم و زۆر و ستەمی پێ ڕەوا نەدەبینرا. بەڵام حیزبێكی پێشكەوتنخوازی وەك كۆمەڵە لە هیچ كام لەو ناو و ناتۆرانەی كە دەربارەی هێنانەگۆڕێ مافی یەكسانی ژن و پیاو و بە تایبەتی مافی ژنان بەرەوڕوو دەبووەوە سڵی  نەكرد و ئەمڕۆكە بە شاهیدی میژوو سەربەرزی و سەرفەرازی پێشەنگایەتی خەبات بۆ بە دەستەبەر كردنی مافی ژنان و ڕیز لێنان لە وزە و تواناكانیان لە ڕیزی خەبات دا و وەك میدالیایەكە لە سەر سنگی كۆمەڵە و مێژووەكەی دەدرەوشێتەوە. ئاراستەیەك كە ئەمڕۆكە تەنانەت ئەو لایەنانەی كە گاڵتەیان بە كۆمەڵە دەكرد لەو بارەیەوە، ئەمڕۆ خۆیان بە بەشێك لە ژیان سیاسی و مەدەنی خۆیانی دەزانن. 
كوردستان و بزووتنەوەی كوردستان لە بەردەم ئەزموونێكی دیكەی مێژووییدایە وەك چوار پێنج ساڵ لەمەوبەر. چاوەڕوان دەكرێت لەم سەردەمی گولۆبالیزەیشن و جیهانگیری و زانیاری بزووتنەوەی كوردستان و بەتایبەتی هێزە پێشكەوتنخوازەكانیان بە پشتگیری و حێمایەت لەم كەمایەتییە كۆمەڵایەتییە خاڵێكی پرشنگداری دیكە لە مێژووی خۆیاندا تۆمار بكەن.
بە بڕوای من پشتگیری و یارمەتی دانی ئەم كەمینەیە (هاوڕەگەزخوازەكان) ئەركێكی ئەخلاقی مرۆڤی ئەم سەردەمە و پرەنسیپێكی خەباتكارانی ئازادییە و داواكارین وەك باقی پرسەكانی دیكە و وەك كێشەی بەشێك لە كۆمەڵگای كوردستان پێداگری و پشتگیری بكرێن. پێش هەموو شتێك داواكاریم ئەوەیە كە هاوڕەگەزخوازی بە نەخۆشی سەیرنەكرێت و بەڕەسمی بناسێنرێت. پاشان زانیاری خۆیان لەوبارەوەو ئاستی ڕۆشنبیرییان بەرنە سەرەوە. كە زانیاریان چووە سەرەوەو خوێندنەوەیان بۆ كرد ئەمجار پرسیارێك دێتە ئاراوە؛ ئایا ئێمەو مانانێك كە لە دژی كۆماری ئیسلامی ئێرانین و دژی ڕێز نەگرتن لە نەتەوەكانین و پێمان وایە دەبێ ڕێز لە جیاوازی بگیردرێت، بۆ ئەبێ پشتگیری لە هاوڕەگەزخوازەكان ناكەین؟ غەیری ئەوەیە كە ئەوانیش كەمینەیەكن لە كۆمەڵگە و لەم سەردەمەدا لە وڵاتە پێشكەوتووەكانی جیهان ڕێزیان لێ ئەگیرێت و تا ڕادەیەك مافەكانیان دەستەبەر ئەكرێت، بەڵام ئەحزابی كوردستانی ڕۆژهەڵات چ بەرنامە و پلانێكیان هەیە بۆ ئەم بەشە لە كۆمەڵگە؟
پاشان باسیان لێ بكرێت، مەجالی قسە كردنیان بدرێتێ و تریبوونێكیان پێبدرێت و هەروەها پشتیوانی لە مافەكانیان بكرێت. مافی ژیانێكی ئاسایی، مافی هاوسەرگیری، مافی سەرپەرشتی مناڵ و هتد.
لە كۆتایدا تەئكید ئەكەمەوەو داوا لە ئەحزابی ڕۆژهەڵاتی كوردستان ئەكەم لە بەرنامەی سیاسی و كۆمەڵایەتی خۆیان مادەی دیفاع لەم توێژە لە كۆمەڵگە بگونجێنن و بەردەوام پێداگری بكرێ لە پشتیوانی لە مافی ئەم كەمینەیە لە كۆمەڵگە.


AM:11:59:28/11/2016




ئه‌م بابه‌ته 654 جار خوێنراوه‌ته‌وه‌‌


زۆرترین خوێنراو‌