لە بایكۆتی كاڵاوە بۆ بایكۆتی فاشیزم


لە بایكۆتی كاڵاوە بۆ بایكۆتی فاشیزم
1. پێش منیش كەسانێك نووسیویانە: بایكۆت لەسەر ئاستی دەرەكی گوشار بۆسەر ئابووریی توركیا دەهێنێت، لەسەر ئاستی ناوخۆییش، كورد یەك دەنگ و یەك ئامانج دەكات. بۆیە هەرچەندە بایكۆت لەسەرەتادا وەك بزاڤێكی فەیسبووكی دەركەوت، كەچی ئەنجامەكانی لەسەر ئەرزی واقیع وەك ئامانجی بەرەنگاری و بەرگریی شۆڕشگێڕانە كەوتنەوە. كاتی خۆی هەمان پێشنیاریشم هەبوو بۆ مامەڵەكردن لەگەڵ ئەنفال: لە جیاتی بەرجەستەكردنی ڕەهەندە تراژیدییەكەی، بێین و ڕەهەندە بەرگریكارییەكەی بەرجەستە بكەین، ئاخۆ تا چەندە دەتوانین ئەنفال وەك تراژیدیا بكەینە خاڵی هاوبەش بۆ بەرەنگاریی و هەستانەوە. لە تراژیدیاوە بیكەینە كەرنەڤاڵ. ئەمە هەمان شتیشە دەتوانین لەگەڵ بایكۆتی كاڵا بیكەین بۆ ئەوەی ببێتە بایكۆتی فاشیزم.
2. ئەمەش پێماندەڵێت، كە هەر تاكەكەسێك لە لای خۆیەوە دەتوانێت شۆڕشگێڕێك بێت و بنەماكانی بەرەنگاریی بەرجەستە بكات. لێرەدا ڕووبەڕووی ئەو چوارچێوەیە دەبینەوە كە جاران لێوەی خەباتی تاكەكەسمان هەڵدەسەنگاند: پێویستە ئەو بەشێك و ئەندامێك بێت لە بەرەی ئێمە و پەیڕەو و پرۆگرامی ئێمە قەبووڵ بكات. پێویستە تاكەكەس بێتە ناو دەستە و گرووپەوە تا بتوانێت ڕەوایەتی بۆ بەشدارییكردنەكەی لە خەباتدا بەدەست بهێنێت! لە ئێستادا وێنەكە پێچەوانە بۆتەوە: كەس پێویستی بەوە نییە بچێتە نێو ڕێكخراوێكی سیاسییەوە بۆ ئەوەی سیاسەت بكات. تاكەكەس خۆی دەتوانێت سیاسیانە بیر بكاتەوە و ڕەفتار بكات، بەبێ ئەوەی پێویستی بە ڕێنمایكەر و سەرگەورە و ڕابەر هەبێت.
3. ئاستێكی ئاگایی مۆدێرن بەڕێگاوەیە، كە دەتوانێت ڕەفتاری مۆدێرن بە ئاراستەی خۆناسین و ئەویترناسینیشدا بەرجەستە بكات. بایكۆت هەم گەڕانەوەیە بۆ خود و بڕوابوونەوە بەبەرهەمی خۆمان و هەم ڕەتكردنەوەی بەرهەمیی ئەوانیتر كە دوژمنایەتیمان دەكەن. لە ڕاستییدا ئەگەر ئەم بایكۆتە لە دیاردەوە ببێتە كولتوور و بەشێك لەناخی تاكەكەسەكان، ئەوە دەبێتە مایەی هێزی كار و بەرهەمی خۆماڵی و زاڵبوون بەسەر گرێی خۆ بە بچووكزانی، كە تەنانەت لەوەشدا دەردەكەوت، كە عاممەی خەڵك پێیان وابوو دەبێت تەماتەی توركی یان ئێرانی بكڕن نەك ئەو تەماتە چرچەڵانەی خۆمان كە بەشەرمەوە لەلایەكی دوكانەكاندا دادەنران..
4. ئاستی ئاگایی مۆدێرن ئاگاییەكە پێویستە لە بایكۆتی بەشەكییەوە بەرەو بایكۆتی گشتی بمانبات. پێویستە ئەم بایكۆتە لە ئاست كاڵادا نەوەستێت لەبەر ئەوەی (توركییە)، بە ڵكو پێویستە ببیتە بایكۆتكردنی (بیرۆكەی فاشیزمی توركی) و ڕەتكردنەوەی هەمیشەیی. بەبێ بەرەنگاربوونەوەی ئەم فاشیزمە دەمامك كەوتووە، بایكۆتی كاڵا تەنیا بەشێكی گرنگیی بایكۆتە نەك بایكۆتی بیرۆكەی فاشیزم، كە ڕووخسارە گشتگیر و چەترە بەرینەكەی دژایەتی كورد و گەلانی دیكەی ناوچەكەیە. پێویستە ئەم بایكۆتە بایكۆتی تەكنەلۆژیا و كتێب چاپكردن لە توركیا و ئەلبووم كلیپكردنیش لەوێ، بگرێتەوە. پێویستە ئەمە لە نەچوون بۆ چارەسەری تەندروستیش بۆ توركیا بگرێتەوە. پێویستە زانست و دامەزراوە ئەكادیمییەكانیشیان بخرێنە ژێر پرسیارەوە. پێیوستە كەرەستەی بیناسازی ودیكۆر و جوانكارییش بگرێتەوە. پێویستە بنێشت و كرێم و تابلۆكانیشیان بگرێتەوە. بایكۆت لە كاڵاوە دەستیپكرد بەڵام پێویستە بیرۆكەی فاشیزم و كۆی ئەو شانازییانەش بگرێتەوە كە توركە ڕەگەزپەرستەكان شانازیی پێوە دەكەن.
5. كورد دەتوانێت ئەمە بكات و تیایدا سەركەوتووش بێت و بە شانازیشەوە لێیدەربچێت. ئەوانەی دژایەتی بیرۆكەی بایكۆت دەكەن، كۆیلەبوونیان بە دەرونیكردووە و بەشێكن لە ڕەواجدان بە ڕۆحی فاشیزم. ڕەنگە ئەمانە بۆخۆیان و بۆ دەوروبەرێكی نزیكیان كاریگەرییەكی كاتییان هەبێت، بەڵام لە دوورمەودادا وەك فاشیزمی تورك خۆی دادەڕمێن. بایكۆت شوناسێكی مۆدێرن بە مرۆڤبوونی كورد دەدات. خەباتێكی ئاشتیخوازانە بۆ بەرزكردنەوەی ڕۆحی بەرەنگاریی لە ئاست ئەویتردا كە بە هیچت نازانێت. تۆ لە مەچەكییەوە نایگریت، بەڵكو دەست بۆ بینەقاقای دەبەیت.
6. بیرۆكەی بایكۆت هەروەكچۆن دژایەتییەكی بیرۆكەی فاشیزمی ئەویترە لە ڕێگەی ڕەتكردنەوەی كاڵاكانییەوە، ئاواش دەمانخاتە بەردەم بیرۆكەی ڕەتكردنەوەی هەرجۆرە فڕوفێڵێك كە بۆی هەیە لە بەرهەمی خۆماڵییدا بكرێت. بۆیە ئەمەش بەشێكی گرنگیی خەباتی (بایكۆتچییەكانە)!، كە دژی هەرجۆرە بەكارهێنانێكی بەرهەمی كیمیایی بن لە پێناوی زیادكردن و گەشەدان بە بەرهەمی خۆماڵی و زۆركردنی. بەرهەمی خۆماڵی بەتەنیا  بەرهەمی خۆماڵیی پیرۆز ناكات، بەڵكو بۆ بایكۆتچییەكان پێویستە چۆنێتی بەرهەمهێنانیشی بەشێك بێت لە خەباتی ڕەتكردنەوە و بایكۆتكردن. نابێت بهێڵرێت بایكۆت ببێتە پردێك بۆ ئەو كەسانەی لە ئاستی ناوخۆدا كاڵای كوردییمان بۆ دەخەنە جێگەی كاڵای توركی، بایكۆت گەڕانەوەیەكی ڕۆسۆییانە نییە بۆ بەرهەم و سرووشتی خۆماڵی، بەڵكو بەرەنگارییە لە ئاست جۆری بەرهەمێنانیشدا. 
سەركەوتن بۆ بایكۆتكردن...
ڕێبوار سیوەیلی
27/10/2019
* ئەم بابەتە لە لاپەڕەی تایبەتی مامۆستا «ڕێبوار سیوەلی» لە تۆڕی کۆمەڵایەتی فەیسبووک وەرگیراوە.

ئه‌م بابه‌ته 117 جار خوێنراوه‌ته‌وه‌‌


PM:05:48:31/10/2019