دوو پەخشانی ئەحمەد بازگر بە ناوی (لەیادی هەڵەبجەدا)

دوو پەخشانی ئەحمەد بازگر بە ناوی (لەیادی هەڵەبجەدا)

لە یادی هەڵەبجەدا (١)

هەرچەندە من، لە وڵاتێكەوە دێم،

هەر بەردێكی، داستانێكی دوور لەباوەڕی لە سینگایە! هەر دارێكی بە ئەژمارەی دوور لە ئەژمارە پرچەكانی ڕندراوەتەوە! هەر كانییەكی بە سەدان جار خنكێندراوە!

هەر زەوییەكی دوور لە خەیاڵ نەشتەرباران كراوە!

هەرچەندە من، لە وڵاتێكەوە دێم،

هێشتا سێبەری مەرگ، لە سەر ئاسمانەكەی نەڕەویوە! هێشتا گۆڕستانەكانی لە شارەكان گەورەترن! هێشتا كۆمەڵی دایكانی ڕەشپۆشی بەرەو گڵكۆی ڕۆژانی جێژن، لە گەڕی هەڵپەڕینی دەشت و دەری نەورۆزانە، بەرین ترە!

هێشتا لە كێشەی مابەینی، خەندە و فرمێسك، فرمێسكەكان باڵادەستن! هێشتا بەختیاری هەر ئاواتە و خۆشەویستی چوارمێخ كراوە!

هەرچەند ئێمە لە وڵاتێكەوە دێین،

وشەی شەهید هێشتا، لە گشت سووچێكی دەبیسترێ!

هێشتا ئەم وشە پیرۆزە تێكەڵاوی بیرەوەری هەموومانە!

هێشتا زۆرن ئەو لاوانەی، ڕوخساری باوكیان، لە وێنەیەكی ڕەش و سپی و داستانەكانی دایكیانەوە تۆمار كردووە!

هێشتا زۆرن ئەو گەنجانەی، لە قوژبنی زیندانێكی تاریك و برش كردوودا، پێیان ناوەتە سەر دنیا!

هێشتا زۆرن ئەو كەسانەی دایك و باوكیان، بێ گڵكۆن و گۆڕغەریبن! تاقە مەزارێكشك نابەن بچنە سەری و سوكنایی دڵیان داهێنن! هێشتا زۆرن، زۆرن...

هەرچەندە من لە وڵاتێكەوە دێم،

خەم بووەتە دوانەیەكی لە مێژساڵەم! ڕاكردنم لە دەستی خەم بووەتە مەحاڵ! هەتا دێم لەگەڵیا هەڵكەم، سەرلەنوێ تێك دەچینەوە! لەنێو گشت ئازارەكانا، دانەیەكیان، قەت نەم توانی، قەت ناتوانم لە تەكیا بحەوێمەوە: ئازاری نێو دنیای مناڵ!

من ئەو كاتەی كێشەی خەم و ژانەكانی، گەورەساڵانی ئەم زەوییە، پەل دەكێشێتە نێو دنیای منال، سەرلەنوێ دەبمەوە مناڵ!

مناڵەكان!

ئەگەر بەهار هێشتا سەوزە و هەموو فەسڵەكانی تریش شۆخن!

ئەگەر ژیان خۆشە و نەغمەی عیشق هێشتا هەر دڵ بلاوێنە!

ئەگەر ئەستێرەی هیوا هێشتا هەر ترووسكەی ماوە! ئەگەر هێشتا من هەر بەپێوەم و ئەم دێڕانە دەخوێنمەوە! تەنیا و تەنیا هەر بۆیەیە كە ئێوە هەن! ئای كە چەندە گەورەن ئێوە!

هەر بۆیەشە، لە ڕۆژێكی وەك ئەمڕۆدا، لە ساڵیادی سەر برین و خنكاندنی شارێكی ئەو وڵاتەی من لێوەی دێم ،پڕ بەدڵم حەزم لێ یە، زریكەی هەموو مناڵانیبێتاوانی جیهان، بكەم بە هاوارێكی تووڕە و بڵێم:

هەموو جیهان،

بە ئێرەش و ئەوێشییەوە، بە ئەوبەر و ئەم بەرییەوە،دەبێ ئارەقی شەرم و رێسوایی هەڵڕێژێ و تاوانی بێدەنگی یەكەی ئەو سەردەمی، بكا بە شنەیەكی بەهاری ،كاكۆڵی كۆرپە ساردبۆوەكەی نێو باوەشی عومەری خاوەر باوەشێن بكا!

بازگر 17/03/07 بووهووس



لە یادی هەڵەبجەدا (٢)

هەڵەبجە زامێكی گەورە و ناسراوی نەتەوەیەكی بن دەستە! هەڵبجە ژانێكی حەستەمی مێژوویەكی پڕخوێنە! هەڵەبجەبووە تە خوشكە گەورەی سەردەشت و دوانەی هێرۆشیما!

هەڵەبجە باوەشێكی گەرم و پڕ لە سۆزی دایكانەی گوردانی شوانە! هەڵەبجە نەنگێكی تەختی نێوچاوانی سەرەڕۆیی و فاشیزمێكی ڕووت و قووت و دژایەتی پڕاواوپڕی هەرچی بۆنی ئینسانییەتە!

هەموو جارێ كە من ئەو ناوە دەبیسم، لە خۆم دەپرسم كە مرۆڤ بە چ شێوەیەك لە شێوان، دەبێ ڕێزی شەهیدەكانی ئەو شارە، یان ئەو شارە شەهید كراوە بگرێ؟!

چیان دەویست شەهیدەكانی هەڵەبجە؟ چیان دەویست شەقامەكانی هەڵەبجە؟ چیان دەویست مناڵەكانی هەڵەبجە؟ چیان دەویست كیژ و كوڕەكانی گوردانی شوان؟

هەتا كەی من هەموو ساڵێ ئەم دەمانە، لە نێو دنیای ماتەمین و لە نێو دەریای پڕ ئەسرین و بەدەم شەپۆلی غەمگینی ئەو یادەوە، خەونەكانی قوربانیانی ئەو كۆستە پشووبڕ بكەم؟!

بەر لە ئەوەی مەرگ دابارێتە نێو شارەوە، هیچ كەس نەهات لێیان پرسێ چەندەیان حەز لە مردن بوو؟ چونكە نە شار، نە دانیشتوانی شار و نە مناڵ، هیچ كامێكیان نەیان دەویست بمرن!

چراخانی شەوانەی جادە و كۆڵانەكانی هەڵەبجە، ڕووەو ئاسمان چاوەبڕكێی لە گەڵ ئەستێران دەكرد و بە ڕۆژانەش تیشكی ژینبەخشی خۆرەتاو لە ناو شارا خۆی هەڵدەخست!

هەڵەبجە شاری خوازیاری مەرگ نەبوو!

من دەمەوێ بچمە ڕیزی ئەو كەسانەی كە لە یادی هەڵەبجە دا، بۆ بنبڕكردنی ماتەم، كە بۆ ژینی بێ ژان، بۆ بژوێنی و ئاوەدانی هەوڵ دەدەن! من دەمەوێ لە ساڵیادی هەڵەبجەدا ،لە سەر ڕوخساری مناڵكان تارمایی خەم بەدی نەكرێ!

هەموو جارێ كە دوعایەك شەهید دەكرێ، سەر لەنوێ خوێ دەكرێتەوە گشت برینەكانی سەرجەستەی مێژووی ئەم نەتەوە پڕ برینە! چ ڕێز گرتنێكی بەرزە ئەو ڕۆژەی، كەلە یادێكی ئاوادا، نەك هەر تەنیا پێناوێك بۆ دوعا كوشتن نەمێنێ، بەڵكوو خۆشەویستی لە دیلی ڕزگار بكرێت و وڵات ببێتە مەڵبەندی خۆشبەخت ترینەكان!

وەرن با هەموومان بە یەكەوە مەرگ لە سێدارە بدەین و باوەشێنی بڵێسەی سووری ژیان بكەین!



بازگر 15/03/2008 بووهووس


ئه‌م بابه‌ته 512 جار خوێنراوه‌ته‌وه‌‌


PM:08:35:02/04/2019