پێشمەرگە تەنیا نیە!

ن: بارزان کرماشان


لە ساڵەیل ویەردە، لەو کاتە کە دونیا وە دو قوتب و بلووک، نیوێ جەھان سەرمایە و نیوێ جەھان سوسیالیزم، بەش کریابی، قوتب سوسیالیزم خوەی وە خاوەن و پشتگر کریکارەیل جەھان زانست و دەم لە برایبەری و دونیاییگ پڕ لە ھەز و خوەشی دا و ئڕای گەپ خوەی ھزار دەلیل و بورھان و نەزەر لە گیرفان داشت. باس لە دادپەروەری کوومەڵایەتی کرد و وەت ک بایس گشت گەلان جەھان لە ھەر زوان و ھویر و چینیگ لە کوومەڵگای بەشەری بوون؛ بایس بەرابەر بوون و ھویچ کام لە سەر ئەو یەکی دەوڵەمەنتر نەود و کشاوەرز لە گەرد ئەندازیار چوی یەک بوون و کرێکار کارخانە ھویچ جیاوازییگ لە گەرد فڵان مودیر کارخانە نیاشتوود. 

چەمک و سووک ترەک جەھان ئامانج و ھەدەفێگ فێشتر لە چووڕانن گیان دونیا لە ھەڵق سەرمایەدارەیل نیاشت. جەنگ خسەو ڕی و ئاگر فرووشا و گیان ئڕاێ فرە ھەرزان بی. ئەوان فرەیش کار نیاشتن کی ھا کام لا، گرینگ ئڕا ئەوان فرووشتن فێشتر چەک و تەقەمەنی بی و وەدەسھاوردن پویل فەرەتر. ھە ئەوە بی ک لە ناو باڵەیل شەڕکەر دونیا دوینستیایم ک یەی وڵات سەرمایەیی گا لە گەرد ئی لای شەڕ بی و گایش لە گەرد ئەو لا. تا ساتێگ ک لەی لا بی چەک خوەی فرەتیادە ئی لا و ک کاری وەل ئی لایا تەمام ئەویاد؛ چیاد و باقی چەکەیلی بردیادە ئەو لای شەڕەو.  

گەپ جەھان سوسیالیزم تا ئەو کاتە بەرخوەدان لە ئێنقڵاب دونیا بی و گەپ دونیای سەرمایە، کوشتن و چەپاو و تاڵانکردن دونیا. ھەر کەسێ و ھەر پارتێ زانست ک لە کام بەش پاڵپشتی و میلەواری دێری. بەڵام لە دویاێ ڕمیان دیوار برلین و لە دویای لەتلەتبوین وڵات یەکیەتی سووڤیەت یا ھەمان ئتتھاد جەماھیر شوورەوی و لە پاش ھەرج و مەرج دونیای سوسیالیزم، گەن و خاس و ھەق و ناھەق گێشت نادیارن. دونیا ک لە شێواز دو جەمسەری نەمەن؛ دی تەشخیسداین لایەنەیل لە یەک و جیاوەکردن چەپ لە ڕاس ئەستەمە. یا ھاتێ بایس دی مینەی لایەن و بلووکێگ تر جیا لە چەپ و ڕاس کویەن بکەیمن ک ھا لە ناو دڵ ئی دو جەمسەرە. 

لە کەشایکەش جەنگ سارد و ملیملی ھەر دو قوتب و جەمسەر دونیا، لە ھڵاماتی بێخەوەر و ناقافڵ، دونیای سوسیالیزم، وڵات ئەفقان ژیر و زەبەر کرد و داگرت. بەھانە کەفت لە دەس دونیای سەرمایە و خەوف و ڕکە و ھەوەلەرە گیانی داگرت. بەش سارد و سەنگین ئوردووگای جەھان، کویەسان ئەفقان کرد وە ماوای شەڕ و تەقەتفەنگ. سوسیالیزم لە دەرەو ھاتی، چمان زەھرێ بەشەرکوش، لە ھەڵق تەنگ ئەفقانەیل ئەو خوار نەچی. بەش درووزن و بەش چەپاوکەر دونیا، دەس وە ھەر پەڕ و پویشی دا و یەکێ لەو دویزەمە و گیچەڵەیلە، بونیاد نریان. قوتابخانە و مەکتەوەیل دینی لە پاکستان بی. ئاگر ڕووشنکەر ئامریکا بی و پویل و پارە خەرجکەر ئەرەبستان و قەتەر. دێواری لە نامەی و نادانی و جەھڵ و خورافە، بەشیگ لە دونیا داپووشا، ئەڵبەت نەبایس ئییە لە ھویرەو بکەیم ک ڕووڵ و وازی سەرەکی لەی ناوە خەڵک و مەردم ناوچەگە خوەیانن ک دویننەی. ئییە مەردم دویاکەفتی و شوونکەفتی خورافەپەرەستیین ک ھەمیشە بوونە وازیکەر وازییەیل وڵاتەیل دەسەڵاتدار و زلھێز دونیا. لە ڕاسییا وڵاتەیل داگیرکەر خوو نییەتویەنن لە ھەر شوونیگ لە دونیا ک بتوان و تەمە و چەو لە لی داشتوون؛ بەرنامەیل خوەیان پیادە بکەن، بەڵکم گەردن بوینن لە کام ناوچە مەردمەگەی ئستئداد دیرن وە کاریان بارن، کە تا ئیرەنگەیشە ئییە ناوچەیل دەورو وەر خوەرھڵات ناوڕاس بییە ک ئی ڕووڵە وازی کردییە. 

لە شەڕ سارد، لە کەشاکەشی وێرانگەر، ڕوود سوسیالیزم ھوشک بی و دێوار داخرومیا. لە دڵ ئوتوپیای سوسیالیزم تەرەک گەورا وە دی ھات و ئەرتەش  سویر وە شەلەشەل و ھەڵس و بڕم وەرەو وڵات وەفرین خوەی ئەو دویا نیشت. جەھان سەرمایە دێویگ لە ناو زگ خوەی  چاق و پەروەردە کەردەبی ک سەنگەر وە سەنگەر زووری فرەترەو بی و میلکان و ماوای تا دەیشت تورابوورا داخستەبی. 

پەدیدەییگ لە پشتەوەی تاریخ و دێرووک و گەپی لە مردگەیل دەوران و سەردەم دێرووک لە قەورسانا سەر ھێز دان. پارتییگ وە ناو ئەلقائدە و شیەخ دەس وە توفەنگی وە ناو "بن لادەن" گام وە دونیا نان. پویل و پارە و ئیدئولوژی و باوەڕ کوور، یەکەو گرتن و بالانەیل پڕ لە ئایەم وەرەو بورجەیل ھاولف ھڵامات بردن. قەرب لە شوک و وەھشەت دەرمەنە کەفت چوین ئەو خوەیان ھاتن، لە زەمین و ھەوا و دەلیا وەرەو ئاسمان ھزار ڕەنگ ئەفقان؛ وارانی لە ئاگر خسنەو ڕێ. قافڵ لە یە ک بونیادگەرایی ھەر وەک ئاو ژێر کەی گڵ خوەی و پڵ خوەی و باریکەڕێ خوەی پیا کەی. ئاو بونیادگەرایی گاجار لە یەمەن و گاجار ئەراق و گاجار سووریە و دەفێ ھەم لە لیبی روی تیەڵ خوەی نیشان دا. چوون سەدام وەک دار پوتار گلیا و ڕمیا، قەزافی کەفت لە ژیر پای ھێرشکەرەیل و سایەی سەنگین ئەو دو کەسە لە سەر لاچی، بونیادگەرایی گیان تازەییگ گرت و سەلەفی و وەھابی و شیعی، ئەراق وە جەوڵانگای خوەیان کردن و ئاگر و بارووت و بومب بی وە خوراک ھەر ڕووژ مەردم. دونیای دو ڕەنگ سەرمایە، دو دڵ لە قودرەت بونیادگەرایی و نادیار بوین بانان سووریە، جمشت سووریە وە ھاڵ خوەی ڕەھا و وڵ کردن تا نە لە تاریخ و نە لە زنەی و زنگانی ھەتەری نەمینی. ڕووسیە ئەربەدە کیشا و ئێران پاڵپشتیی کرد و سووریە لە ئاگر خوەی سزیا. کەسێ دەنگی دەر نات و ئسراییل لە پەنای یەککوشتن ئەرەوەگان؛ گیان تازەییگ گرت. قەرب لە پەژارەی چە بکەم و چە ناکەم، دەس لە بان دەس مەن. 

بەشار ئەسەد جەنگ وێرانگەر خوەی دریژە وە پی دا و دێو و قووڵ بونیادگەرایی وە پاڵپشتی تورکیە و دەسکەفتن شارە نەفتییەگان ئەراق، زوور گرت و ھەر چی جنایەتکار ئورووپا و ئمریکا و ئاسیاس وەرەو خوەی سەن. خەلیفەی بەغدا خوتبە خوەنی و چوون جار جاران دریژای دێرووک، مللەت کورد بی وە  سەرقەوە و بەیداخھەڵگر لە نوای دونیای تیەریک و نویتەک بونیادگەرایی. لە سەمتیگ پویل و پارە و فیشەک و بارووت و ئیمانیگ کوور و کەڕ، لە لاییگیش مللەتی وە دریژای دیرووک قەد ڕاسەو کردن. شنگاڵ وە ئاگر کیشیا و لە بازاڕ مووسڵ خاتوونەیل وە ھەڕاج نریان. دەنگی لە قەرب و لە ئورووپایا ھیز نەگرت. سەدان پێشمەرگە لە چوار پارچەی کوردسان ھەر لە ئەفرین و کووبانییەو ھەتا بگرە وەرەو خوار لە قامیشلی و شنگال، لە باشیک و مەخموور، لە دوبز و کەرکووک و لە داقووق و کفری ھەتا خانەقین و مەنەلی؛ گیان ئەزیزیان لە کەف دەس، شەھید بوین. تورکیە داڵان خوەی وە ڕویی جنایەتکارەیل واز کرد و دەم ئاگر وەرەو کوردسان زوانە کیشا. خڵافەت ئسلامی ئاگر دا و سزان و سەر بڕی و دویەتەیل وردەساڵ وە ئەقد ئەمیرەیل خوەی دەر ھاورد. لە دویای ئەوە ک خەلەبانی ئوردونی سەر بڕین، شای ئوردون ھاواری ھێز گرت و چوون مەسیھییەل کوشیان، مسر تەقە تفەنگی کرد و دەنگی ھێز دا. 

بەڵام کوشیان سەدان کورد ئیزەدی لە شنگال و لە کوردسان دڵ کەسێ نەسزان. خەو کەسی پەریشان نەوی و ئیسە قەرب و ئورووپا لە ژیر چەوەو وە شەمایل یار ھزار ڕەنگ خوەیان تماشا کەن. سەر خەوەرنگارەیل چوون نوقڵ و نەوات لە بازاڕ خەلیفە پەخش پەلا کریەد. کار خوەیان و بار خوەیان. ئیسە قەرب ئارامە و بورجەیل ھاوڵف ئاگر نیەگرن و لە متروەگان ئنگلیس کەسێ ڕخ لە گیانی نیە. ھەر چی جنایەتکەر لە دونیا بییە،  لە ئەراق و شام و میسر و یەمەن ھان لە گەم و گڵ. تەدبیر چەس و چە بایەد کرد؟ 

گومان یەسە ک ڕێگایێگ  بێجگە لە یەکیەتی دونیا و مەنتەقە نییە! بایەد ھەڵقە تەنگ و تەنگترەو بوود. بایەد ڕیشەێ بونیادگەرایی وشک بوود و گشت دونیا لە پیشمەرگە پاڵپشتی بکەن. ئمڕووژ خەت یەکم جەنگ دژ وە فاشیستەیل لە دەس پیشمەرگەس و ئیمە بایەد ئڕا خوەیناسین و ناسیان نەتەوەی کورد وە دونیا تەقەلا و تێکووشان بکەیمن. ئمڕوو وەختیە و بانان دێرە! 


PM:05:12:19/10/2015




ئه‌م بابه‌ته 1174 جار خوێنراوه‌ته‌وه‌‌


زۆرترین خوێنراو‌