راگەیاندنی كۆمەڵەی شۆڕشگێڕی زەحمەتكێشانی كوردستانی ئێران بە بۆنەی رۆژی جیهانی كرێكار




ئەمساڵ لە ئێراندا لە بارودۆخێكدا بەرەو پێشوازی لە رۆژی جیهانی كرێكار دەڕۆین كە كرێكاران تەنانەت بە پێوەرەكانی كۆماری ئیسلامیش لە خراپترین بارودۆخدا بەسەر دەبەن. بە پێی هەواڵی یەكیەتی ئازادی كرێكاران بە میلیۆن بنەماڵەی كرێكاری لە خراپترین بارودۆخی ژیان لە ماوەی 37ساڵی رابردوودا بەسەر دەبەن. بۆ رادەی ئەم بێ دەرەتانییە تەنیا پێویستە بزانین كە لانیكەمی ئەو حەقدەستەی كە بۆ كرێكاران دیاری كراوە 3ی قات كەمتەرە لەو هێڵی هەژارییەی كە بە پێی ئامارە فەرمییەكان بۆ بنەماڵەكان دیاری كراوە.

بەشێكی زۆری مانگرتنەكان‌و كۆبوونەوەی ناڕەزایەتی كرێكاری لە ساڵی رابردوودا لە ناڕەزایەتی بە حەقدەستی زۆر كەم، نەدانی ئەو حەقدەستانەو دواخرانی درێژماوەی ئەو حەقدەستانە، بێكار كردنی بەربڵاو‌و داخرانی ناوەندە بەرهەم هێنەرەكان ، گرێبەستی كاتی 1 مانگە كە بە پێشێل كردنی یاسای كار، كرێكارانی خستۆتە خراپترین‌و بێ هیواترین بارودۆخەوە، هاتۆتە ئاراوە. هەڵسوكەوتی دەوڵەتی ئێعتدال، بێجگە لە دروشمی بێ بنەما، ناردنی هێزە ئینتزامییەكان بە مەبەستی سەركوت، دەستبەسەر كردن‌و ئازارو لێدان‌و تەنانەت شەلاق لێدانی چالاكان‌و نوێنەرانی كرێكاران، بووە.

لە كاردانەوە بەو بارودۆخە نامرۆڤانەیەو لە گەڵ بوونی بارودۆخی ئەمنی‌و نەبوونی ئازادی دامەزراوە كرێكارییەكان، ناڕەزایەتی كرێكاری لە ساڵی رابردوودا پەرەی زۆرتری سەندووە.

بەرچاوترینی ئەو ناڕەزایەتییانە بۆ حەقدەستی كەم‌و بارودۆخی خراپی كار، دەتوانین لە كۆبوونەوەی بەرینی مامۆستایانی خوێندنگاكان ببینرێت. كۆمەڵگای كرێكاری‌و هەموو چالاكانی كۆمەڵگای مەدەنی ئێران، لەو حەرەكەتە بوێرانە‌و مەدەنییەی مامۆستایان پشتیوانیان كرد و ئەوە بە نمونەیەكی بەرچاوی بزوتنەوەی كۆمەڵایەتی داخوازییە سینفییەكانی خۆیان دەزانن‌و پێشبینی دەكرێت ببێتە تایبەتمەندییەكی بەهێزی دەورەی سیاسی داهاتووی ئێران.

كۆمەڵەی شۆڕشگێڕی زەحمەتكێشانی كوردستانی ئێران، وەكوو حیزبێك كە بەردەوام خەباتی كردووە بۆ دابین كردنی ئازادی دامەزراوە كرێكارییەكان، یاسای كاری پێشكەوتوو، مافی مان گرتن، زیاتركردنی حەقدەستی كرێكاران بە پێی نرخی هەڵاوسان، یەكسانی حەقدەستی كرێكارانی ژن‌و پیاو، بیمەی بێكاری‌و باقی مافە پێشكەوتووەكانی كرێكاران، داوا لەهەموو كرێكارانی كوردستان‌و ئێران دەكات بۆ یەكگرتوویی‌و هاوپشتی خەباتكارانەی زیاترو هەوڵدانیان بۆ پێكهێنانی رێكخراوەی سەربەخۆی كرێكاری. هیچ رژیمێكی سەرەڕۆ ناتوانێت خۆڕاگری بكات لە بەرابەر بزووتنەوە كۆمەڵایەتییەكان‌و بەتایبەتی داخوازییە رەواكانی بزووتنەوەی كرێكاری. بزووتنەوەی كرێكاری یەكگرتوو رێكخراو دەتوانێت‌و دەبێت پێشەنگ، یەكگرتوو، هەروەها پێویستە هاوپەیمانی هەموو بزووتنەوە مافخوازەكانی دیكە بێت‌و لە ئاكامدا نیزامی دەسەڵاتدار، ناچار بە پاشەكشەو بە رەسمی ناسینی ماف‌و خواستە جیاوازەكانی كرێكاران‌و باقی توێژەكانی دیكەی ژێر ستەم‌و نایەكسانی بكات.
11ی گوڵان یان رۆژی یەكەی مانگی مەی دەرفەتێك بۆ دەرخستن‌و پیشاندانی یەكگرتوویی‌و هاوپشتی هێزی كۆمەڵایەتی كرێكاران‌و هێنانە ئارای داخوازییە بنەڕەتییەكانیانە. ئەم رۆژە بەو پەڕی شكۆوە بەڕێوە ببەین.

كۆمەڵەی شۆڕشگێڕی زەحمەتكێشانی كوردستانی ئێران
9ی گوڵانی 1394ی هەتاویی بەرابەر لە گەڵ 29ی ئاپریلی 2015 ی زایینی



AM:11:36:29/04/2015




ئه‌م بابه‌ته 1474 جار خوێنراوه‌ته‌وه‌‌


زۆرترین خوێنراو‌