راگەیاندنی كۆمەڵە سەبارەت بە خۆپیشاندانەكانی شاری مەهاباد


دوێنێ و شەوی رابردوو شاری مەهاباد شاهیدی ناڕەزاییەتی و خۆپیشاندانی هەزاران كەس لە شارۆمەندان و لاوانی ئەو شارە بوو. ئەو خۆپیشاندانە لە بەردەم بینای هۆتێل تارا و بۆ ناڕەزاییەتی بە دەستدرێژی و فەسادی ئیخلاقی كاربەدەستانی رژیم كە لە رۆژی دووشەممەی رابردوو، بۆ هۆی مەرگی دەڵتەزێنی فریناز خوسرەوانی هاتە ئاراوە. لە ئاكامدا بە هێرش و تەقەی هێزەكانی رژیم ، تێكهەڵچوونی ئەوان لەگەڵ خەڵك توندوتیژی لێكەوتەوە. بەڵام سەرەڕای توندوتیژی بەربڵاوی هێزەكانی ئینتزامی كە بووە هۆی برینداری بوونی ژماریەك لە شارۆمەندان، خەڵكی توڕەی مەهاباد بە هیچ شێوەییەك بڵاوەیان پێ نەكراو و رژیم ناچار بوو چەندین گوردانی تایبەت لە هێزەكانی سپای پاسداران بۆ رووبەروو بوونەوە بێنێتە سەر شەقامەكان.

بەڵام ناڕەزاییەتی رەواو بەرحەقی خەڵكی مهاباد، نە تەنیا لە بەر فەسادی ئیخلاقی بەڵكوو نارەزایەتیش بوو بە گەندەڵی ماڵی و رانتخاری دەست وپەیوەندییەكانی رژیم. خەڵكی شاری مهاباد زۆر بە باشی ئاگادارن و دەیانزانی كە ئەو هۆتێلە بەرهەمی ئەو سەرمایە گەلەیە كە لە گەندەڵییە ماڵییەكان و دزییە سەرسووهێنەرەكان  لە لایەن هێزە بەكرێگراوەكان بە هاودەستی لەگەڵ بەرپرسانی رژیم بە دەست هاتووە.

لە وەها زەمینەگەلێك و لە وەها فەزاییەكی گەندەڵ ، روون و ئاشكرایە كە گەندەڵی ماڵی و دەستدرێژی كەسێك بە ناوی مورتەزا هاشمیوەند بە هاوكاری و هاودەستی لەگەڵ خاوەنی هۆتێلەكە بە ناوی "نادر مەولودی" مەبەستیان بووە دەستدرێژی سێكسی بكەنە سەر فەریناز خوسرەوانی كارمەندی هۆتێلەكە كە كچێكی خوێندەوار و لە بنەماڵەی بەڕێزی خوسرەوانییە . فەریناز  لە بەرامبەر هەوڵی دەستدرێژی  توندوتیژ ئامێزی ئەو كەسە خۆراگڕی كردوە و لە ئاكامدا لە رووی ناچار و بۆ پارێزگاری كردن لە ئابڕووی و حەیسیەتی خۆی لە تەبەقەی چوارەمی هۆتلێلەكەوە دەكەوێتە خوارەوە و بەم شێوە گیان لە دەست دەدات. دێكۆمێنتە سەرەتاییەكان ئەوە نیشان دەدەن كە فەریناز لە دوایین ساتەكان بۆ هاوكارەكانی خۆی كورتە نامەی تەلەفونی ناردوە و داوای یارمەتی لەوان كردوە. هەروەها لە سەر جەستەی قوربانیەكە جێگەی لێدان و بریندار بوون دیارە كە ئەوە نیشان دەدات فەریناز خوسەرەوانی لە بەردەم كەسی دەستدرێژیكەر چەند سات پێش لە هەوڵی خۆكۆژی بەرنگاری و خۆڕاگری كردوە.

كۆمەڵەی شۆرشگێری زەحمەتكێشانی كوردستانی ئێران سەرەڕای دەربڕینی پەژاری قووڵی خۆی سەبارەت بە مەرگی فەریناز خوسەرەوانی  كە لە كۆمەڵگاییەكی تەندورستدا دەیتوانی لە داهاتوودا دنیایەك  سەركەوتن بۆ خۆی بە دەست بێنێت، هاوخەمی و هاودەردی خۆمان بە بنەماڵە و كەس و كار و دۆستانی ئەو خۆشكە بەڕێزە و خەڵكی قارەمانی شاری مهاباد رادەگەیەنێت. كۆمەڵە لە هەمان حالدا خۆی بە هەموو شێوەییەك لە پاڵ خەڵكی خۆڕاگر و چۆكدانەداوی شاری مەهاباد دا دەبینێ و پشتیوانی لە خەباتیان و ناڕەزاییەتی و خواستی بەر حەقی ئەوان دەكا. لە هەمان كاتدا  داوا دەكات   هەموو خەڵكی كوردستان و شارە جیاجیاكان هاوپشتی و پشتیوانی خۆیان بۆ خەڵكی مەهاباد دەرببڕن. هەروەها چاوەڕوانی ئەوە دەكا هەموو  خەڵك و هێزە ئازادیخوازەكان لە بەرامبەر ئەو جینایەت و روداوەدا بێ دەنگ نەبن و بە هەر جۆرێك بۆیان  دەكرێت هەوڵی خۆیان بۆ ریسواكردنی رژیم و پشتیوانی لە خەڵكی مهاباد وەكار بخەن.  رژیمی كۆماری ئیسلامی، هێزەكانی سەركوتكەر و بەكرێگیراوەكانیان دەبێت ئەوە بزانن كە گەندەڵییەكان، سەركوتەكان، ئیعدامەكان و دەستدرێژكانی دەست و پەیوەندییەكانی ئەوان بێ وڵام نامێنێتەوەو.ئەو جینایەتانە بە بزوتنەوەی بەربڵاوی خەڵك و سەرئەنجام هەڵپێچانی دام ودەزگا سەركوتگەرەكانی رژیم وەڵام دەدرێتەوە.

سكرتاریەتی كۆمەڵە شۆڕشگێڕی زەحمەتكێشانی كوردستانی ئێران

رێكەوتی 18ی گوڵان 1394 بەرابەر لەگەڵ 8ی مانگی مەی 2015


PM:03:01:08/05/2015




ئه‌م بابه‌ته 1371 جار خوێنراوه‌ته‌وه‌‌


زۆرترین خوێنراو‌