لاوان و 12ی ئاگۆست

لاوان و 12ی ئاگۆست
ئا: ئازاد سلێمانی

سەردەمی لاوێتی گرینگ‌ترین سەردمی ژیانە، ئەو سەردەمە، سەردەمی گەشە و پێگەیشتنە و لاوان سەرمایەی گەورە و گەوهەری زێڕینی هەر وڵاتێكن و گەشە و پێشكەوتوویی هەر كۆمەڵگایەكیش بەستراوەتەوە بە لاوەكانی. ئەم توێژە گرینگ و كاریگەرەی كۆمەڵگا هەموو كات كەوتوونەتەبەر ڕوانینی مرۆڤە گەورەكان، لااوان كێشە و گرفتی تایبەت بە خۆیانیان هەیە كە بۆ ناسینی ئەو خەسارانە و پێداویستیەكان و وڵامدانەوەی درووست و بە جێگە پێیان لە لایەن بەرپرسان و بەڕێوەبەرانی ئەو وڵاتەوە، كاریگەرییەكی یەكجار زۆری لەسەر پەروەردەكردن و گەشەیان دەبێت.
نەتەوە یەك‌گرتووەكان دەڵێت لاوان لە كەشی ئێستادا كە دامەزراندنی كار، ئەمنیەتی كەم و بەشداریی پێ‌نەكردن لە بڕیارەكان بە گشتی و بگرە بەشداری پێنەكردن لە بەڕێوەبەریدا، تووشی كەم هێزی و بڕوا بە خۆنەبوون هاتوون. ڕۆژی لاو، ڕۆژێكە كە وابڕیارە لاوان بە درووستی پێناسە بكردرێت و لە هەر وڵاتێكیش بەپێی كولتووری خۆیان شرۆڤە و لێكدانەوەی بۆ دەكرێت و ڕۆژی تایبەتی بۆ دادەنرێت، بەڵام بەپێی زۆرینەی وڵاتانی جیهان 12ی ئاگۆست وەك ڕۆژی جیهانیی لاوان دەستنیشان كراوە و لەم ڕۆژەدا چالاكانی ئەم بوارە بابەتگەلی جۆراوجۆر لەسەر ئەم پرسە باس دەكەن. بێ‌گومان لە نێوان هەموو بەشەكانی ژیاندا هیچ قۆناغێك بە گرینگیی لاوێتیی نییە. وشەی لاو وەبیرهێنەرەوەی ژیانی پڕ لە خۆشی، ورە، بەهێزبوون و هاوتا لەكەڵ تێكۆشانە. ئاست و جۆری داخوازییەكان ڕەنگ بێت ئاسایی یان نائاسایی بێت. بەهەرحاڵ، بەهەموو جۆرەكانی، داخوازی لاوان و پەیدابوونی لە لاواندا دەبێتە سەرخۆشی و هەڵخڕاندنی هەست و سۆز و شور و شەوق بۆ بەدەستهێنانیان و دەبێت لەم ڕاستایەدا هەموو بەرنامە داڕێژەكانی كۆمەڵەگا ئەوانە لەبەرچاو بگرن.

پێداویستیە كۆمەڵایەتی و كولتوورییەكانی لاوان
لاو، خۆی بە بەرپرسێكی گرینگی كۆمەڵگا دەزانێت و خوازیاری هەڵسوكەوت و هاودڵیە و دەیهەوێت بە بنەماڵە یاخود كۆمەڵگای مەدەنی پەیوەست بێت. خۆی بە خوازیاری بەدەستهێنانی ئەدەب و ئەخلاقی نوێ لە پێوەندیی كۆمەڵایەتی دەزانێت و داواكاری كەشێكی ئەمن، كۆمەڵگەیەكی تەندروست، تاكی بە ئەمەك و تاكی بەرپرسیارە. لاوان دۆستی گەشە و سەربزێوین و خوازیاری جوانی و هونەرن لە كار و هەنگاوەكان و بوونی كەشێك بۆ داهێنان و گەشەكردن كە لە ژێر ئەم سێبەرەدا ناو و ناوبانگ بۆ وڵاتەكەیان بەدەست بهێنن. ئەگەر سەرنجێكیش بخەینە سەر كۆمەڵگەی كوردستان، بە درووستی ئەوە دەبینین كە لاوان نەقش و ڕۆڵ و كاریگەریان یەكجار بووە و لە ڕیزی شۆڕشدا لە سەرەتای شۆڕشی گەلانی ئێرانەوە تا ئێستا و بە دڵنیایشەوە لە داهاتووشدا زیاتر دەبێت.
لاوان ئەو توێژەی كۆمەڵگای كوردین كە شادەماری جوڵانەوەكان و هەستانە كۆمەڵایەتییەكانن و هەموو كات بەهێزترین توێژی بوون لە ڕیزی شۆڕشدا و سەنگەریان چۆڵ نەكردووە و هەموو كات بە ورە و تواناكانیان تێكۆشاون ببنە كاراكتەرێكی دیاری سەر شانۆی كۆمەڵگا. لاوان، بە هەموو شكڵەكانی خەباتەوە هەر لە سیاسەت، كولتوور، هونەر، وەرزش و هتد... نەوەستاوە و هەركام لە شوێنێك و بە توانای خۆی هەوڵی داوە و لە ئاست پاراستنی كوردستان و كەرامەتی نەتەوەیی خۆی تێ‌كۆشاوە و بە هەستی بەرپرسیارانەوە هەڵسوكەوتی كردووە. لە كەشی ئێستای كوردستانی ڕۆژهەڵاتدا كەم نین ئەو لاوانەی لە ڕیزی شۆڕشدا چالاكانە سینگی خۆیان كردۆتە قەڵغانی بەرگری لە كوردستان چ لە بەشی ئاشكرا و چ لە بەشی نهێنیدا. با ئەوەش بڵێم كە وێڕای هەبوونی كەشێكی ناتەندرووست و پڕ لە قینی ڕژیمی ئێران كە بە داخەوە بۆتە هۆكارێك كە لاوان قوربانیی سەرەكین و پێوەی دەناڵێن و بە هەزاران جۆر هەوڵی لەناوبردنیان دەدرێت. هەروەك دەبینن بە سێدارە، ئەشكەنجە و زیندانی و ئازار و ئەزیەت  و سەركوت و ئەم جەو و كەشەش ڕژیم سوودی لێ بینیوە و لاوانیش بێ‌دەرەتان بە چەكی دەست و فیكریان بەرەنگاری بوونەتەوە. وێڕای ئەو هەمووە سەركوتانە، لاوان لە هەوڵ و هەنگاو و تێكۆشانی خۆیان نەوەستاون و هەموو كات و ساتێك لە فیكری نوێ‌خوازی و گۆڕانكارییە لە خۆیدا و لەم ڕاستایەشدا لاوان پێویستیان بە هەنگاوێكی سەرەكییە ئەویش بابەتی هاودەنگ بوون و ڕێكخستنی خۆیانە كە دەبێت هەنگاوێكی هەمەلایەنەی بۆ هەڵبگیرێت.


ئه‌م بابه‌ته 535 جار خوێنراوه‌ته‌وه‌‌


PM:10:01:07/09/2018