بەرەو پێشوازی رۆژی جیهانی كرێكار

ئامارێك لە گیان لە دەستدانی كرێكارانی كورد 

فەرانەك ئەڵماسی

ئەگەر بمانهەوێت تۆزێك ورد بینەوە ، ئامارەكان لە ماوەی یەك مانگی سەرەتای ساڵی نوێ، ئەوەمان بۆ دەردەخات كە گیان لە دەستدانی كرێكاران بە تایبەتی كرێكارانی كورد و كەم تەمەن،  لە شوێنی كار بە هۆی"نا ئیستاندارد بوونی شوێنی كار، نەبوونی ئامراز و كەرەستەی تایبەت، نەبوونی بیمەی بێكاری و بیمەی رووداوی كار، نەبوونی سەعاتی كاری تایبەت" و چەند شتی دیكە، رێژەی  ڕووداوەكانی كار لە ئێران بە گشتی و لە كوردستان بەتایبەتی، سێ ئەوەندەی جاران هەڵكشاوە، ئەمە زەنگێكی مەترسیدارە، بۆ كۆمەڵگای كرێكاری كە هیچ كەسێك نیە ئاوڕێك لەم قەیرانە بداتەوە.
كرێكارانی كورد، سەرباری ئەوەی ناچارن بۆ بژێوی ژیانی خۆیان و بنەماڵەكانیان ڕووبكەنە كاری مەترسیدار، لە پێناو پارو نانێكدا گیانیان لە دەست ئەدەن یان كەم ئەندام دەبن و توانای كاركردنیان نامێنێت. ڕێژی گیان لە دەستدانی كرێكاران لە شوێنی كار لە سەدا  80زیادی كردووە كە دەتوانین ئەوە بڵێین ڕێژەی گیان لە دەستدانەكان  دەگەڕێتەوە بۆ "بەربوونەوەی كرێكاران لە بەرزایەكان و بینا  نیوە كارەكان " ئەو كرێكارانە لە خۆ دەگرێت كە سەرقاڵی كاری جۆشكاری یان بەستنی ئاڵماتوڕەكانن كە بە هۆی نەبوونی هیچ ئیمكاناتێكی پێویست بەسەر ئاهەنەكاندا سەردەكەون و لە ئاكامدا بە هۆی لەق بوونی شوێن پێكانیان بەردەبنەوە و دەست بە جێ گیانیان لە دەست دەدەن، هەروەها كەم نین ئەو كرێكارانەی كە لە بینا نیوە كارەكان كار دەكەن و زۆربەی هەر زۆریان كاتێك بەر دەبنەوە تووشی شكانی ئەندامی جەستەیان دەبن كە گیرسانەوەی زۆر زۆر ماوە لەخۆ دەگرێت و زۆر جاریش هەر ئەو، برینە دەبێتە هۆی فەلەج بوونیان و بو هەتا هەتایە توانایی كاركردنیان نامێنێت.
كرێكارانی گرێبەست،ئەوانەی كە گرێبەستین لە سەرەتای ساڵەكانەوە لە لایەن خاوەنكار گریبەستەكانیان نوێ ناكرێتەوە لە بەر ئەوەی مافەكانیان بە تەواوی پێشێل دەكرێت، ئەوانەشی كە رۆژانە كار دەكەن چ تووشی رووداو بن چ نەبن، هیچ بەهاییەكیان لە لای خاوەنكار نیە.
لە شارەكانی كوردستان، قەیرانی لە ڕادەبەدەری ئابووری، تەنگی بە ژیانی هەموو توێژێك بەتایبەتی كرێكارانی كورد هەڵچنیووە، ئەوان ناچارن كە بۆ بژێوی ژیانیان  ڕووبكەنە شارەكانی دیكەی ئێران و سەرقاڵی كاربن، كە لە كرێكاری ئەفغانی خراپتر لە گەڵیان هەڵسووكەوت دەكەن، حەقدەستەكانیان دەخورێت و هیچ ناوەندێكی حكومەتیش پاڵپشتیان لێ ناكات.
كەم تەرخەمی خاوەنكار، نەبوونی كەرەستەوە ئامرازی تایبەت، پشت گوێ خستنی داخوازی كرێكاران لە لایەن رێكخراوەی دابین كردنی كۆمەلایەتی هەمووی ئەمانە بەرنامە دارێژراون بۆ چەوساندنەوە و پێشێل كردنی مافی كرێكاریك كە تەنیا گیانی خۆی نەبێت هیچ پشتیوانێكی نیە كە داهاتووی بۆ دابین بكات.
لە كاتێكدا بەرەو ڕۆژی جیهانی كرێكار دەچین كە دۆخی ژیانی كرێكاران لە جاران خراپترە و گیان لەدەستدانی كرێكاران و پێشێل كاری مافەكانیان لە لایەن خاوەنكارەوە زیاتر پەرەی سەندووە.


PM:03:12:21/04/2016




ئه‌م بابه‌ته 628 جار خوێنراوه‌ته‌وه‌‌