ڕاگەیاندنی کۆمیسیۆنی نیزامی کۆمەڵە سەبارەت بە: تۆپبارانی هێزی پێشمەرگە و ناوچە سنوورییەکانی کوردستان

ڕاگەیاندنی کۆمیسیۆنی نیزامی کۆمەڵە سەبارەت بە:
 تۆپبارانی هێزی پێشمەرگە و ناوچە سنوورییەکانی کوردستان


خەڵکی تێکۆشەری کوردستان
حیزب و لایەنە سیاسیەکان

ئاگادارتان دەکەینەوە کە ڕۆژی پێنج شەممە رێکەوتی ٢٩ی ئۆکتۆبری ٢٠٢٠ی زاینیی  ڕێکەوت لەگەڵ ٨ی خەزەڵوەری ١٣٩٩ی هەتاویی، کاتژمێر ١١:٠٠ی سەر لەبەیانی ناوچەکانی " سیدەکان و بەربەزین "    لە کوردستانی باشوور کەوتە بەر پەلاماری هێرشی تۆپخانەکانی کۆماری ئیسلامی، جێگای ئاماژەیە کە هێزەکانی پێشمەرگەی کۆمەڵە لەو ناوچەیە جێگیرن کە بە خۆشحاڵیەوە هیچ زیانێکی گیانی و ماڵی بەر خەڵکی مەدەنی و دانیشتووی ناوچەکە و هێزەکانی پێشمەرگە نەکەوتووە، بەڵام بەداخەوە بەشێک لە دارستان و زەوییە کشتۆکاڵیەکان لە ئاوری تۆپخانەی کۆماری ئسلامیدا سووتان و زیانی بەرچاویان لیکەوتووە.
لە ساڵانی ڕابردوو کۆماری ئیسلامی بە دەیان جار بە بیانووی بوونی هێزی پێشمەرگە لە ناوچە سنوورییەکانی باشوور و ڕۆژهەڵات بە تۆپخانە و کەرەستەی قورسی نیزامی هێرشی کردوەتە سەر خەڵکی مەدەنی ناوچەکە کە زیانی ماڵی و گیانی لێکەوتوەتەوە. 
سەرەڕای هەموو هەوڵە سەرکوتگەر و پێشێلکارییەکانی کۆماری ئیسلامی و تۆپباران کردنی قوڵایی ناوچە سنوورییەکانی کوردستانی باشوور نە حیزبە سیاسیەکانی کوردستانی ڕۆژهەڵات و نە خەڵکی ئازادیخوازی باشوور لە گەیشتن بە ئامانجە ڕەواکانی خەڵکی کوردستان پاشگەز نەبوونەتەوە.
هێرشەکانی کۆماری ئیسلامی پێشێلکاری ئاشکرای ڕێکەوتنامە نێو دەوڵەتیەکانە و کۆمەڵەی شۆڕشگێڕی زەحمەتکێشانی کوردستانی ئێران وێڕای مەحکووم کردنی ئەو هێرشانە خوازیاری کۆتایی هێنان بە پێشێلکاریی و داگیرکارییەکانی کۆماری ئیسلامی و بەدواداچوونی ڕێکخراو و لایەنی پەیوەندیداری ناوچەیی و نێودەوڵەتیە لەم بابەتەیە.
کۆمیسیۆنی نیزامی کۆمەڵەی شۆڕشگێڕی زەحمەتکێشانی کوردستانی ئێران
30ی ئۆکتۆبەری 2020 بەرانبەر لەگەڵ 9ی خەزەڵوەری 1399ی هەتاویی

ئه‌م بابه‌ته 160 جار خوێنراوه‌ته‌وه‌‌


PM:01:59:30/10/2020