ڕێژەی قوربانیانی کۆرۆنا لە ئێران ڕوو لە هەڵکشانە

ڕێژەی قوربانیانی کۆرۆنا لە ئێران ڕوو لە هەڵکشانە
لە ٢٤کاتژمێری ڕابردوودا، ٧٥کەس بە هۆی گیرۆدەبوون بە ڤایرۆسی کۆرۆنا لە ئێران گیانیان لە دەستداوە و زیاتر لە ٢٣٦٩ تووشبووی دیکەش خۆیان بە ناوەندە دەرمانییەکان ناساندووە.

بە پێی ئاماری ماڵپەرە حکوومەتییەکان، لە ماوەی یەک ڕۆژی ڕابردوودا، ٧٥ تووشبووی کۆرۆنا لە ئێران گیانیان لە دەست داوە و دوو هەزار و ٣٦٩تووشبووی دیکەش خۆیان بە ناوەندە دەرمانییەکان ناساندووە، کە ٦٨٧ کەسیان ئێستا لە نەخۆشخانەکان، لە ژێر چاوەدێری وردی پزیشکی دان و دۆخی تەندروستی ژمارەیەکی زۆریان ناجێگیرە.
بە پێی ئامارە بڵاوکراوەکانی وەزارەتی بێهداشت، پارێزگاکانی کوردستان، لۆڕستان، ئازەربایجانی ڕۆژئاوا، هۆرموزگان و خوزستان لە دۆخێکی زۆر خراب دان و باری نائاسایی و مەترسیدار ڕاگەیەندراوە.
جێی باسە، بە هۆی ڕێگەنەدان بە ڕۆژنامەنووسانی سەربەخۆ و شاردنەوەی ژمارەی قوربانیان لە لایەن ناوەندە پەیوەندیدارەکانەوە تا ئێستاش ئامارێکی دروست لە ژمارەی تووشبووان و قوربانیانی کۆرۆنا لە ئێران لەبەر دەست دانییە، بەڵام تەنانەت بە پێی ئامارە بڵاوکراوەکانی حکوومەتیش، ڕێژەی تووشبووان لە شارە جۆراوجۆرەکانی ئێران و بە تایبەت ناوچە پەراوێزخراوەکان، ڕۆژ بە ڕۆژ زیاتر دەبێت و حکوومەت لە ژێر ناوی ئەوەی کە کۆرۆنا قەیرانێکی جیهانییە، بەرپرسیاریەتی ئەم کارەساتە لەسەر شانی خۆی دادەماڵێت و هیچ بایەخێک بە ئەمنیەتی گیانی خەڵکی وڵاتەکەی نادات.

ئه‌م بابه‌ته 143 جار خوێنراوه‌ته‌وه‌‌


PM:05:05:12/06/2020