مەکڕۆن؛ کۆماری ئیسلامی کۆتایی بە دەستتێوەردان لە وڵاتی لوبنان بێنێت

مەکڕۆن؛ کۆماری ئیسلامی کۆتایی بە دەستتێوەردان لە وڵاتی لوبنان بێنێت
"ئێمانۆئێل مەکڕۆن" سەرۆک کۆماری فەڕانسە لە وتووێژێکی تەلەفۆنی لەگەڵ "حەسەن ڕووحانی" وتی: "کۆماری ئیسلامی دەبێ کۆتایی بێنێت لە دەستێوەردان لە کاروباری ناوخۆی لوبنان."

ڕۆژی چوارشەممە ٢٢ی گەلاوێژی ١٣٩٩ی هەتاوی، کۆشکی "ئێلیزە" ئاشکرای کرد کە حەسەنی ڕووحانی سەرۆک کۆماری ئیسلامی ئێران و ئیمانۆئێل مەکڕۆن وتووێژێکی تەلەفۆنییان ئەنجام داوە. 

بە وتەی هەواڵنێری فەڕانسە، "مەکڕۆن" لە وتووێژە تەلەفۆنییەکەی لەگەڵ "حەسەن ڕووحانی" باسی لەوە کردووە، دوای تەقینەوەی شاری بەیڕووت و قەیرانی سیاسی لوبنان، کۆماری ئیسلامی دەبێ کۆتایی بێنێت بە هەر چەشنە دەستتێوەردانێک لە کاروباری ناوخۆی وڵاتی لوبنان.
لە درێژەی ئەو وتووێژە مەکڕۆن باسی لە گرینگی یەکگرتوویی هێزەکان و حیزبەکانی وڵاتی لوبنان کرد کە دژ بە دەستتێوەردانی وڵاتانی دەرەوە، دەوەستنەوە.

کۆماری ئیسلامی بە دەستتێوەردان لە کاروباری وڵاتانی ڕۆژهەڵاتی ناوەڕاست و پشتیوانی لە تێرۆریزم بووەتە هۆکاری سەرەکی لە ڕوودانی کارەساتی مرۆیی لەم وڵاتانە کە بەم هۆیە لەگەڵ هەڵوێستی توندی کۆمەڵگای نێونەتەویی ڕووبەڕوو بووەتەوە.

ئه‌م بابه‌ته 119 جار خوێنراوه‌ته‌وه‌‌


PM:02:35:13/08/2020